انتقام من العالم الآخر.. بقلم أحمد محمود شرقاوي

عبارة عن عمارة قديمة جدا آيلة للسقوط مُحاطة بسور كبير عبارة عن مقلب زبالة، والاسوأ كان وقت الليل لما كنت بشوف دخان طالع من جوة المكان ده، البعض بيقول انه ملجئ للمتسولين وتجار المخدرات، والبعض بيقول ان الدخان ده بيطلع من زمان كل ليلة بدون أي سبب مفهوم..

أيا كان السبب فانا حقيقي بقيت بخاف افتح شباك شقتي بالليل بسبب الرهبة اللي بحس بيها اول ما عنيا بتلمح المبنى ده، لدرجة اني منعت ابني انه يلعب بعد العشا قدام العمارة بسبب خوفي عليه..

مانا للاسف بقيت مضطرة بعد موت زوجي وجشع اخواته اللي قدروا ياخدوا مني كل حاجة اني أقوم بدور الام والأب واني اوفر سُبل المعيشة لابني الصغير في زمن بقت الرحمة مش من مفرداته..

واتفرمت، اتفرمت وعرفت يعني ايه شغل في القطاع الخاص، وعرفت اد ايه انا كنت ظالمة جوزي اللي كنت بنعته بالاهمال والتقصير عشان بيرجع من شغله ينام، وفي النهاية اشتغلت كول سنتر في شركة مبيعات بمرتب ضعيف يادوب ناكل ونشرب وندفع الايجار..

شعور الامان اتنزع من جوايا وبقيت شايفة الحياة من غير راجل اتسند عليه قاسية، بل ومميتة وهتفرمني بين تروسها انا وابني في أي لحظة، وكنت للأسف بجبر ابني كل يوم يفضل في الشقة من الصبح لحد المغرب واقفل عليه الباب..

كنت بفضل طول اليوم في شغلي قلقانة ومرعوبة انه يعمل حاجة، خاصة انه لسة طفل عنده سبع سنين، وكنت كل يوم بروح بلاقيه بيبكي وزعلان اني حبساه في الشقة لوحده وانه بيخاف وحاسس انه لوحده..

كلامه كان بيقطع فيا، بس غصب عني مكنتش لاقية حل غير ده، جربت مرة اخده معايا الشغل وكنت هتطرد من المكان بسبب أفعاله للأسف، ونمت ليلتها وانا ببكي وبدعي ربنا يصبرني ويقويني على حياتي دي..

ونزلت تاني يوم ودموع الليلة اللي فاتت لسة بتنزل، كنت حاسة اني مضغوطة، خايفة، ومش شايفة أي ملامح ولا ليا ولا لابني، في الوقت ده لقيت طفل واقف قدام المبنى القديم وتقريبا بيبكي..

قلبي اتقهر عليه خاصةً انه فكرني بابني سليم، قربت منه وسألته بابتسامة:

– انت بتعيط ليه يا حبيبي

بص ناحيتي ودموعه وقفت تماما وفضل يتأمل فيا بثبات غريب، تأملته انا كمان بهدوء، طفل تقريبا ١٢ سنة، هدومه مقطعة وعنده جرح في جبهته وشكله متبهدل على الآخر.. ابتسمت اكتر وقلتله:

– طيب محتاج حاجة اجبهالك

بص ناحيتي بعمق اكتر وفتح بقه وشاور ناحيته، طبطبت عليه وقولت:

– طيب اقف هنا هشتريلك أكل من المطعم القريب اللي هنا وهجيلك

وروحت بسرعة اشتريت تلت سندويتشات بالعشرة جنيه اللي كنت هاكل بيها طول اليوم ورجعتله بسرعة، بس مكانش موجود، دورت عليه يمين وشمال بس كان اختفى..

خفت ادخله للمبنى جوة بصراحة ومشيت بسرعة عشان الحق شغلي، وكملت شغلي طول اليوم اللي كان مُرهق جدا بسبب مشكلة عملتها مع زميلة قديمة اسمها نرمين حاولت تعاملني بإسلوب قذر بس انا صدتها..

ورجعت بيتي وانا منهكة، تعبانة، بحاول اجمع ابتسامة عشان أواسي ابني اللي واثقة اني هلاقيه بيبكي وزعلان، دخلت الشقة لاقيته مبتسم وقاعد منتشي بطريقة غريبة..

قربت منه باستغراب وقولت:

– غريبة شكلك مش متضايق انهاردة يعني

– اصلي اتعرفت على حسن ولعبنا انهاردة مع بعض

– حسن مين يا حبيبي

ابتسم اكتر وسكت، فكرت انه ممكن يكون شاف كرتون جديد عجبه، دخلت حضرت الأكل وكلنا ودخلت عشان انام، بس قبل ما انام لقيت ابني متردد شوية وواقف قدام باب الاوضة..

ناديت عليه وطبطبت عليه بحنية وطلبت منه يقولي هو عاوز يقول ايه.. وبتردد كبير اتكلم وقال:

– حسن بيقولك متديش الباسوورد بتاعك بكرة لأي حد يطلبه منك

قالها وخرج من الاوضة بسرعة، ناديت عليه مرة واتنين بس مرضيش يرد عليا، حاولت انام رغب استغرابي من كلامه، وفين وفين لما نمت..

بس تاني يوم ووسط شغلي فوجئت بعلا زميلتي بتطلب مني حسابي عشان تبعت منه رد لعميل لأن حسابها مبيفتحش..

الموضوع عادي وبيحصل يوميَا، وكل يوم حساب بيتوقف وبنحاول نرجعه، ووقتها بنساعد بعض كزملاء، بس قبل ما اديها باسوورد الحساب بتاعي افتكرت كلام ابني، ولقيت نفسي بتحجج بحجة ضعيفة اني مش فاكراه ومش عايز يفتح وشكلي مش هعرف اشتغل انا كمان انهاردة..

وكملت اليوم وهي بتبصلي بصات مش مفهومة، وعلى بالليل لقيت رسالة من رقم غريب على الواتس بتقول الآتي

“نرمين اللي زعقتي معاها امبارح بت مؤذية لأبعد مدى، وسمعتها بتتفق مع علا عشان ياخدوا ايميلك ويبعتوا ردود تورطك مع العملاء وهيخلوا موقفك صعب وممكن تتحولي للشؤون القانونية ساعتها خلي بالك”

الرسالة خوفتني اوي، وفكرتني بكلام ابني، جريت عليه وحاولت استفسر منه على الكلام اللي قاله امبارح، الغريب انه عمل نفسه مش فاكر أي حاجة وسابني وجري، كنت حاسة اني هتجنن من طريقة رده عليا..

وفضلت طول الليل بفكر وقلقانة من الرسالة اللي جتلي، وتاني يوم فوجئت بمشرف التيم بيطلبني في مكتبه، دخلتله وانا مستغربة عشان يفتح السيستم ويوريني ردود قاسية مني بوظت علاقة الشركة بتلت عملاء مهمين جدا..

كنت هتجنن، استحالة اكون رديت بالطريقة دي، وضحتله اني مغيرتش الباسوورد من يوم ما خدته منهم وانه سهل حد يتوقعه لأنه

AAA123456

اتهمني بالاهمال لأن دي مسؤوليتي وانهم نبهوا اللي يستلم حساب ع السيستم لازم يأمنه جدا ويغير الباسوورد، واتحولت للتحقيق واتخصم نص مرتبي تقريبا..

خرجت من مكتب المدير ودموعي على خدي وانا مقهورة، حرفيا مش عارفة هاكل انا وابني الشهر الجاي ازاي، يادوب القبض كله هيروح للإيجار، طيب وبعدين، قعدت على مكتبي وبكيت في صمت، وقتها شوفت الشماتة في عنين نرمين، وتوقعت انها تعرف حد في الIT جبلها الباسوورد بتاعي، استأذنت لأني تعبانة ورجعت شقتي ودموعي على خدي..

حاولت ابعد عن ابني ودخلت اوضتي وفضلت أبكي وابكي وابكي، حاسة ان طاقتي خلصت بدري، وبقيت شايفة الفقر والحوجة بيبصوا ناحيتي بانتصار، وكل ما كنت بفتكر ابني كنت بخاف اكتر عليه..

ووسط بكائي حسيت بإيد بتطبطب عليا، كان ابني سليم، حضنته بقوة وانا بحاول استمد منه الأمان بأي طريقة.. وشوشني في ودني وقال:

– بتعيطي ليه يا ماما

– مفيش يا حبيبي

– لازم تقوليلي يا ماما

– الفلوس هتقل معانا ومش عارفة هنعمل ايه بس ربنا هيسترها ان شاء الله يا حبيبي

– هخلي حسن يتصرف يا ماما

بصتله بقلق من تاني وقلت:

– حسن مين يا سليم

وقتها شاور ناحية باب الاوضة المفتوح وقال بهمس:

– حسن ده

بصيت ناحية الباب المفتوح وفوجئت بطفل واقف قدام باب الاوضة، نفس الطفل اللي شوفته قدام المبنى وجبتله أكل يومها، بس مع اختلاف لون العين اللي كانت سودة بالكامل..

شهقت بفزع وحضنت ابني ورجعت لورة من الرعب، وسمعت صوت ابني بيقول:

– متخافيش من حسن يا ماما ده طيب ومش هيأذينا

كنت بشهق وقلبي بيتنفض مكانه، سمعت ابني بيقول:

– هتعرف تساعدنا يا حسن

وقتها بص ناحيتنا بصة جمدت الدم في عروقي ومشي، مشي من المكان كله واختفى، وفضلت طول الليل بترعش ومشغلة قرآن في البيت..

وعدت الليلة عليا صعبة، كنت شبه مشلولة والرعب بينهش في جسمي، بس الغريب ان أول ما الشمس ما طلعت لقيت رقم غريب بيرن..

كان أخو جوزي، وكانت المفاجأة الرهيبة انه بيعتذر وبيطلب مني اجي اخود عقود شقة جوزي وارجع فيها انا وابني وكمان هناخد تمن حصة جوزي في المحل..

ومفيش دقيقة ولقيت مكالمة من مديري بيقولي انهم راجعوا الكاميرات وعرفوا مين اللي عمل فيا الفصل القذر ده في الشغل..

في يوم وليلة كل حاجة اتحسنت كتير، رجعت شقة جوزي وخدت العقود، وقتها قابلت عم سليم اللي مكانش باصص في عنيا حتى، واداني خمسين الف تمن حصة جوزي في المحل اللي باعوه، ورجعت شغلي لقيت نرمين منقولة لفرع تاني بعد جزاء محترم. اتردلي اعتباري بل والكل بقا بيحترمني اكتر واكتر وصرفولي مكافأة كاعتذار منهم ليا..

يومها رجعت طايرة من الفرح، لقيت ابني مستنيني وفرحان، كان عارف اننا هننقل في شقتنا القديمة، وقتها قالي ان حسن كان لازم هيساعدنا ومش هيسبنا، بس بصلي بصة طويلة كعادته وقال:

– بس حسن عاوز مننا طلب أخير يا ماما

جسمي كله قشعر وقلت:

– عايز ايه يا حبيبي

– بيقول ان البيت بتاعه في الزبالة مضايقه، وعايز يروح القبر بتاعه

جسمي اتلبش من كلامه، وفهمت اننا لازم ندخل مقلب الزبالة ده بناء على كلام سليم، ونزلنا بعد المغرب، ومشيت ورا سليم وانا بترعش، شارع فاضي ومبنى مخيف ومكان مهجور ومرعب..

وسليم فضل ماشي فوق الزبالة على خط مستقيم لحد ما وصل لمكان فيه زبالة كتير، وبدأ ينبش لحد ما خرج شوال مقفول..

وزي ما توقعت، جوة الشوال كانت جثة الطفل المسكين حسن، جثة منحورة من عند الرقبة، خرجنا واحنا مرعوبين ورحت بلغت الشرطة، وبلغتهم ان ابني كان بيلعب ولقى الشوال وانا جيت بلغت بدون أي تفاصيل تانية..

وفضلنا يومين في تحقيقات طويلة لحد ما عرفنا ان حسن هو وحيد أمه وكان شغال على توكتوك وبيصرف عليها، واتنين قتلوه وخدوا التوكتوك بتاعه ورموا جثته في المكان ده..

دعتله كتير وزورت امه وادتها ٢٥ الف جنيه مني ليها، وفضلت معاها طول ايام العزاء، كانت ست صابرة، فضلت تدعي ربنا وتستغفر وتقول “كان قلبي حاسس”

“الله يرحمك يا قرة عيني”

وقتها بس اتعلمت درس قاسي اوي، كنت فاكرة ان الدنيا صعبة عليا انا وابني فربنا وراني نموذج لست ابنها نفسه اتقتل وبقت في حال اصعب مني.. فاتعلمت اشكره واصبر مهما كان..

واتعلمت ان الشفقة والرحمة حتى على الحيوان او الجن بتترد، وانك استحالة تعمل الخير وميتردش، لازم هيتردلك سواء شوفته او لا..

وانك تعيش بترحم الناس احسن الف مرة من انك تعيش قاسي، لأن في النهاية انت اللي هتنتصر..

زي مانا انتصرت بفضل الله

على نرمين

واخو جوزي

واتردلي حقي بالكامل بسبب تلت سندويتشات..

“وَلا تَحسَبَنَّ اللَّـهَ غافِلًا عَمّا يَعمَلُ الظّالِمونَ إِنَّما يُؤَخِّرُهُم لِيَومٍ تَشخَصُ فيهِ الأَبصارُ* مُهطِعينَ مُقنِعي رُءوسِهِم لا يَرتَدُّ إِلَيهِم طَرفُهُم وَأَفئِدَتُهُم هواء”

بقلم: أحمد محمود شرقاوي