يابهية
أوعاك ف يوم تزعلي
ماعاش اللي يزعلك
ولاكان ولا اتوجد
اللي يقهرك
ولا يبكيك أو يخذلك
دا قدرك يابهية
تشيلي وتتحملي
بس فيك سر
محدش قدر يفهمك
ولا يفك طلاسمك
أو يحللك
لأنك بهية
خللي اللي يهري يهري
واللي يخون يخون
واللي يبيع يبيع
أهم حاجة إنك تفضلي ست الحسن الفرحة مش سايعاك
عارفة ليه يابهية
لأنك برضه بهية
كم ألف سنة مروا عليك
وأنت زي ما أنت
لا حد مس توبك
ولا فك ضفايرك
فاهمة قصدي طبعا
محدش مس توبك لأنك للغزاة مقبرة
ومحدش فك ضفايرك
لأنك شريفة ومتحصنة
فوق كده أنت متأكدة إن رب الكون حافظك
وحاميك وراعيك
مهما عملوا فيك عمرك ما هتستسلمي
ولا تتوجعي ولا تقولي ياريت اللي جرى ماكان
أبدا يابهية
وحياة جدودي
اللي لسه شاهدين على عظمتك
ما هاتزعلي ولا تتأثري
ولا تباتي ف يوم م الحزن تفكري
عارفة ليه
لأنك بهية
واحنا ولاد بهية
وعمرها هتفضل عفية
وأبية وغنية
تعيشي يابهية
كلمات طه هيكل
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب