حاسس بوحدة قتلانى … للشاعر محمد عباس

عايشين فى غابة مش آدميين… وخلاص بقينا ناس تانيين
نمنا فى يوم وصحينا ماشيين … شعور قتلنى وبكانى

فين حب أهلى بتاع زمان …. كان صدق ريحته فى كل مكان
وفى كل حتة تلاقى أمان …. ضاع كله حتى فى أحلامى

حتى حبايبى راحوا بعيد … وبقيت فى سجن كله حديد
مابقتش شايف إيد مع إيد … ويادنيا ضاع فيكى مكانى

نفسى الزمان يرجع بيا …. واشوف حبايبى حواليا
والوحدة ترجع منسية …. ولا حد يرجع ينسانى