اللي بينا
شيء مالوش بدايات
ولا زي أي شيءتاني
له نهايات
اللي بينا سطور
مليانه بالحروف
مرصوفة بالكلمات
حتي هوامش الصفحة
بتنطق من الرسومات
اللي بينا كلمه دافية
تنعش القلب اللي مات
اللي بينا همسة صافية
تحكي تاريخ عشق فات
اللي بينا
هرم رابع من الحب
مبني بحجارة الذكريات
هرم مش مأثر فيه
مرور الزمن
بيلمع لوحده
مش محتاج بريق الدهانات
اللي بينا.. نور بينور طريقنا
بيرشدنا ازاي نعبر الأزمات
اللي بينا.. كلمة صادقة
مش محتاجه عقود
مش محتاجه توثيقات
اللي بينا..نهر صافي
محفور من ندي الغيمات
اللي بينا عمر
مش كام ساعة
مش كام يوم
ولا كام شهر
اللي بينا حب صادق
قدر يتحدي العوائق
قادر يجمعنا
حتي لو كان بينا شق
كنت حاسة
من أول ما قلبي دق
اللي بينا
مش هيضيع
هيفضل باقي
هيعدي عليه مية شتا
وهيفوت الصيف
بس اللي بينا مش
هيبقي ضيف
هيستمر لحد ما
يجيلوه الربيع
اللي بينا مش هيضيع
تعرف ليه
لأني بخاف عليه
وجوه قلبي عن
العيون بخبيه
اللي بينا
مش كدب
دي حقيقة
بعيشها كل دقيقة
حلم جميل
واقع صعب المنال
بس ممكن
مش مستحيل
اللي بينا..
دمعة فراق
بس اكيد هتتمحي
من عنيننا
لو صبرنا واستمرينا
اللي بينا
ضحكه حلوة
أحلي لحن
لأحلي غنوة
هنغنيها طول العمر
أبد الدهر
اللي بينا ميتنسيش
أنا جواه بعيش
ويجري اللي يجري
المهم تبقي ليا
غير كده ميهمنيش
رويدا عبد الحي
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب