الفواعلية

 بقلم أبوعدنان

أنا لسان حال الفواعلية
أيدي من الشقا محنية
قاعد على رصيف الحياة
ببكي وبدمع و بقول أة
وبدعي ربي في علاة
يسد جوع إللي حولية
وكل يوم بتهان

نفس القعده يوماتي
فاسي وغلجي وخلجاتي

مسطرين و ادة وشاكوش

وناس بتجري حلق حوش

دا مش ماتش كورة ولا حفلة
إنما لقمة العيش

وكل بحساب في الميزان

مستني الدور ييجي عليا

لية يا دنيا بتقطعي فيا

ولا العوزة ف بلدنا بقت عادية
طب فين إللي قالو بكرة أحلا

طب دموع أمي وعيالي
هيا كمان بقت سهله
وفين كرامة الإنسان

وعراك أطفال على لقمة حاف

وف عز الشتا ينامو من غير لحاف

والكوسة بقا سعرها عالي
طب سيبولنا لقمة ناكلها
مش طالبين كفيار و لا حتى خشاف

ولا نيجي ف التلفزيون دي مشكله أزلية
من بداية الكون
تدوس على دموعي وصوابعي
من الحزن مكسورة ضلوعي

والجرح بقا جرحين

هوا إحنا مش بني أدمين
مش ناقص غير تدفنونا بالحيا
وكأن شيء ما كان
بقوم من الفجر طوالي

بسعا على رزق عيالي
ورايا كوم لحم

خلي عندك دم

ولو حتى كلمة حلوة تقولهالي
مش كلنا ولاد تسعه

ولادي كلمة بنضحك بيها على روحنا

بنداري أوجاعنا و جراحنا

وكابوس كل يوم عايشينو

على نفس الرصيف ولسعة شمس

ولفحة برد
غلبنا من العد

يوم يجيب يوم

وأسبوع و را أسبوع

لا الجرح بيطيب ولا نشفت الدموع

والجتة نحست ماعدتش خلاص بتحس

وسكاكين البطن
بقت بركان