أحمد محمود شرقاوي
………….
الضريح، هو أول كلمة نطقتها في حياتي، وأخر كلمة كنت بصرخ بيها وانا واقعة بين تلت وحوش بشرية بيحاولوا يمسكوني بكل قوتهم عشان الحارس ينتهك حرمة جسمي، عشان اكون مخلصة للضريح وللشيخ مأمون..
عندنا في بلدنا ضريح ضخم في قلب المقابر، اتقال انه ضريح او مقام لولي من أولياء الله الصالحين اسمه الشيخ مأمون، ولو حبيت في يوم تعرف مين الشيخ مأمون ده أو ليه بقا ولي من أولياء الله هتسمع ألف رواية ورواية..
اللي هيقول ان هو السكير اللي دعم الأمام أحمد بن حنبل في محنته، وتاب بعدها وبقا من أهل الصلاح والتقوى..
واللي هيقول انه كان من أهل الخطوة وكان بيدي العلم في خمس بلاد كل يوم..
واللي هيقول انه الجد العاشر للمهدي المنتظر..
واللي هيقول انه كان بيدخل النار ويطلع منها سليم..
كلام وحكايات كتيرة جدا، بس الواقع كان بيقول انك مينفعش تذكر مقام الشيخ بأي سوء إطلاقا، لأن بقا شيء مقدس زيه زي الدين، واللي يغلط في المقام كأنه كفر بالله ويقع عليه السخط واللوم والعتاب ويمكن الضرب..
المقام اللي بقا بتقدم قدامه النذور والدبايح والقرابين عشان تتقضي حاجات الناس، بقت المقابر عبارة عن سوق، ناس كتير رايحة وجاية عشان تزور المقام وتقدم قدامه القرابين، حتى المتسولين بقوا بيجوا بالنهار قدام الضريح عشان ياكلوا. يشريوا، وكل ده كان تحت عين حسان خادم الضريح..
كانت الناس بتعامله كأنه نبي، لأنه كان معاه مفتاح الضريح، يقدر يخليك تدخل جوة، وتقرب من الشيخ مأمون كمان وتدعي قدامه، وطبعا الدعوة في قاموسهم جوة الضريح مقبولة..
وكانت الستات هما الضيوف الأكتر للمقام، لدرجة ان اللي كانت تتجرح بسكينة المطبخ جرح بسيط كانت تجري على المقام تدعي وتقدم نذور عشان الشيخ يرفع عنها الحسد والأذى من حياتها..
واتجوزت انا، وفضلت لمدة سنة كاملة مفيش أي حمل، وده في قاموسنا أمر مريب، مريب لدرجة ان كل الناس هتستبيح حياتك بشتى السُبل بحجة المساعدة..
وكل المساعدات هتكون نصايح عشان أزور بديعة مرات حسان، وهسمع ألف حكاية ورواية عن فلانة وفلانة اللي كانوا مبيخلفوش من سنين طويلة وأول ما زاروا بديعة خلفوا..
لحد ما وصل الموضوع للمعايرة من حماتي وأخت جوزي، كانوا بيقولوا اني أرض بور مش هتطرح ابدا، بل وبدأت حماتي تمهد عشان حوزي يتجوز عليا، ولقيت نفسي مضطرة وبنساق ناحية سكة بديعة..
وكانت الزيارة، خرجت يومها بعد العصر وروحت على بيت بديعة، خبطت على الباب وفتحتلي، كانت شبيهة بالستات بتوع الغجر، عنيها متكحلة بكحل أزرق غامق ولابسة حلق واسع وايديها معمولة بالحِنة وشعرها كله ضفاير ملون..
سلمت عليها ودخلت بيتها، قعدت في الصالة على كرسي خشب ومسكت هي كف ايدي بصت فيه بتمعن وبعدها قالتلي احكي، خدت نفسي بصعوبة وبدأت اتكلم:
– متجوزة بقالي سنة ومفيش أي حمل خالص
بصتلي بصة غريبة وقالت:
– امتا اخر مرة نذرتي للشيخ مأمون
جسمي اترعش ومعرفتش أرد اقول ايه عشان تزعق فيا وتقول:
– ما تردي يا بت
– بصراحة عمري ما نذرت قدام المقام
اتحولت نظراتها للغضب وقالت:
– عشان كدا هتفضلي مغضوب عليكي كدا
– والحل يا ست بديعة
– تروحي المقام وتقدمي حاجة نفيسة يمكن تنولي الرضا
– ححاضر يا ستنا ححااضرر
في اللحظة دي خرج الشيخ حسان من الاوضة وكان لابس الجلبية البيضا والشال الاسود ورايح للضريح، قمت اتنفضت من مكاني وبصيت للأرض برهبة، بصلي شوية وقال:
– ايه علتها
ردت مراته وقالت:
– أرض بور لا بتعطي ولا بتاخد
طلب مني ابصله وفضل يتأملني شوية، شوفت في عنيه نظرة غريبة جدا، في النهاية قال:
– مفيش حل غير زيارة المقام من جوة، تجيلي بكرة المقام بعد العشاء لوحدك وانا هدخلك المقام تطلبي الرضا
ابتسمت بفرحة كبيرة وقولت:
– تسلم وتعيش يا شيخ حسان تسلم
ورجعت بيتي وانا طايرة من الفرح، عارفة ان اللي بيدخل المقام بيخرج منه مجبور الخاطر ببركة الشيخ مأمون، وببركة الشيخ حسان حارس المقام، نمت ليلتها وانا في حلم جميل، بتخيل اليوم اللي هتعب فيه وهعرف اني حامل، وبتخيل اليوم اللي هخلف فيه الولد وهرد على كل واحدة اتكلمت في حقي، انا لسة في عز شبابي، أنا مش أرض بور..
تاني يوم بعد العشاء قولت لجوزي اني هروح أزور أمي عشان تعبانة وممكن ابات معاها، وخرجت من البيت بسرعة ناحية المقابر، كان الجو برد اوي، والبلد عاملة زي أرض الأموات، حتى القطط والكلاب مفيش ليهم أي أثر..
وصلت لشارع المقابر وانا متخفية ودخلت بسرعة لقلب المقابر، كنت بترعش من البرد والخوف، المقابر كان واقفة تحت ضوء القمر زي الجبابرة، واقفة للبرد بكل جبروت، حاسة ان ليها عيون بتبص عليا بغضب وبتقول مين دي اللي جاية تنتهك عالمنا..
مشيت بين المقابر لحد ما وصلت للضريح، الغريب اني لقيت المكان فاضي خالص، شيء مريب جدا، الضريح ده بتفضل الناس عنده لحد الساعة ١٢ بالليل، والساعة دلوقتي لسة تمانية بالليل..
وقفت قدام الضريح اتأمله برهبة، ضريح ضخم منقوش عليه حروف كتير باللغة العربية عشان تكون كلمات مش مفهومة، بصيت حوليا وحسيت بهدوء ووحشة المقابر، مش عارفة ليه افتكرت اني هبقا هنا في يوم من الايام..
نايمة مع الأموات، مش عارفة يومها هبقا في الجنة ولا في النار، في اللحظة دي سمعت صوت احتكاك غريب بالأرض، جسمي كله اتنفض مكانه، الصوت كان جاي من قبر قدامي، قربت بحذر ناحية القبر وانا بقدم رجل وبأخر رجل..
في النهاية وصلت للقبر، كان مفتوح، وكان فيه صوت جاي من جوة، وقفت في الضلمة أحاول أعرف ايه مصدر الصوت ده، قلبي كان بيدق بعنف وجسمي عمال يترعش، في اللحظة دي ظهر راجل قدامي، كان لابس جلبية سودة وكان طالع من القبر..
أول ما طلع لقاني في وشه، كان شكله عادي بس كان لابس عمة ضخمة اوي على دماغه، بصتله بخوف ومبقتش قادرة أنطق، وفي لحظة لقيته صرخ، صرخ بصوت مخيف وقال:
– جاية تعملي ايه هنا يا ملعونة
مسافة ما صرخ وقعت في الأرض، الدنيا دارت بيا ومبقتش قادرة اتحرك، قمت من مكاني وانا بتنفض لقيته لسة واقف، وصرخ من جديد وقال:
– غوري من المكان ده خالص
وقتها صرخت، قمت مكاني وجريت زي السكرانة، مبقتش قادرة أحدد أي اتجاه اطلاقا، جريت وجريت لحد ما خبطت في راجل تاني ووقعت قدامه، وقتها صرخت، صرخت صرخة رهيبة، لقيته بيهديني وبيحاول يتكلم معايا، قالي:
– مالك خايفة ليه كدا
فضلت اتنفس بالعافية وانهج زي اللي كان في سباق الموت، في النهاية اتكلمت وقلت:
– انا جاية للشيخ حسان
– طيب تعالي معايا هو مستنيكي
مشيت معاه وانا بحاول اتمالك نفسي بالعافية، فكرت في اللي شوفته من شوية والتحذير اللي سمعته، يمكن دي رسالة عشان أهرب من المكان، بس مكنتش قادرة أقاوم لازم أدخل الضريح وادعي قدام المقام..
في اللحظة دي وصلنا للضريح، لقيت اتنين رجالة كمان واقفين، واحد منهم سألني:
– انتي نعمة
رديت عليه باستغراب وقولت:
– ايوة انا
– الشيخ جاي دلوقتي استنيه
مفيش دقايق وجه الشيخ حسان، سلم عليا وسألته عن الناس، رد وقال انه صرف الكل الليلة عشان أعرف اتبرك ببركة المقام لوحدي، فرحت اكتر واكتر، فتح باب الضريح وشاورلي عشان ادخل، دخلت بسرعة ومسافة ما لمحت المقام جريت عليه وفضلت اتمسح فيه بجسمي، كنت بتبرك بيه..
وقفت ادعي قدامه واطلب اني احمل بأي طريقة، ووسط اندماجي بالدعاء حسيت بحد واقف ورايا، كان الشيخ حسان، الغريب ان ايديه اتحطت على ضهري بطريقة غريبة..
جسمي كله قشعر ومبقتش قادرة اقوله ينزل ايده، بعدت جسمي عنه بس كان مُصر يحط ايده على جسمي، في النهاية وانا بترعش حطيت ايدي على ايده ونزلتها عني..
ومشيت بسرعة ناحية الباب وانا بقول:
– شكرا يا شيخ
في اللحظة دي لقيت واحد من التلت رجالة سادد عليا الباب بجسمه، طلبت منه بصوت مضطرب يعديني بس ابتسم ابتسامة خبيثة، في اللحظة دي اتكلم الشيخ وقال:
– لسة مخدتيش البركة عشان تحملي، تعالي عشان تاخدي البركة
ولقيته بيقرب مني وفي عنيه نظرة شهوانية غريبة، اتنفضت مكاني، وحسيت برعب رهيب، وبكل قوتي زقيته لورا وانا بهددهم بالصراخ، في اللحظة دي طلع واحد منهم مطواة وقال:
– لو قاومتي الشيخ هدبحك هنا ومحدش هيسمع عنك حاجة
جسمي اتنفض اكتر واكتر، حسيت برعب رهيب، رعب مكنتش هحسه لو كان طلعلي شيطان من الجن، بس انا حاليا وسط شياطين الإنس، اللي بيخوفوا اكتر من الجن..
بكيت من الخوف وقلت:
– ازاي هتعمل كدا فيا والشيخ مأمون مدفون في الضريح، حرام
لقيته ضحك ضحكة عالية، ضحكة خلتني أفهم، أفهم ان الشيخ مأمون دي كذبة كبيرة، كذبة عملها جد حسان، بنى المقام ووهم الناس ان مدفون فيه ولي من أولياء الصالحين، وورث الشغلانة دي ابنه، ومنها ورثها حسان، عرفت انهم بياخدوا النذور لنفسهم، عرفت ان كل ده وهم كبير..
في اللحظة دي مسكوني التلاتة زي الوحوش عشان حسان ينتهك حرمة جسمي، هددتهم وانا ببكي اني هفضحهم، قالولي بسخرية ان كل واحدة جت هنا قبلي هددتهم ومقدرتش تقول نص كلمة، مين دي اللي هتفضح نفسها او تجرؤ تقول كلمة على الشيخ حسان..
وقتها عرفت حجم الجُرم اللي ارتكبته في حق نفسي، وازاي عصيت ربنا معصية كبيرة، ربنا اللي افتكرته دلوقتي بس، كان نفسي اقولكم اني هربت، ان حد نجدني، كان نفسي اقول اني قاومتهم وهربت..
بس للأسف الواقع مكنش رحيم بيا للدرجة دي، حسان انتهك جسمي كله، وصوروني عشان بس لو فتحت بقي يفضخوني ويقولوا اني جيت بمزاجي، وفي ظلمة المقابر كنت بغطي جسمي وخارجة ببكي بهيستريا، قعدت بين مقبرتين أبكي بكل قهر الدنيا..
يمكن الأموات يشفقوا عليا بسبب دموعي، لأن الأحياء معملوش كدا، فضلت ساعات أبكي لحد ما دموعي خلصت، في النهاية رجعت، رجعت لجوزي وطلبت الطلاق، خلاص كل حاجة في حياتي ادمرت، روحي نفسها اتحرقت من جوة..
عرفت ان ستات كتير في البلد دنس جسمهم حسان وعايشين في بيوتهم ساكتين، بل واجوازهم لسة بيروحوا بيهم زيارات للشيخ والضريح، عرفت ان الجهل وطريق الشرك بالله هو هلاك مبين..
هلاك بيخسرك جسمك ودينك وعرضك وفلوسك، فضلت شهور بتعذب، بتعذب وبحلم بكوابيس رهيبة، في النهاية بعد توبة نصوحة بعت حكايتي لشخصية شهيرة عشان تكتب عن الحادثة بتاعتي، وبما ان ستات كتير حصلهم كدا فحسان مش هيعرف مين اللي اتكلمت، طلبت من الكاتب يكتب عني ويوصل مأساتي للناس، يعرفهم ان كل ده شرك بالله، وان طلب العون والمدد بيبقا من ربنا سبحانه وتعالى بدون أي وسيط بينك وبينه، وان كل اللي على شاكلة حسان نصابين، متحرشين ومعدومي الضمير والانسانية، وان اللي بيتجاهل التحذيرات اللي بتجيله بيقع في كوارث، زي ما تجاهلت انا رسالة الراجل الغريب اللي خرج من القبر، شكرا يا أستاذ أحمد..
بقلم: أحمد محمود شرقاوي
……..
“من استعان بغير الله فقد أشرك بالله”
الاستعانة وطلب المدد والعون، والدعاء والذبح والصلاة كلها أمور تكون لله وحده سبحانه وتعالى، أي أمر غير ذلك هو شرك بالله..
بقلم: أحمد محمود شرقاوي
……….
ترقبوا أعمالي بمعرض القاهرة الدولي للكتاب ٢٠٢٢ ضمن اصدارات دار ببلومانيا للنشر والتوزيع..
رواية “إني رأيت”
سلسلة مائدة الفزع العدد الثالث “لعلهم يرجعون”
More Stories
دسوق تستعد لإستقبال الملايين غدًا .. قصة القطب الصوفي إبراهيم الدسوقي
“عبور 360”.. عينُك الشاملة على نبض مدينة العبور وخدماتها
انطلاق برنامج تأهيلي وتدريبي لموظفي هيأة التأمين الطبي