بقلم الشاعر عمر أحمد عبد العزيز
انتهينا خلاص
الباب اللي خرجتي منه امبارح
مقفول النهاردة بمليون ترباس
ارجعي يلا مكانك
احنا لا يمكن نرجع تاني زي زمان
على رأي الست ما قالت
وعايزنا نرجع زي زمان
قول للزمان ارجع يا زمان
بس حتى لو قولتيله يرجع
القلب اللي كان رايدك
مبقاش ليكي فيه دلوقتي اي مكان
وانا مش بياع واللّه ولا غدار
الفكرة بس ان اللي يرجع للي فرط فيه يبقى حمار
لسة فاكر كويس اول فترة في البعد
كنت في نار وعذاب
كنت بشكي حالي لحالي
كان قلبي وقتها بيموت
وانتي كان عندك بيقولك كملي بعلو الصوت
ماكنش همك اعيش اموت
هجرتي الحب
ورميتي الذنب عليا
ده عصبي.. ده اناني
ده بيعمل وبيعمل فيا
نسيتي اني استحملت مرارك
نسيتي ان نار جهنم اهون بكتير من نارك
والغريبة انك كنتي فكراني هترجاكي
بس لا يا ملاكي
انا نسيتك واتخطيتك
وكل المشاعر اللي كانوا ليكي رمتهملك تحت عتبة بيتك
ايوة نزعت سمك اللي كان معشش جوة ضلوعي
واخيرا رجعت تاني لنفسي ولروحي
بقوا كل الناس اللي حواليا شايفني احلى
اتاريكي كنتي اسوأ شيء فيا
وجاية بعد ده كله تقولي نرجع
نرجع فين وازاي
تكونيش فاكرة دموعك دي هتخليني اضعف
لا والله ما هضعف أبدا
غلطة عمري اني في يوم ضعفت وسلمتك قلبي
لكن محدش فينا بيتعلم بالساهل
بس الغلطة اللي غلطتها امبارح
لو غلطتها تاني النهادرة ابقى بجد استاهل
ارجعي تاني يلا لحياتك
ارجعي تاني لعنادك
دوريلك على واحد تحركيه بريموت كنترول
شاب روش كدة وبيس وكول
انما انا دقة قديمة
مليش في الميوعة ولا في الحركات ولا شغل السيما
تناسبني واحدة بالظبط عكسك
واحدة مخها مش مربوط باستيك
واحدة تكون فاهمة الدنيا كويس
عارفة يعني ايه بيت وحياة
اميرة اديها وتديني
اميرة مستخسرش فيها حتى عيني
انما انتي مش هاستخسر اني اقولك كلمة واحدة
وهي.. انسيني
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب