مراسل عسكري حكايات من قلب المعركة

كتبت نرمين بهنسي

الشهيد بإذن الله البطل /عبدالرحمن البشيهي

قال والده الدكتور على البشيهى : حفظ 13 جزءا فى القرآن والجيران كانوا بيحبوا يسمعوا صوته وهو بيأذن.. حصل على مجموع 101% بالثانوية والتحق بـ”طب القاهرة”.

البطل كتب على صفحته الشخصية الساعة 5 الفجر يوم استشهاده: رضيت بالله ربًا وبالإسلام ديناً وبسيدنا محمد صلى الله عليه وسلم نبيًا ورسولاً،

اتصلت به على طول وسألته إنت صاحى دلوقتى ليه يا ابنى، قالى يا بابا أنا نفسى استشهد، حلمى إنى أخرج من الدنيا نظيف بنفس النقاء كما جئت إليها،

قولت له أنت فين دلوقتى يا عبد الرحمن، قالى فى المدرعة ومستنى دورى،

بعد كده انقطع الاتصال، والساعة 10 وربع اتصل بيا قائد العمليات فى قطاع شمال سيناء، قالى “البقاء لله.. عبد الرحمن استشهد”.

قالت والدته: “إبنى كان دايماً يقولى عايزك تدعيلى يا ماما، علشان طول ما بتدعيلى بكون مرتاح، كان أكبر أولادى، كان بيبكى ويقولى إدعيلى أتقبل فى كلية الشرطة – مع أنه إتقبل فى كلية طب القاهرة بعد حصوله على مجموع 101% بالثانوية العامة، لأنه كان طالب متفوق – عبد الرحمن كان بيقولى عايز أبقى ضابط علشان أحمى البلد، ونفسى أبقى شهيد”.

: “إبنى راح سيناء مرتين، الأولى رجع، والمرة التانية مرجعش، أول مرة راح سيناء كلمنى وقالى أنا هبقى شهيد، 3 من أصدقائى قالولى إنت شهيد، قالى متعيطيش يا ماما، لكن عيّطت طبعاً، وقولت له متكملش الكلام ده وإلا هقفل، مش هسمعك، قالى يا ماما مش عايزك تزعلى منى فى أى حاجة، قولت له أنا عمرى ما أزعل منك أبدًا، إنت حبيبى، كان حنين جداً، ودايما يُقبّل يدى ورأسى، وكان متواضعا جداً مع الجميع”.