كان ياما كان ياسادة ياكرام ولا يحلى الكلام إلا بذكر النبي عليه الصلاة والسلام
كان في زمان اتنين اخوات حلوين خالص وبيسمعوا الكلام اسمهم أحمد ومالك كل يوم بعد المدرسة يصلوا ويكتبوا واجباتهم ويتغدوا ويطلبوا من ماما انهم يلعبوا مع بعض شوية.
وأول ما الأم توافق يبدأ الخناااااق
مامااااا احمد ضربني مامااااا مالك أخد لعبتي وماما كل شوية تصالح بينهم وتفهمهم انهم المفروض بيلعبوا علشان يستمتعوا مش علشان يزعلوا ويزعلو ماما كمان منهم ، وبعد شوية كمان رجعوا اتخانقوا تااااني، لكن المرة دي ماما مرضيتش تتدخل نهاااائي.
والاولاد بيتخانقوا وصوتهم علي يامامااااا احمد ضربني يامامااا مالك اخد لعبتي وماما ساكتة خالص لكن بتتابع ان الخناق من غير أي ايذاء لا بالكلام ولا بالأيد. بعد شوية من خناقة الولاد على اللعب سكتوا وبدأوا يلعبوا مع بعض العاب كتير بهدوء.
بعد ماخلصوا لعب ماما حضنتهم جامد وشكرتهم انهم قدروا يكونوا مسئولين ويحلوا مشكلتهم مع بعض بدون ما أي طرف يهين أخوه، حبايب ماما الحلوين.
تاني يوم بعد المدرسة والواجبات الحلوين الصغننين بيتفرجوا علي التليفزيون وهنا بدأت خنااااقة جديدة
أحمد انا عايز اتفرج على الكارتون بتاعي
مالك لاااا انا اللي هتفرج الاول
وبدأت خناقة وصوتهم علي.
هنا ماما قررت تدخل بأنها أخدت ريموت التليفزيون وقالت: رأيي كل واحد فيكم يتفرج عاللي هو عايزه لمدة ربع ساعة وليكم القرار مين اللي يبدأ الأول وانسحبت.
بعد شوية ماما الجميلة عرفت ان الأخين الحلوين اتفقوا وانتهت الخناقة بتعاون الأخين ومساعدة كل واحد فيهم للتاني انه يتفرج علي الشئ اللي بيحبه.
وفرحت ماما بيهم وقررت تاخدهم ويخرجوا يتفسحوا ويلعبوا شويه.
وهنا كمااااان بدأت خناقة جديدة ومختلفة.
ماما: ياللا ادخلوا البسوا علشان نخرج.
الولاد الحلوين جريوا علي الغرفة علشان يلبسوا وبدأت المشكلة!!!!
أحمد: انا اللي دخلت الأول يبقى انا اللي هلبس الأول.
مالك: لااااا. يامامااااااا انا اللي جيت الأول يبقى انا اللي هلبس الأول.
ماما جت بسرعة علشان تحل المشكلة وقالت.
أحمد ادخل غرفتك الخاصة جهز نفسك فيها.
مالك من فضلك أدخل انت كمان غرفتك جهز نفسك فيها وبعد ماخلصوا لبس.
وهما خارجين ماما قالتلهم ممكن اسألكم سؤال؟
الولاد فالوا: اتفضلي ياماما.
ماما قالت: ليه كل شوية تتخانقوا مع بعض؟
رد أحمد وقال أنا بحب مالك لكن هو اللي بيبدأ الأول.
رد مالك بسرعة وقال: لا ياماما أحمد اللي بيبدأ الأول.
ردت ماما وقالت: أنتم عارفين العلاقة اللي بينكم تعتبر أجمل علاقة ربنا خلقها.
ربنا سبحانه وتعالى جعل علاقة الأخوة علشان ندعم بعض ونساعد بعض، تعرفوا ان ربنا سبحانه وتعالى قال في علاقة الاخوات آية في القرآن .
بسم الله الرحمن الرحيم
سنشد عضدك بأخيك
صدق الله العظيم
يعني ربنا سبحانه وتعالى بيقول ان كل واحد فينا عنده أخ هيقويه ويسنده. أنا عارفة ان الخناق بينكم مش هينتهي.
لكن ممكن نتفق مع بعض ان احنا نتعلم نحل مشاكلنا مع بعض؟
رد مالك وقال: ياماما أنا فعلا بحب احمد جدا وعارف انه بيحبني كمان لكن أنا وهو بنكون عايزبن نفس اللعبة في نفس الوقت وعلشان أنا صغير فلازم هو يخليني العب بيها الاول شوية وبعدين هو، وهنا بسرعة احمد رد وقال: ليه يعني ماهو انت بردو المفروض تخليني العب انا الأول وانت تاخدها بعدي.
وماما هنا قالت: كفاااية، انا لسة بتكلم وزي مااتفقت معاكم خناقات اللعب انا مش هتدخل فيها ولازم تتعودوا تحلوها لوحدكم أفضل.
وافقوا الاتنين الاخوات الحلوين وبعد ماخلصوا فسحتهم رجعوا البيت ورجعت خناقاتهم ورجعت كلمة مامااااااا أخويا ضربني.
لكن ماما صممت تنفذ كلامها ومتدخلش الا لو شعرت ان هيحصل ايذاء لفظي أو بدني. وتوتة توتة خلصت الحدوتة
أصل خناقات الأخوات لم ولن تنتهي وهذا وعدي لكم لكن الحدوتة فيها طريقة بسيطة سلوكية اتمنى تساعدكم وتساعدني معكم…..
More Stories
استجابة رسمية.. هيئة الدواء المصرية تتحرك بعد ما أثارته الإعلامية الدكتورة هبة يوسف
إستراتيجية إدارة المورد البشري واستدامته: هندسة الملاكات الوظيفية وربط الاحتياجات بالخطة الاستراتيجية العامة
حين يكتب النفاق قصائده