الشاعر : عمر أحمد
في زحمة الدنيا خطواتنا متبعترة
في زحمة الدنيا قلوبنا متحيرة
كلنا ماشيين
كلنا بنعافر
بنتحدى الصعب
وبنتحدى كمان الأيام
بندور على السعادة
وبنسأل هي بكام
أكيد السعادة مش بفلوس ولا بنفوذ
زي ماهي كدة مش بلوي البوز
كل اللي فينا غني ولا فقير حمله جبل
يمكن بس الإختلاف في شكل الجبل
هنا هنلاقي اللي اتشرد من صغره
وهنا هنلاقي اللي اتعذب من أهله
وهنا اللي ابنه في الوحدة رماه
وهنا اللي تعبه مش قادر يسلاه
وهنا اللي شهادته ديكور في صالون البيت
وهنا اللي مش لاقي حتى تمن الزيت
وهنا اللي فشل في دراسته
وهنا اللي حظه مش بسطه
وهنا اللي مش قادر على وجع الأيام
وهنا اللي مش قادر ينسى أيام زمان
وهنا اللي مش عارف من نفسه يقرب
وهنا اللي كل ما يحس بالسعادة يتكهرب
وهنا في وهنا في وهنا في
حتما في كل حتة في معاناة
بس عارفين إي أحلى حاجة في الزحمة
أننا بنقرب من اللي خلقها وخلقنا
دي أوجاعنا زي مهي قاسية علينا
كتير للخير بترجعنا
وادينا مستنيين النهاية
اللي حتما فيها حياة
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب