كان مسار الحلم …
زي جناحات الطير
بتحضن شموس الكون
طموحها ماله حدود
ما يمنعها أي سدود
بترسم على الدنيا
بأملها مليون لون
كان الطريق واحد
وقلوبنا متجمعة
لقلب كان واحد
وبنينا بالفكرة
مدينة بالحكمة
الكل فيها يشكر
وماكانش فينا جاحد
ده كان مسار الحلم …
صحينا من نومنا
لقينا أيامنا
شموسها مطفية
حتى طيور الأمل
مزوية منسية
مقصقصين ريشها
وعلى جنب مرمية
رغم إن الكون براح
مكانش ليها متاح
حسبوا عليها الخُطى
وقفلوا على الأحلام
بالضبه والمفتاح
وحاد مسار الحلم …
لكن في قلب العتمة
وسط غيامة الظلم
يضوي شعاع الخير
ويبدد الضلمة
يصرخ أنين الصمت
من الآهة والحُرقة
يكسر هدوء السكات
ويهاتي و ينادي
ما تقولش حلم ومات
ده مهما طال الليل
وزادت الظلمات
الفجر هيأذن
والنور مسيره يبان
من ربنا الرحمن
خالق السماوات
ولسه باقي الحلم …
أمل أمين
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب