مشهد رهيب خلى كل المشيعين يحسوا برهبة غريبة اتغلغلت جوة قلوبهم وحفرت جواها الخوف، قطط سودة شكلها مخيف بتموء بغضب من أول بيتنا لحد المقابر..
صفحة الكاتب على فيس بوك: أحمد محمود شرقاوي
………..
صرخت صرخة رهيبة أول ما نزلت عليا العصاية الغليظة على جسمي، حسيت ان عضمي اتكسر من قوة الضربة، بكيت بصوت عالي وانا بحاول أهرب من جدتي اللي كانت مُصرة انها تعاقبني، جريت ناحية والدتي اللي حضنتني بقوة وحاولت تبعدني عن جدتي، بس هي كانت مصرة تضربني وهي بتشتمني بأبشع الألفاظ، وأول ما أمي وقفت حائل بيني وبينها اتحولت الشتايم البشعة ناحيتها، الموقف كان صعب والخناقة بتتصاعد لحد ما ربنا سترها ووالدي جه..
حاول يهدي الدنيا بس والدته كانت ثايرة، عمالة تشتم في الكل، في النهاية انتهى الموقف وانا عمالة أبكي من قوة الضربة، وعلى بعد المغرب حطينا الأكل وجت جدتي قعدت بس أمي رفضت انها تاكل، كان باين عليها الغضب والحزن، حاسة بيها وعارفة انها خلاص مبقتش قادرة تستحمل حماتها، ست قاسية وسليطة اللسان ومحدش قادر يقف قدامها..
ووالدي مش قادر انه يقف لوالدته، راجل متدين وعارف يعني ايه أم مهما حصل، وطبعا سمعنا وصلة اهانات من جدتي عشان أمي رفضت تقعد تاكل معاها، وانتهى اليوم خالص..
تاني يوم روحت على المدرسة وانا لسة بتوجع من ضربة امبارح، مكنتش عارفة أركز أو حتى ابتسم، وخلص اليوم ورجعت بيتنا وانا بحاول أتحاشى جدتي بقدر الامكان، روحت لقيتها بتحط حِنة على كفوف ايديها وبتتذوق كعادتها، عملنا الغدا ووالدي اعتذر لوالدتي وطلب منها تتغدى معانا وتسامح والدته لأنها ست كبيرة..
في النهاية أمي اتنازلت عشان والدي ونزلت قعدت معانا عشان ناكل، وكالعادة مسلمناش من نظرات جدتي الفظة، كلمات جارحة، غمز ولمز، ونظرات كلها سخرية..
في اللحظة دي لمحت قطة صغيرة لونها ثلجي وشكلها مذهل، شوفتها بتنزل من على سلم بيتنا وبتقرب من الطبلية اللي بناكل عليها، حاجة عادية بتحصل كتير معانا، بس الغريب ان القطة خطفت حتة اللحمة من طبق جدتي..
جدتي اللي اتخضت من الموقف وقامت تسب وتلعن، وفي لحظة مسكت نفس العصاية اللي ضربتني بيها امبارح، وقبل ما القطة تجري أو تتحرك نزلت بالعصاية على دماغ القطة..
القطة صرخت صرخة غريبة، وقعت في الأرض تتحرك بعشوائية، وقبل ما حد فينا يتحرك بس كانت جدتي نازلة على دماغها بضربة تانية وتالتة وهي عمالة تلعنها وتسب فيها..
في الوقت ده والدي شد العصاية من ايد جدتي المفترية، الست اللي فيها قوة وجبروت عجيب، بس للأسف كانت القطة بتحتضر وعنيها بتبصلنا بنظرات ذهول وألم رهيب، ولفظت القطة أنفاسها الأخيرة وماتت..
أمي انهارت من البكاء ورجعت اوضتها وانا وقفت أبص بذهول وحزن للقطة من غير ما انطق، أما جدتي فكملت أكلها كأن مفيش أي حاجة حصلت، روحت لوالدتي وانا بدعي على جدتي بالموت، الست اللي مفيش في قلبها أي رحمة أو شفقة..
ومكنتش أعرف وقتها ان دعوتي اتقبلت وان الأمور هتطور بطريقة عجيبة في الأيام اللي جاية..
بقلم: أحمد محمود شرقاوي
……………..
ابويا دفن القطة ورا البيت في حالة من الصمت والحزن، كأنه حاسس بحمل رهيب على صدره، ربنا ابتلاه بأم صعبة محولة حياته كلها لجحيم، مبترحمش ولا بتسيب رحمة ربنا تنزل..
. ليها صولات وجولات مع كل الجيران والأهل والمعارف، مفيش حد غير واتأذى من حقدها ولسانها وغيبتها، حتى القطة المسكينة ماتت على ايديها..
بالليل كنت قاعدة على السطح بحاول أذاكر بعيد عن دوشة ولسان جدتي اللي معانا في البيت زي القدر، بعد شوية صدعت فوقفت اتفرج على البلد الصامتة بتأمل وهدوء..
بس اللي لفت نظري هي الأرض اللي ورا بيتنا الفاضية، واللي تعتبر بقت مقلب زبالة كل الناس بترمي فيها، لمحت قطط كتير واقفين حولين المكان اللي والدي دفن فيه القطة..
جسمي كله قشعر وقتها، شيء عجيب، القطط واقفة في ترتيب عجيب وكلهم حولين المكان المدفونة فيه القطة، لحظات واتقدمت قطة ضخمة ضخامة غريبة وبدأت تحفر في المكان نفسه..
جسمي بدأ يترعش واحس بكهربا بتمسك فيه، تنميل عجيب مسك جسمي وغيبوبة بدأت تهاجم جسمي، كنت خايفة وحاسة انهم هياكلوا جسم القطة..
وبدون وعي مني عليت صوتي عشان يبعدوا، في اللحظة دي بصوا كلهم ناحيتي، بل وبدأ يطلع منهم صوت مواء خشن جدا، صوت كأنه صياح وصريخ مش مواء بس..
حسيت وقتها برياح بتضرب جسمي اللي كان بيتنفض، وقعت في الأرض وبدأت أزحف ناحية السلم عشان انزل، صوت المواء كان في وداني، كان بيدخل جوة روحي نفسها، زحفت زي المشلولة على السلم لحد ما وقعت واتخبطت في راسي، لحظات بس وحسيت بدم بينزل مني..
كانت الغيبوبة في الوقت ده بتحاول تتمكن مني بأي طريقة، في النهاية قدرت أقوم وجريت على تحت، كان البيت كله نايم، قعدت على كنبة الصالة اترعش وانهج بهيستريا، وكتمت الجرح في النهاية..
خدت وقت كبير قبل ما جسمي يهدى واقدر اني أتمالك نفسي، دخلت اوضتي بعدها وحاولت اني أنام، وفعلا نمت، بس مسافة ما نمت سمعت نفس صوت المواء من تاني، صحيت مفزوعة من نومي، الاوضة كانت ضلمة، وكنت سامعة صوت أنفاس خشنة جدا..
صوت أنفاس القطط انا عارفاه، في اللحظة دي رغم الضلمة لمحت القطة الضخمة واقفة قدام السرير بتاعي، جسمي كله اتخشب وانا باصة في العنين الحمرة اللي زي الدم..
شوفتها بتقرب من سريري، بتحوم حولين السرير وبتموء بصوتها المفزع، قلبي وقتها كان هيخرج من مكانه، شعر جسمي كله مقشعر وجسمي مشلول، في اللحظة دي شوفت قطط كتير بيخرجوا من تحت سريري، ولقيتهم وقفوا في صف ورا القط الكبير وخرجوا من اوضتي في طابور طويل..
الباب اتفتح وكملوا مشي لحد اوضة جدتي اللي قصادي، مدت القطة الكبيرة ايديها وفتحت الباب ودخلوا كلهم قدام عنيا، كل ده وانا مشلولة، مش قادرة اتنفس حتى..
مفيش دقيقة واحدة وسمعنا صرخة رهيبة، صرخة جدتي، وقتها بس جسمي اتحرك من تاني، ابويا خرج يجري زي المجنون ناحية اوضتها وانا خرجت معاه، دخلنا الاوضة لقينا جدتي جسمها متقوس بطريقة عجيبة زي المصروعة، وكانت متخربشة في كل مكان في جسمها، وبالأخص في وشها، ومن مكان الخرابيش كان الدم بينزل بغزارة..
ابويا جري عليها وحاول يداويها بس فضلت تتنفض كتير قبل ما جسمها يستكين، الغريب اني ملمحتش أي قطة من اللي شوفتهم، ابويا خدها على المستشفى، وفضل بيها كتير اوي هناك، رجع بيها الصبح كانت حاطة ضمادات على الجروح ونامت على طول..
فضلنا مستنيين عشان نعرف منها اللي حصل، بس لما فاقت على العصر فضلت تبكي، ابويا حاول معاها بكل الطرق عشان تتكلم، بس مكانتش بتنطق بنص كلمة، بتبكي وبس..
وعلى بالليل كنا قاعدين حوليها، كان فيه في عنيها خوف رهيب، كانت بتترعش وتبكي وشوية وتزوم وتكش بجسمها كأنها خايفة من حاجة حوليها..
فين وفين لما نامت على الساعة ١٢، رجعت سريري وانا خايفة، مش قادرة أحكي أو انطق باللي شوفته، ومفيش ساعة واحدة الا وسمعنا صرخات رهيبة جاية من اوضتها، ابويا كان في الصالة دخل يجري عليها لقاها متقوصة بجسمها من تاني وعمالة تزوم، وفي جسمها خرابيش جديدة..
فضل يدور زي المجنون في الاوضة بس ملقاش أي حاجة، كنت عارفة السبب، بس مكنتش قادرة اتكلم، وقضينا ليلة صعبة جمبها زي ليلة امبارح، بس قبل الفجر بشوية قامت تصرخ وتتنفض من نومها، حاول والدي يهديها بس فجأة دفعته بقوة وخرجت تجري لبرة، فتحت باب البيت وطلعت منه في لمح البصر..
وخرجت تجري وتصرخ زي المجنونة في الشارع، خرجنا نجري وراها عشان نلحقها، في اللحظة دي شوفت كل حاجة، منشر بلكونة حديد وقع من مكانه، ونزل زي القدر فوق دماغها بالظبط وهي بتجري في اللحظة دي من تحت البلكونة، ووقعت في الأرض تشهق ودماغها تسيل بالدم، ابويا جري عليها يصرخ، في اللحظة دي الناس صحيوا واتلموا عليها، حاولوا يسعفوها بكل الطرق بس كانت بتنزف بغزارة..
شوفت في عنيها نظرات الوجع والرعب، شوفت عنيها بتطفي وجسمها بيتنفض، في النهاية لفظت أخر نفس وماتت، وصرخ ابويا بكل لوعة الدنيا، بس انا كنت ببص في حتة تانية خالص، على سور سطح البيت اللي وقع منه المنشر الحديد، لأني شوفت القطة الضخمة واقفة بتراقب كل حاجة بثبات رهيب، وصرخ ابويا صرخة جديدة..
بقلم: أحمد محمود شرقاوي
……….
كل اللي حصل يوم دفنتها كان عجيب، قطط كتيرة اوي اتلمت قدام بيتنا، الناس كانت مستغربة من عدد القطط ده، الغريب ان الرجالة قالوا ان القطط فضلوا ماشيين ورا الجنازة كأنهم بيشيعوها زي الناس، حتى قدام قبرها القطط كانت واقفة تموء بصوت خشن..
كل المشيعين حسوا بخوف يومها، دفنوها بسرعة وكل واحد رجع لبيته، كأنهم بيهربوا من الجحيم نفسه، وكل اللي عرفته بعد كدا ان القطة اللي قتلتها جدتي دي كانت من الجن، وان قبيلتها انتقمت ليها..
وفيه رأي اتقال لما حكيت بعدها بسنين ان القطة دي كانت من عمار المكان اللي كرهت تسلط جدتي، ويوم ما احتكت بيها قتلتها، وانتقم العمار منها..
الله أعلم بالحقيقة، بس كل اللي عرفاه، إن اللي بيرحم ربنا بيرحمه، وان من صفات ربنا هو الرحمن، فارحموا من في الأرض يرحمكم من في السماء..
بقلم: أحمد محمود شرقاوي
………
“الراحمون يرحمهم الرحمن”
عن ابن مسعود رضي الله عنه قال: قال رسول الله صلى الله عليه وسلم: ((ألا أخبركم بمن يحرم على النَّار، وبمن تحرم النَّار عليه؟ على كلِّ هيِّن ليِّن قريب سهل ))
بقلم: أحمد محمود شرقاوي
……….
ترقبوا أعمالي بمعرض القاهرة الدولي للكتاب ٢٠٢٢ ضمن اصدارات دار ببلومانيا للنشر والتوزيع..
رواية “إني رأيت”
سلسلة مائدة الفزع العدد الثالث “لعلهم يرجعون”
More Stories
كلمتين باختصار شديد عن حال البلاد والعباد في زمان مليء بالتحديات وعدم التحلي بالصبر من البعض مع التقليل من شأن البسطاء من البعض الآخر علما بأن البسطاء هم الأكثر خوفا على البلاد فليس لهم ملاذا آخر …
«عبدالناصر وحركات التحرر الوطني».. مؤتمر فكري يستعرض رؤية الشباب المصري لثورة 23 يوليو وإنجازات الزعيم جمال عبدالناصر
وعن عمرٍ فيمَ أفناه ؟ خواطر أدبية ذات طابع وعظي