زوجة تامر عاشور لن أشعل حربا مع والد ابنتي

مريم عوض

صرحت سمر أبو شقة توضيحا عبر حسابها بموقع إنستقرام قالت فيه: أنا وتامر هنفضل نحترم بعض لأن في بينا عشرة وفي بينا بنتنا أيام اللي هتفضل رابط بينا طول العمر.. واللي أهم ليا أنها أن شاء الله تكبر متلاقيش أي حاجة تضايقها وتلاقي كل هدوء..الموضوع لا ترند ولا شو ولا أي حاجة غير حقيقة وحاجة بتحصل كل يوم بس بيحصل اللي حاصل لما يبقي حد مشهور.وأضافت: إحنا اه منفصلين (مش مطلقين) (ولا اطلقنا).. .ومرينا بمشاكل زي أي ناس طبيعية ..اتفقنا أو اختلفنا بتحصل يعني وبغض النظر عن مين غلط ف حق مين وازاي.. ولكن مهما حصل مفيش حد هيقبل أن يحصل تجريح للتاني ف اللي جاي.وتابعت: أنا رديت على اسئلة الاستورى بعفوية وبطريقتي اللي عمرها ما هتتغير وعاااااادي جدا بس للاسف في مواقع حطت عناوين غلط علشان تشد وتزود التفاعل عندها وخلاص.. وعلي فكرة كلامي كان واضح وبسيط وموجود لحد دلوقتي مشلتوش على بروفايلي هنا.. ومقولتش أي حاجة غير الحقيقة اللي حصلت ببساطة وكان ظاهر منها ٨٠ % أو اكتر من غير أي شرح…ومنعا للمهاترات هي مش حرب مع ابو بنتي ولا عمرها هتكونوواصلت توضيحا لموقفها بقولها: والمفروض اننا نتفق بكل هدوء على الطلاق انه يتم خلال الفترة الجاية… واللي اكيد بعد مايحصل مش هينقص من احترامي ليه أو احترامه ليا وهنفضل أصدقاء تجمعنا “أيام” اللي هتفضل أهم من أي حد وأي حدث..بس نبقي بنتجنب الضغوطات والمشاكل اللي ايا كان سببها موجود أو انتهي بلا رجعة.

واختتمت توضيحها قائلة: اتمني الموضوع يتقفل ومشوفش أي حاجة تضايقني.. واللي بيحبوني دعوة حلوة وشكرا لكل الحب والدعم اللي بشوفه.