أيوه سيبتك
لما فجأة خوفت منك
كنت أبويا وكنت أخويا
كنت صاحبي وكل ناسي
كنت كل الدنيا ليا
كنت عندك بنسي همي
وأرمي قهري وكل غمي
كنت حاسة إني منك
وبإرادتي كنت ملكك
شيء غريب وجديد عليا
وفي يوم وليلة بعتني
جوه الكلام جرحتني
كنت شايفة
بس ساكته
وهان عليك تأسي عليا
إيه يضايقك إني غيرهم
مش لازم أبداً أكون شبههم
فجأة في عينيك بقيت غبية
أو إني قلة مش اللي هيه
وجعتني ودوست عليا
قلت هعتب بالأدب
مش هو ده كلام الكتب؟
لقيت كلام كله عجب
دبش وخبط وغضب
قهرتني وصعب عليا
كان مكانك هو فرحي
كنت عندك أضحك أبكي
أحكي حكاياتي ومصايبي
لا كنت أداري ولا أخبي
كان ضباب مغمي عينيا
كتير في قلبي كلام يخصك
حلو بعضه ومُر منك
لا عارفه أنسي جبروت قساوتك
ولا قادرة أنسي طيبة قلبك
محتارة فيك صعب القضية
كل ما أقرب يبعدني كبرك
لكن في بعدي برضه جنبك
عمري ما هكون إلا سندك
ولا يوم أخون عهدك وودك
عمري ماعرفت الأذية
لكني سيبتك
خوفت منك
طبعك شديد جداً عليا
وأي واحده في الدنيا ديا
صدقني
تنول رضاها بالحنية
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب