“سكة سفر “
اللي بيني وبين هواك
سكة سفر
طولها عُمر
مابين شروق الشمس لحظة
وليل طويل من غير قمر
حبك أنت زي وهم
لعبة ولعبها القدر
هداني بيك
من غير ميعاد
شوفتك ملاك غير البشر
وطلعت ذنب
عمره ما في يوم يغتفر
عشقك غريب زي العسل
بطعم مُر
طبعك عجيب بحضور عليل
مش مستقر
شايف هزيمتي بمية دليل
صبحت ليك مملوك ذليل
وأنا اللي دايماً كنت حر
كنت ليك ومعاك وبيك
شوفت دنيايا بعنيك
كل ثانية معاك بتبكي حسرتي
افتكرت ازاي لُقاك .. مع لهفتي
وفي غيابك .. غِرقت ويّا دمعتي
وفي عتابك.. كان سؤالي وقهرتي
وكان جوابك وقتها .. معنى حقيقي لكسرتي
ياللي افتكرت وإني جنبك
هيكون كياني وعزتي
تفتكر إيه تاني أقوله
حتى صمتي وهمسي قرب ينتحر
الحروف من حيرتي تاهت
والكلام بقا شكله باهت
والمعاني باعتني زيك
حاسه عقلي بيتعصر
ياللي كنت في ليلي حلمي
نور حياتي و كل أملي
شوفت عمر جديد لعمري
بس انتهى كل التمني
لما هونت وقلبي خاني
وهان عليك ادام عينيك
ومابين ايديك مارحمتهوش
وسيبته يتكسر
أمل أمين
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب