#إنقذوا_مريم… دي حكاية مريم

كتبت : نورهان البدري
انجدوها… نفسي ترجعلي كفاية البهدلة إللي شافتها

مريم بنت في تالتة اعدادي عندها 15 سنة
بتحب التصوير و بتشوف الجمال في كل حاجة…نفسها تطلع فوتوجرافر عشان تصور كل إللي بتحبه….

ضحكتها جميلة و بريئة
ماحدش شافها أو عرفها غير و حبها
معروفة بأن كل الاطفال إللي يعرفوها
بيحبوها و يتعلقوا بيها
بس مريم دلوقتي مهددة بأنها تموت في أي لحظة

حكاية مريم إنها اتولدت لأب و أم
شايفين إن ولادهم ملكية ليهم… كأنهم كرسي أو كنبة
من حقهم يضربوهم و يهينوهم و ماينفعش الطفل/الملكية ده يعترض أو يفتح بوقه
من و مريم صغيرة و أبوها و امها بيضربوها زي ما
بيضربوا باقي أخواتها الأربعة إللي أنا منهم… أنا أختها الكبيرة

الضرب كان بيبقي زي ما الظباط بيضربوا المجرمين في الأقسام بالظبط …. أبوها عميد شرطة
ف المشهد أكيد آنتو متخيلينه.. شايف إنه من حقه يضرب أي بني أدم كده!
وسيلة الكلام و العقاب الاولي في البيت الضرب
من أبوها و من أمها… آلأتنين زي بعض

كتير اتكلمت معاهم في إن الاسلوب ده ماينفعش و إن كفاية إللي عملتوه معانا كلنا لحد كده… و انكوا كبرتوا كفاية يعني!
بس للأسف… كل مرة كانوا بيوعدونا أنهم هيتغيروا
و تآني يوم يتكرر الضرب و الإهانة و الشتيمة باقذر الألفاظ

و إللي حصل يوم 12 سبتمبر 2019
إن مريم فاض بيها من الإهانة و الذل و كسرة النفس…
يومها مريم زي أي بنت راحت تطلب مصروف من أبوها… راحت تطلب منه 5 جنيه عشان تفطر
لأنها عندها تآني يوم درس بدري
قالها مافيش مصروف
قالتله أزاي طيب أمال هافطر إزاي أنا هانزل 8 الصبح
قالها هو كده… لسة هاتتكلم راح حدفها بكتاب جنبه في وشها…. صرخت من الوجع راح قايم عليها

جابها من شعرها و فضل يخبط دماغها في الارض
و بعدين حط دماغها تحت رجله و فضل يدوس عليها
و يديها بالشلاليت في كل حتة في جسمها
و هي تصرخ من الوجع و في الاخر بعد مابقتش قادرة تتحرك قالها عشان تبقي تعارضيني

مفكر نفسه إله مش بشر… عشان قالت حاجة مش علي مزاجه…. يديها علقة موت زي دي!!!!!!!!!
و تبقي تستاهلها عادي
لا و كمان أمها كانت موافقة علي ضربها بالبشاعة دي!
ماحاشتوش ولا طبطبت عليها… قالتلها تستاهلي!!!!!

مريم كلمتني بعد العلقة مفطورة من العياط
و بتقولي أنا لا يمكن أعيش معاهم تآني
حاولت اهديها علي قد ما أقدر
كلمت خالها تستنجد بيه قالها أنا في شغل دلوقتي

بعدها أبوها هددها بأنه هايأذي أي حد تفكر تروحله
بس مريم كان فاض بيها… صحيت الفجر لمت هدومها و سابت البيت

فضلت أحاول اتصل بيهم الجمعة و السبت ماحدش بيرد و تليفون مريم مقفول… قولت يمكن عاقبها و خده منها
و كنت عيانة ف ماقدرتش اسافرلها
رد عليا أبوها تالت يوم و قالي بمنتهي البرود انه مايعرفش هي فين!!!!
و ده كان كلام أمها و ستها أم أمها برضو إللي بالمناسبة بتأيد موقفهم

فضلت أدور عليها من يومها و تعبت و اتعلقلي محاليل
و هما ولا هاممهم ولا حد دور عليها
لحد ما لاقيت التليفون بيرن يوم 26 سبتمبر
و لاقيت مريم بترد عليا
طمنتني إنها بخير و جتلي لما عرفت أنا تعبانة عشانها إزاي

خدتها و سافرنا لخالتي في السادات
عشان أشوف هاعمل إيه في مدرستها و دروسها
أول ما أمي عرفت اننا عند خالتي عملت لخالتي محضر تحريض قاصر (صور المحضر في الكومنتات)
و إتصلوا بخالتي قالولها بالنص ((ارميهم في الشارع))
و إلا هانسجنك آنتي و جوزك
و هددوا مريم إنهم هايطلعوها من التعليم خالص
كل ده عشان مريم قالتلهم سيبوني أعد عند خالتي السنادي و ابعتولي مصاريفي علي هناك،..

يوم 3 أكتوبر
البدري بيه راح يسحب ورق مريم من مدرستها و نقلها مدرسة تانية!
لمجرد العند و عشان ياكدلها انه يقدر يخرجها من التعليم لو عايز…. و حاول ياخد مريم بالقوة
مريم عيطت و زقته و اتحامت في أصحابها
ف مشي و روحت أنا علي المدرسة اهدي مريم

و بعد ما مشيت صحاب مريم كلموني إن أمنا هناء هانم
جت و معاها صاحبتها (سماح إصلاح الغمراوي)
و عايزين ياخدوا مريم بالعافية و مريم منهارة
لما روحت ماخلوناش نمشي و أمنا صممت تهزقني و تطلعني كدابة قدام المدرسين و إنها هي و أبوها
ماعملوش لمريم حاجة

و لما جيت اسمعهم تسجيل بصوت هناء هانم
بتقول لمريم فيه امشي من البيت و خلي أختك تستلمك بمحضر…صاحبتها سماح زقتني عشان ما اشغلهوش
و ضربتني هي و أمي…

يومها مشيت من الخناقة و معايا مريم و رجعت القاهرة
و من بعدها نقلت دروس مريم هنا بما إنها تالتة اعدادي و المنهج واحد
نقلتها مدينة الفسطاط الجديدة لأننا كنا ساكنين هناك قبل ما ينقلوا السادات و صحابها القدام كلهم هناك
و مريم الحمد لله ركزت في دراستها الفترة دي
عشان هي الحمد لله مستواها كويس و بتقدر تعتمد علي نفسها و ترتب امورها
مع إني جالي إصابة في الكاحل الأيسر و ماكنتش بتحرك

يوم 29 أكتوبر….. اتسحلت مريم في الشارع 💔
في مدينة الفسطاط المجاورة التانية قدام كل الناس!! استغل البدري بيه موضوع الاصابة لما عرف بيه
لإنه ماكنش يعرف إحنا فين ولا أحوالنا إيه
و بمساعدة واحدة تانية صاحبة أمي إسمها ايمان

راح قال للموظفين في سنتر الدروس
و لكل الناس في الشارع إن مريم هربانة
و الناس كلها تشهد علي إللي حصل
و أول ما الدرس خلص دخل ضرب مريم
و نزلها مسحولة علي وشها من الدور الاول لحد حوالي مسافرة عشرة متر في الشارع
مريم طرحتها اتقلعت و هدومها كانت مرفوعة و جسمها متمرمغ تراب

صحاب مريم لما عرفوا إن في واحدة منقبة بتتكلم عنها برا
و هما في نص الدرس ف كلموني
بعت صاحبتي و جوزي وصلوا لقوا المهزلة دي
و لما حاولوا يدخلوا ضربهم وقعهم علي الارض و هرب بمريم في العربية
المهزلة إللي في شهادات عليها من ناس علي جروب مدينة الفسطاط إن
البنت كانت مسحولة و مهرية ضرب من أبوها و المجرمة إيمان و مش راحمين عياطها و رفضها إنها تمشي معاهم

لحد دلوقتي مريم مع المجرمين دول :
البدري هاشم مصطفي (أبوها)
ضربها بشكل متكرر بوجود شهود كتير
هناء محي محمد مرعي (أمها)
بتضربها من زمان و بتحرض أبوها علي ضربها
محمد محي محمد مرعي (خالها)
في آخر مكالمة مريم قالتلي انه كان بيقول لابوها أنا لو مكانك اقتلها
رضا محي محمد مرعي (خالها)
كلمني يقولي ما كلنا بنضرب عادي و إيه يعني
رنا أسامة محمد (مرات خالها رضا)
بتحرض علي ضربها و مشتركة مع أمها في الجريمة
سماح إصلاح الغمراوي (صاحبة أمها)
سبق و ضربتني و ركبت مع مريم و المجرم أبوها بعد ما خطفها و هددتها معاه و كانوا مسيطرين عليها سوا

مريم موجودة في العنوان ده :
مساكن الشركة الرباعية – المنطقة الثانية عشر – مدينة السادات – عمارة 4b – الدور الرابع – الشقتين إللي في وش السلم

لحد يوم 30 أكتوبر الساعة 4 العصر كانوا بيخلوني
أكلمها اطمن عليها… من بعد كده بطلوا يردوا علي تليفوناتي!
آنا بحمل المذكورة أسمائهم فوق المسؤولية كاملة عن أختي و بستنجد بكل المسؤولين عن حقوق الطفل ينقذوا مريم من إيدين المجرميين دول 💔

بتحريك لجنة لرصد الاصابات الواقعة علي مريم و انقاذها من أيديهم بناءا علي شكوي رقم (1760) إللي عملتها في نجدة الطفل

آسفة لو طولت عليكوا
بس غير الضرب مريم بتتهان و تتشتم و تتذل
كفاية كسرة نفس و قهر بقي… أنا قلبي واجعني عليها💔حكاية مريم لازم تتحكي
محاكمة أبوها و أمها لازم تتم عشان يكونوا غبرة للي زيهم!

منع ضرب الاطفال ضرورى قصوي و محاكمة الأهالي المجرمين إللي مش بيراعوا ادمية ابنائهم
حاجة مفروغ منها

انجدوا أختي أنا عايزة أختي ترجع سليمة
شير و فعلوا الهاشتاجات ببوستات علي العام مش الخاص

#مريم_ضحية_أب_مجرم_و_أم_مجرمة
#البدري_هاشم_مجرم
#هناء_محي_مجرمة
#انقذوا_مريم
#حق_مريم