فى بداية الحكاية
نمسح دمعة عيونا
وندارى وجع قلوبنا
نرسم ضحكة فخدودنا
ونصلى. عالرسول
…..ونقووووول…….
كان ياما كان
كان فيه إثنين زمان
إتنين إتقابلوا مرة
فى ظروف حزينه.. مرة
قابلوا بعض فى مكان
إثنين الصدفه رسمت بينهم وقت وزمان
كانو فجر جديد لبعض
كان بينهم ألف وعد
إن لو الدنيا قسيت
هيكونوا سند لبعض
حب ..ومن غير شروط
فى الدنيا أمل ..وصوت
صوت للقلوب بتحكى
عن فرحه فى وقت موت
وفى يوم وليله إتقلبت ..بينهم كل الوعود
وفضلوا إتنين فى دنيا ..ظهرت بينهم فروق
فروق فى الفكر خلقت مابينهم أعلى سور
مابين ظروف وعيشة
ومابين قلوب نضيفه
ومابين وقت وفلوس
الدنيا ضيعتهم
وجع القلوب قستهم … ونسيوا كل الوعود
بعد مكانوا حبايب ..
الروح للروح تمايل
بقوا لو الصدفة رسمت بينهم وقت وزمان
بيداروا وجع قلوبهم
بيداروا حنين وشوقهم
بيداروا نظرة عيونهم
لتفضح شوق قلوبهم .
ويشوفوا أيام زمان
يوم ماتقابلوا مرة ..
فى ظروف حزينة مرة
إتنين الصدفة رسمت بينهم وقت وزمان
كانو فجر جديد لبعض
كان بينهم الف وعد
إن لو الدنيا قسيت
هيكونوا سند لبعض
ياريتها بالوعود
والروح للروح تعود
مكانوش داروا وجعهم
ولا داروا عيونهم ..لتفضح شوق قلوبهم
ويشوفوا أيام زمان.
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب