عندك حق ياغالية
فرن الخبيز ما بيتاويش إلا الرماد
والنار ما بتحرقش غير إللي ماسكها
وأنا لسة صغير عاد
عندك حق ياغالية
لما قولتي الحب على كبر بلاش
يا واد اتاءل حبتين
هيا عنك ما تستغناش
وكل اللي حبيتهم وصاحبتهوم و ضيعت عمرك علشانهم
فاتوك وحداني
أهم باعوك يابني من تاني
و يا حسره المرادي باعوك ببلاش
عرفت إن الأمان ف حضني
وإن أنا الأساس وكل دول قشاش
حتى إللي حبيتها بإخلاص
لافت على غيرك في ثانيه
ياما قولتي داري شمعتك تقيد
واوعاك تكون موهوم يا واد فيه حب مزيف وتقليد
وفية ف الحب مظاليم كتير
وادي إنت جربت ليك سنين
ما نتاش صغير وجديد
واوعى تامن للدنيا
عندك حق ياغالية
تصدقي كل اللي حبيتهم ما ييجو جمب حبك
ولا حسيت بحنان إلا ف حضنك
ودالوقت اقول إني ندمان ولا غلطان
سيبيني أبكي ودموعي تغرقك زي زمان
ازاي بعد العمر ده لسه مش دريان
قال ولسة عايز أحب تاني لسة ما شبعتش أحزان
أنا عارف إن قلبك مخطوف
ما تخافيش أنا كسرت جوايا الخوف
أنا كبرت يامة مش عليكي
واللي كبرني حمل تقيل من الظروف
نفسي ألاقي حبيبة تاخد بأيدي
تحبني زي ما أنا في ضعفي و ف قوتي
اشوفها في كلامي و سكوتي
تقول بحبك من قلبها
تقولها من غير كسوف
حتى وأنا غضبان
تضمني بحنان
بس منين اجيب أم تانية
هيا أم واحدة ربنا يخليكي ليا
عندك حق ياغالية
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب