بلدي يا أمي …يا نفسي
وسنيني وتاريخ عمري …
لو يوم عديت حدودك
روحي تغيب عني…….
ده فيكي أنا اتهنيت
وياما روحت وجيت
وفيكي ومنك شقيت وبكيت
ومعلمة جراحك هنا في قلبي …
يا أرض طيبة الطيبة
يا كل شغلي وهمي …
يا نيني نين العين
يا فرح نايه حزين
قوليلي يا بلدي : –
طارحة خيرك فين…….؟
عاشق سواد ليلك
فيه تسكن مواويلك ..
بتشكيلي همك وأنا يا حبيبتي بشكيلك ..
لا قادرة تديني ولا قادر اديكي
ولا حتي أزيح عنك …
و لا عاد خُلق ولا ليا نفس أغنيلك……
وأنا وأنتي بنشبه بعض
أنا من طين كده زيك ..
لكن بنطق و بندهلك ..
وبدعيلك ومحتاجلك ..
ووياكي و هنا معاكي
لكن والله مشتاقلك ..
وأنا الغضبان… ..أنا الزعلان
أنا الطهقان…… وشايل أوي منك ..
لكن ورب الكون يا بلدي
اللي يدوس علي طرفك
أقطعه بسناني قبل ما يمسك ..
ده انتِ تاريخي وعنواني
وأصلي ومكاني
أنت زماني وأصل الزمان إيه
غير اسمك ورسمك ..
يا بلدي بجد محتاجلك ..
ضميني أوي في حضنك
إبنك آنا وابن الشهيد
دمه اتعجن في ترابك بأرضك …
مهما يجور الزمن عمري ما هتغير
ولو قسيتي عليا عارف يا أمي
بتعلميني ده أنا ربايتك ..
ولا يهمك أنا مسامحك
ووالله يا مصر يا أم الدنيا
أنا بحبك …أنا بحبك…
بحبك يا بلدي
أمل أمين
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب