أخر فرصة لأخر حاجة.. بقلم الشاعر أشرف محمد شلقامي

أخرك تطلع من أخر باب
وتاخد لك لفَّة ف تجاعيد الصورة … الواقفة هناك وحديها ف أخر الحيط
وتشيل برموشك كل تراب الأيام ….
من على برواز متغاظ من طول تحنيط !
لو كان هايطاوع قلب قزاز ….

كان سابه يروح فتافيت
ولولاه كان حَب العُمر اتبعتر
كان داب ف إيدين الوحدة الخيط !!
ممكن تتكلم كام كلمة قوام
ممكن تنده على كل حقايق أوهام !
من حقك تترحَّم على كل مصاطب للذكرى .

من حقك تلمح كل الآتى ف بُكره
وتبوح باسرار مقدرش البير يكتمها
وتقول أشعار مقدرش كتير يفهمها
وتقول كان مين ويَّاك ورماك ف الطَل
وسقاك الشهد بطعم الخَل !
وميزان ف إيديه برضاه اختل
كل اللى ف نفسك قوله

بكل قساوته
بكل هداوته
بكل مرارته
بكل حلاوته
بكل الغُربة ف عرضه وطوله !
بكل اللى ماقدرت كل خيوط الحلم تطوله

براحتك قول ومفيش ممنوع اللمس
وافتح شبابيك وأبواب النفس
قبل ماتخلص كل ثوانى البث !
قبل مايجي الأمر يقولك : بَس
وتلاقي دموعك من غير ماتحس ….

بتسح من البرواز !
وتلاقي قزاز ….
بيطبطب على غُلب الدنيا ف عينك
ويقع من طوله وهات ياعياط !!
الحق روحك …

نفسك ياحزين محتاجة
الحق أخر فرصة لأخر حاجة.
______

كلمات / أشرف محمد شلقامى