الرزق

بقلم أبوعدنان

ما تخافش ع الرزق
إللي خلق الخلق
عالم بيك وبحالك
الرزق مش بس فلوس
ولو بيتك من خوص
مين عالم والخير واقف على بابك
شوف نعمة كتير
ربك عظيم وكبير
أصبر وأمك داعيالك
عندك خمس ولاد
اطلب من رب العباد
يرزقك برزق عيالك
الصحه تاج ع الرؤس
إنت مش منحوس
اتوكل على الله
بكرة تحقق كل آمالك
حتى لو فاضي جيبك
أرضى دايما بنصيبك
نقطه ميه تغير حالك
بيرزق الدود ف بطن الحجر
احمد ربك واشكر
وها ينجيك من المهالك
الدنيا ما بتدومشي على حال
سبحانه مغير الاحوال
وخلي الموت تملي قصادك
الغني ربنا ابتلاة
بلاش تقول اة
هيا كدة الحياة
والوزير زي الغفير
هناك ها يكون جارك
لو حزين وزعلان
فكر يا إنسان
كل يوم بتودع أحبابك
مهما يطول بينا العمر
الموت طعمو مر
وكلة في ميزان حسناتك
ما تستعجبش و تستغرب
النفس ف لحظة بيهرب
والآخرة هيا اللي باقيالك
ما تقولش ازاي وليه
إنت احسن م إللي بتفكر فيه
ولو دامت لغيرك ما كانت دايمالك
طولت عليك شويه
الرزق يحب الخفية
أسعى واتوكل
من غير تواكل
ها تلاقي الدنيا تحت رجليك مرمية
ربنا يبارك فيك و ف عيالك