كتب : عمر أحمد عبد العزيز
كأنك جنة
كأنك جنة
وأنا العابد الناسك اللي ربه حباه
كأنك جنة
اتوهبت ليا من أجل ما اتهنى
كأنك كل الحور العين
وأنا اصلا الاقي جمال زي جمالك فين
ولو في أنا والله ما رايده
أنا مش رايد إلا حلاكي انتي
يا أجمل حاجة في العمر
يا أجمل بنت
يا أجمل حاجة حصلتلي
من يوم ما لقيتك
وأنا طاير
تقوليش من الفرحة طلعلي جناح
مليتي الدنيا عليا
بقيت مبسوط وهادي وراضي ومرتاح
لقيت نفسي أخيرا في وجودك
لقيت الطفل اللي غاب عني زمان وانزاح
بقيت شايف كل الناس انتي
حتى البيوت والشوارع والمباني
بقيت بشوفك في مرايتي وعلى ساعتي وفنجاني
وحتى وانتي معايا
بشوف طيفك مبيسبنيش
لما بلمس كفوفك
يا الله قد ايه بدفا وبرتاح
ولما ببص لعيونك الحلوين
بسافر بعيد و بروح
ولما بسمع كلمة طالعة من بين شفايفك
كأن بتترد فيا تاني الروح
أنا قبلك كنت سراب
دلوقتي أنا اكتر من حقيقة
مأنا في الجنة
و في ايه اكتر من الجنة حقيقة
مكنتش متصور أن النعيم ممكن يكون انسي
مكنتش متخيل أن الأرض ممكن تطرح ملايكة وسلام وهدوء
بس جيتي انتي وحققتي اللي مكنش في خيالي
جيتي و حليتي مرارة الأيام
نورتي عتمة حياتي
وبقيتي كل المنى و الأحلام
وأنا مهما اوصفك واحكيكي
مش هعرف اقول كل اللي جوايا
مش هعرف أبدا انصف حورية في الجمال آية
سبحان اللي خلقك ورسمك و سواكي
سبحان اللي من كل الحسن اداكي
سبحانه اللي وضعك في طريقي
وخلاكي جنتي وحالي
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب