كتبت نرمين بهنسي
الشهيد البطل/ أحمد محمد علي نجم
الشهير بنجم
الصراحه انا مش عارف أحكي عنه إيه ولا إيه مافيش حد في الكتيبه غير لما حب أحمد نجم
نجم بطل واشهد له بذلك طيب جدا ط يبكي لو حد من أصحابه حزين ويفرح جدا لو الكل فرحان احمد نجم حساس جدا وملامحه تدل على كده يحب الحب دايما بيحس بكل الناس وضحكته الجميله دايما على وشه دايما بيجري على المدهمات
قائدنا وقتها كان الشهيد البطل العقيد /رامي حسنين اختارنا انا والشهيد أحمد نجم وكام بطل تاني عشان جبنا اهداف الرمايه صح اختارنا عشان نكون معاه في الشغل اللي جاي بعد كده
في يوم قاعد أنا والشهيد أحمد نجم افتكرت ابويا كان يوم ٢٠١٦/٣/٢٨ وكنت بقول لنجم ابويا بيعمل عمليه هو هيتحمل كام عمليه انا حزين عليه جدا ومش عارف اتطمن عليه وكنت ببكي ومعرفش ليه نجم هو كمان قعد يبكي راح قال لي وانا كمان امي تعبانه وانا بحب امي اوي وابويا كمان تعبان جدا وعيز اطمن عليهم ده موقف وفي اليوم ده توفى أبويا الله يرحمه
الشهيد البطل نجم قناص من الدرجه الاولى
في رمضان 2017 اخويا البطل خالد السفاح جايب اكل لينا هو والشهيد البطل فراج وكنا مجموعه كبيره وكل واحد بيعمل حاجه عشان السحور روحنا انا والشهيد نجم نحمر البطاطس بقول له هنحط البطاطس فين يا نجم راح جاب كرتونه بتاعة بسكوت فاضيه وحطينا فيها البطاطس المقليه قال لي شغل دماغك يا بقف
احمد نجم يوم 7/ 7 /2017 يوم معركة البرث
ده اليوم الوحيد اللي أنا والشهيد نجم كنا في خدمه مع بعض وأنا كنت فرحان اوي
نجم كان بيعشق الهزار
قال لي تعال نغطي السلاح عشان ما فيش رمل يدخل فيه من الهوا علشان لما نيجي نتعامل في أي وقت السلاح مايكدبش مننا
كنا لسه هنبدا نقطع في فانله بيضا علشان نغطي السلاح بدات الملحمه
ملحمة البرث الشهيد نجم فضل يتعامل بقوه عليهم وياخد مكاني وأنا اخد مكانه ويتعامل لحد ما دخلت المفخخه بقول له ارقد يا نجم ارقد يا نجم
وكان التعامل شديد جدا نجم رقد على الارض دقيقه وراح جري ينزل على تحت قولت له خد يا نجم خد يا نجم قال لي هروح الحق الاولاد تحت ونزل تحت واستشهد نجم
والضابط سباعي وهو بيبكي فضل يقول نجم استشهد نجم استشهد وصوته كان عالي اوي زعلان عليه استشهاد أحمد نجم.
More Stories
الدرس الكامن وراء الفرشاة: كيف قادت توجيهات معلمٍ حرفياً مصرياً إلى العالمية
أول مصريين أعضاء في مجلس إدارة نادي روتاري مونتريال
كريم عميرة ..وجه جديد بموهبه متميزة