وأنا وياك
بلاقي الصعب بقا ممكن
ومش جايز …
وأحس معاك
خلاص مستكفي
مش عايز …
وفي وجودك
بكون كامل
ومش عاجز …
وبين ايدك
أنا صغير وبتدلع
وعقلي يتوه
بعيد عني
ويتجاوز …
وليه هحتاجه وأنا وياك
ماعقلك عندي يكفيني
وعمري معاك أنا ما أخسر
تمللي بكون أنا الفايز …
وأنا في حضنك تدفيني
تطمني تريحني
وتقتل فيا كل مخاوفي
وأياً كان فيها هواجس …
بحس كمان كده الدنيا
مراضياني وتصرفلي
عشان حبك
أرباح منها وحوافز …
وأشوف بعينيك
ماهو انت يا قلبي
نور عيني
فخليني كده وياك
أعيش العمر كله معاك
وهمشي خلاص أنا في ضلك
تمللي وراك
انا بيك أنت بس بكون
يا كل الكون
ولو عاد الزمن بيا
هقول عاوزك وبتمناك
خلاص اخترت انا طريقي
ومتأكد أوي منه
ومفيش جايز …
لأ … ده أكيد
إني إليك
وبيك ومعاك
وبس أنت
وغيرك والله
ما هيلزمني ولا عايز …
أمل أمين
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب