صوتك عالم ..دنيا بحالها
أجواءها براح..مالهاش أوصاف..
ولا ليها حدود..ولا أي سدود
أحوالها غريبة..غير الدنيا
ماتحسش فيها ..أنك بتخاف..
جوا مجالها
عمرك ما تتوه ..دايماً ثابت
ولوحدك بس ..أنت ال متشاف ..
عالم صوتك..مليان ألحان
رغم همومه وكل الأشجان
وآلامه ووجعه مع الأحزان
بس باحساسك
ممكن أوجاعك تتلحن
على عزف (كمان) ..
عالم صوتك مع أول همسه
الكون حواليا يملاه النور
وبريقه يضّوي
وفي قلب الفضا يصبح منتور..
يملا الأركان عالم مسحور
وكأني في حضرة
والجو اتملا حواليا بخور..
وأنا دايب فيه عاشق أراضيه
هايم حواليه ومستسلم ليه
عالم صوتك
غُربة لنفسي.. لكنك وطني
سمايا وعزي
ضعفي في أرضي
وجعي وحيرتي
ونغمي وطربي
صوتك عالم
وعالم صوتك بالنسبه لي
كل الدنيا وكل العالم
لكن يا خسارة
نغمة أوتارك ليه اتهزت
خلتني أتوه
والرِتم ايقاعه بقا معفرت
محتاج يرقوه
نبرة حِسك صبحت باهته
والكذبة بجد بقت ثابته
جيت من اللهفة
لقيتني في لحظة
حسيت خايفه
وساعتها عرفت إني خسرتك
صوتك دنياه
كلها أوهام ..أضغاث أحلام
لحنها مش أصلي
كذبة كبيرة وأنغام تافهة
أمل أمين
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب