إلى حضرة معالى / الحُب.. بقلم الشاعر أشرف محمد شلقامي

تحية طيبة م القلب
مقدمه لمعاليكم …
واحد له عَشم فيكم
***
عليكم أعرض الآتى ….
هات لى الماضى ف الآتى !!!
وخد أحزانى خانقانى
ورجّع لى ابتساماتى
ارجو وابوس اياديكم
***
ياريت معاليك تبحبحها
وأرواحنا تفرَّحها
وتعاقب اللى جَرَّاحها !
وتانى قلوبنا تجمعها
وعنّا الفُرقة تطرحها
أرجوك متقولش : أنا مالى ….
همومكم منّكم فيكم !
***
معاليك بعنيك اديك شايف …
حال الوصف والواصف
لبعض كلنا كاره
من بعض كلنا خايف
طب عشان إيه منش عارف !؟!
معقول الحال دا يرضيكم !؟!
***
معاليك قلوبنا مَبلية …
بأفكار سودة مؤذية
رُش شويَّة حنيِّة
وقول : تانى حبُّوا بعضيكم
***
أرجوك معاليك ياريت تؤمر
حالاً دلوقت وتقرر …
قلوبنا الناشفة دى تخضَّر !
من شهد خمرتك نسكر
ويصبح ملحنا سُكَّر !
بأمر الله ….. وأياديكم
***
ختاماً بدعى لمعاليكم ….
الهى يهنِّى أيامكم
ويسعدها لياليكم
هو الأنس غير منكم !؟
و الدنيا هاتحلى غير بيكم !؟
***
مُقدمه لمعاليكم /
واحد له عَشم فيكم