كتبت نرمين بهنسي
الشهيد بإذن الله البطل العقيد أركان حرب /أحمد محمود شعبان
ولد البطل في 21/8/1978 بشبرا – روض الفرج
تربى البطل مع أسرة بسيطة جدا ووالده كان يحب الجيش جدا وخدم فترة الجيش بتاعته في الكلية الحربية وكان دائما يتمني ان أولاده يلتحقوا بالكلية العسكرية
ووالدته كانت تتمني لأولادها نفس الحلم ان تراهم ضباط لكي يحموا وطنهم مصر
حصل البطل على الشهادة الابتدائية والإعدادية من مدرسة التربية الحديثة الخاصة
حصل البطل على الشهادة الثانوية من مدرسة شبرا الثانوية
قدم البطل في الكلية الحربية ولم ينجح والتحق بكلية تجارة ولكنه كان غير راضى لان مكنش ده طموحه وقرر مذاكرة الثانوية العامة مرة اخرى وهو في كلية تجارة وفعلا دخل الاختبار مرة اخرى ونجح والتحق بالكلية الحربية وبدأ المشوار واجتهد وذاكر والتزم وكان متفوق فى الدراسة وكان محبوب من كل الناس
تخرج البطل برتبة ملازم أول في 21/7/2000
دفعة 94حربية وتخصص في سلاح المدرعات ودرس لمدة سنة بعد التخرج في معهد المدرعات وبعدها سافر إلى عدة مناطق:
* المنطقة الغربية حباطة وبعدها دهشور
وبعدها انتداب تدريس في الكلية الحربية
وبعدها المنطقة الغربية براني علي حدود السلوم
وبعدها السويس وبعدها الاسماعلية وبعدها رفح وبعدها الشيخ زويد هنا نهاية المطاف حيث كان اخر موقع يخدم به
حصل البطل على نوط الواجب العسكري من الدرجه الثانية وحصل علي عده فرق ودورات تدريبية في الداخل والخارج، وعين قائد كتيبه الدبابات بالشيخ زويد في ديسمبر ٢٠١٦
عرف عن البطل البساله والشجاعه وقال عنه احد قادته أنه بطل وانقذ كثير من زملائه وكان دائما يتوجه في الاول بالدبابة ويكون في الاول دايما وأكثر من مرة دخل في عربية مفخخة لإنقاذ زملائه والحمد لله ربنا كان بيحميه كان بيضحي بحياته من أجل حياة وطن بأكمله ولم يترك موقعه ولم يخشى الموت وكان يتمنى الشهادة ويقول هو حد يطول يموت شهيد وان كل الرجالة هنا في سيناء يتمنوا الشهادة ومحدش خايف من الموت وكلهم ابطال
كان يقول لزملائه تعامل بشرف حتي مع عدوك وكان يقول لكل مهنة في الوجود شرف يتصل بذات القائم بها وذوات الاخرين الا مهنة الجندية لانها تتصل بشرف عام هو شرف الوطن
تزوج البطل عام 2006 ولديه ابنته
حبيبة أحمد محمود شعبان ربنا يحفظها ويبارك فيها ويحميها ويجعلها من الصالحات ويحققلها كل اللي بتتمناه
وقالت زوجته فى أحد الندوات التثقيفية:”أحمد ماكنش جوزي بس ده ابن خالتي وحب عمري كله أحمد حلم اتمنيته واتحقق سنة 2006 عشت معاه 10 سنين من أجمل سنين حياتي كان زوجا مثاليا ومتواضعا
استشهد البطل في 8/11/2017
استشهد بطلا دفاعا عن الأرض والعرض أثناء قيامه بعملية حق الشهيد بالشيخ زويد ضد إرهابيين تكفيريين
وتنفيذا لمنهجية الجيش المصري للثأر لجميع شهداء مصر الابطال الذين طالتهم يد الإرهاب، اخذ زملاء الشهيد البطل بثأره في وقتها، وتم قتل الإرهابي القناص الذي اطلق عليه الطلق الناري.
كرم الرئيس عبدالفتاح السيسي ابنة وزوجة البطل الشهيد في الندوة التثقيفية السابعة والعشرين، وأبكت “حبيبة” مصر كلها عندما احتضنها السيد الرئيس وصرحت لوالدتها عقب التكريم ” بأنها شعرت أن والدها هو الذي احتضنها “..قائلة بالحرف الواحد ” زي بابا”
رقي البطل استثنائيا إلى رتبة عقيد
أدرج اسم البطل في قائمه الشرف الوطني المصري – باب القوات المسلحه بعد منح اسمه قلاده تاميكوم اعتبارا من 22/1/2018
وتحكي زوجته ايضا:
في ظل احداث سيناء وخوفي عليه قولته يتنقل فقالي لا مينفعش علشان انا واخد فرقة اركان حرب ولو طلبت نقلي هيبقى نقطة وحشة في ملفي وهتتأخر ترقيتي وطبعا ده كله كلام وبس بيحاول يسكتني بيه علشان متكلمش في النقل وبرده جبتله واسطة علشان يتنقل وقالي مين قالك اني عايز اتنقل هو رب هنا رب هناك والي مكتوبله حاجة هتحصله في اي مكان والقائد بتاعه قالي لو هو كان عايز يتنقل انا كنت نقلته فورا من غير كلام لكن احمد شعبان هو الي عايز يفضل في سيناء ويطهرها او يستشهد هناك وزمايله يكملوا المسيرة بتاعته هو ده احمد شعبان المعروف بشجاعته احمد رجل يعرف حقوق دينه جيدا يذكر ربه في كل وقت تري دينه في اخلاقه لايشتم ولا يسب احد مهما اختلف معاه يكرم كل من يراه يعطف علي اليتيم ويحب أصدقائه وجيرانه جدا كان بارا بوالديه ويحسن اليهما كما امره القران كان حنين جدا علي امه ومن ساعة وفاة باباها وكان مصمم أن والدته تعيش معانا علشان ميسبهاش لوحدها ويكون مطمن عليها وهي معايا وحتي في ظروف شغله اول ماتتوافر شبكة يتصل ويطمن عليها وعليا وعلي ابنته الوحيدة حبيبة كان ودودا لكل اهله ويصل رحمه كان دايما مبتسما ابتسامة الرضا وكانت روحه جميله مرحة محبة للاخرين لايتكبر علي احد لدرجة ان احد جيرانه قال انا قربت انسي انه ظابط من كتر التواضع بتاعه واخلاقه الحميدة ايه التربية دي هو في كده دلوقتي كان له عقل راجح لكل من يسأله عن مشكلة ويعطي القرار الحكيم ورغم سنه الصغير الا ان كل الناس بتعتبره كبير ليهم من حكمته وقراراته الحاسمةاللي الكل بياخد بيها لان دايما بيكون عايز الخير والمصلحة للكل
وتقول زوجته أيضا
كان ينزل يودي حبيبة المدرسة ويوديها النادي ويخرجها ويفسحها ويذاكر معاها كان رجل مثالي لم ولن يتكرر كان حب عمري كله حب طفولتي وشبابي وسيظل طول العمر حبه جوايا الي ان القاه في الجنة وحسبي الله ونعم الوكيل في الي قتل فرحتي وحياتي واخد مني روحي انا من غيره بمووووت الف مرة كان يموتني معاه انا كمان علشان مبقاش لوحدي من غيره طبعا اصحابه الرجالة الابطال اخدوا حقه في ساعتها وقتلوا الكلب الي موت الشهيد احمد شعبان بس برضو ناررري مش هتبرد الا لما سيناء كلها تتطهر علشان حياته متكونش راحت هدر يارررب صبرني.
More Stories
الدرس الكامن وراء الفرشاة: كيف قادت توجيهات معلمٍ حرفياً مصرياً إلى العالمية
أول مصريين أعضاء في مجلس إدارة نادي روتاري مونتريال
كريم عميرة ..وجه جديد بموهبه متميزة