قالت ميرفت
ليه جيت عليا؟
حرام عليك
ونسيت أوام إني الضحية!
هونت عليك
وفايتنى وحدي
أتحمل ال آه والأذية؟!
خلاص كده!
وأوام كده!
كان يجري إيه
طب كنت تصبر لو شويه
ده أنت اللي أقرب مني ليك
وعارفه إن حبك كتير عليا
بس افتكر مهما يطول بنا البعاد
إن غلاوتك هى هى
لسة ساكن جوه قلبي
لسة حبى هو حبى
وإياك تفكر
إن غرامي كان تمثيليه
جربنا كام مرة عنادنا
طولنا كام ليلة بعادنا؟!
وكل مرة كنت تناجيني
لحضن قلبك تلاقيني جايه
لية جيت عليا؟
أنا ذنبي إيه
طول عمري خايفه من الغرام
واكتم في قلبي حتي الكلام
لكن عيوني اقرا اللي فيهم
تسمع بحبك منها قوية
متسيبش قلبي
خليك بقربي
مش قادرة اخبي
الحزن ثانية
مهما أداري
شوقي وناري
سبقاني دايما
دموع عينيه
حرام عليك
متجيش عليا
بقلم ميرفت أمين
وقالت أمل
بتحبني ؟!
طب ليه بتأسى ؟
وليه تبيع ؟!
قلبي في ايديك
وانت فييه عمال بتدبح
ليه في كل كلام مابينا
تقصد إهانة أو بتجرح؟!
فين الوداد ؟!
فين المحبة والسلام ؟!
كله كده ضاع واختفى اوام اوام !!
مابقاش مابينا غير خصام !
غير تخلي أو عناد ؟!
فين الحنان ؟؟
مش سامعه منك غير ملام
حتى شفايفك
ماعدتش ترسم الابتسام
وخلاص لُقانا زي عدمه
بيختفي مابينا الكلام
تايهة …
تايهة مابين عشرة سنين ..
وبين كرامة بتتكسر
وبتتهدم على أعتاب الحنين ..
بسمع صراخ روحي
في صمت الليل
مع الآه والأنين ..
مابين أبيعك … ولا أبقى
مابين دموعي …وشوق ولهفة
مابين شموسي اللي انطفت
ولا على ضي الأمل
يمكن يعود بينا اليقين
أمل أمين
أنا وأختي
بقلم ميرفت أمين محمد الخولي و أمل أمين محمد الخولي
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب