منسيَّة.. بقلم أمل أمين الخولي

منسيَّة

وأنا ويَّاك ببقى فراشة
كلي نشاط وحيوية
لكن يا خسارة
بتبقى حابسها ف القُمقم
هناك مزوية مرمية

ولمَّا أبكي
تقولي يا غالية
دا إنتِ حكاية ولِقيَّة
يا قمرة منورة حياتي

كفاية عتاب ..
بلاها نواح ..
بقيتي يا نجمة مطفية
طب أعمل إيه
قبل لٌقاك
كنت بسيطة وسعيدة

ودنيتي حلوة ف عنيا
لكن أحلامي ياما بِعدت
وشوفتها صعبة وعفيَّة
أبص هناك على حدودك
ألاقي حلمي طاير ف سماك

لدنيا جديدة وبهيَّة
نسيت الكون وملكوته
وقولت خلاص هكون جنبك
بمليون حلم
ينور ألف سما تانية
ورغم معاك

وصورتي الحلوة أدامك
لكن أعمى مبتشوفهاش
شايف نفسك يا إما بلاش
تحفة راكنها ف المنفى

لا هي ف بالك ولا عارفها
صورة شايلها آه وياك
لكن ف الأصل
منسيَّة
لكن في الأصل منسية