مش بس الطرق الرئيسية.. شوارع القرى الداخلية تستحق الاهتمام.. محمود كمال رضوان يوجه رسالة مهمة لوزيرة التنمية المحلية

كتب عمرو الجندى

في الوقت اللي بنشوف فيه اهتمام بتطوير الطرق الرئيسية ورفع كفاءة الشوارع الكبرى لازم نحط ملف تاني مهم جدا قدام المسؤولين وهو الشوارع الداخلية في القرى والنجوع والأحياء الشعبية لأن المواطن مش بيبدأ يومه من الطريق الرئيسي لكنه بيبدأ من باب بيته والشارع اللي بيمشي فيه كل يوم.
ومن هنا بوجه رسالة لوزيرة التنمية المحلية بضرورة وضع خطة متكاملة تهتم بالشوارع الداخلية بنفس درجة الاهتمام بالطرق الرئيسية لأن التطوير الحقيقي مش بس في الشوارع اللي بيشوفها الجميع لكن كمان في الشوارع اللي بيعيش فيها المواطن وبيعاني من مشكلاتها بشكل يومي.
يا سيادة الوزيرة.. المواطن في القرية من حقه يعيش في شارع نظيف وآمن وممهد ومن حقه يلاقي صرف صحي سليم ومياه منتظمة وإنارة كافية وتصريف لمياه الأمطار وطرق تساعد الأطفال وكبار السن وتسهّل حركة سيارات الإسعاف والخدمات.
والأهم إننا منستناش لحد ما المشكلة تكبر لكن نتحرك بخطط واضحة للصيانة والمتابعة والاستجابة لشكاوى المواطنين مع تحديد أولويات القرى والمناطق الأكثر احتياجا ومحاسبة المقصرين في تنفيذ أعمال التطوير.
أنا مؤمن إن التنمية المحلية الحقيقية مش مجرد رصف طريق أو تجميل ميدان لكنها منظومة متكاملة بتبدأ من الشارع الصغير وبتوصل لكل بيت وبتنعكس على صحة المواطن وراحته وكرامته.
رسالتي لوزيرة التنمية المحلية هي أن تجعلوا الشوارع الداخلية والمرافق الأساسية في قلب خطة التطوير لأن نجاح أي محافظة مش بيتقاس بشكل الطرق الرئيسية بس لكن كمان بمستوى الحياة داخل القرى والأحياء والشوارع البعيدة عن الأنظار.
التنمية مش طريق كبير وبس.. التنمية الحقيقية إن كل مواطن يحس بالتغيير قدام بيته.
محمود كمال رضوان
مستشار قطاع الإعلام والتخطيط الاستراتيجي بالتحالف الوطني لدعم رئيس الجمهورية