ده اللي كل الناس بتهمس بيه في منطقة الحسين، وكأنهم شافوا وسمعوا كل الأحداث الرهيبة اللي مرت في حياة زغلول البركة، وكأنهم شافوا بعنيهم التجسد الكامل لفتاة من فتيات الجن..
كان بيلف زي المجانين حولين مسجد الحسين، عمال يشتم ويضرب في أي حد بيقرب منه، كل اللي كان بيردده هما كلمتين
“كلكم ملعونين”
“كلكم ملعونين”
وقتها كنت واقف بشتري خاتم من بائع متجول، لفت نظري اللي بيعمله الشخص المجذوب ده، وبكل تلقائية ابتسمت في وجه البائع وسألته:
– هو مين اللي عمال يزعق ده
– ده زغلول البركة يا أستاذ
– وماله بقا عمال يضرب في الناس ليه
– يعني عقله خفيف شوية
– ربنا يهديه ويهدينا
اشتريت الخاتم ولفيت شوية في شارع المُعز وخان الخليلي وبعدها سمعت آذان العصر فقررت أروح أصلي في الحسين، اتوضيت ودخلت المسجد صليت ركعتين واستنيت الإقامة، وطبعا لفت نظري الناس اللي داخلة طالعة للمقام اللي جوة، حسيت بحزن شديد وانا بتفرج عليهم، معنديش مقدرة أدخل أشوف المناظر الشركية جوة..
اللي هيتمسح في المقام طلبا للبركة، واللي جاية تدعي قدام مقام الحسين وتتوسل له عشان يشفع لها عند ربها، شرك بالله وجهل كبير، وقامت الصلاة في النهاية..
صليت معاهم جماعة ووانا بسلم فوجئت بزغلول هو اللي بيصلي جمبي، بصراحة حسيت برهبة وإثارة غريبة، خاصة انه لاحظ نظراتي ليه وبصلي في عنيا بقوة، عنين واحد ميت، مطفية ومتشوفش منها أي حاجة، وشه مشقق وشعره طويل اوي، سواء شعر دقنه أو شعر راسه..
لقيته اتكلم بصوت حاد وقال:
– حلو الخاتم اللي انت اشتريته
جسمي قشعر اكتر، خاصة انه استحالة يكون شافني وانا بشتري الخاتم، غير اني مش لابسه أصلا، انا شايله في جيبي، مسكت نفسي قدامه وقولتله:
– ما تيجي نقعد مع بعض شوية على أي قهوة برة
لقيته ابتسم وقال:
– عايز تعرف حكاية زغلول البركة صح
– مش هكذب عليه لأني فعلا عايز أعرف
– بس مش هتصدقني
– جربني، أنا بالأخص ممكن أصدق أي حاجة
لقيته بص حوليه بصة مخيفة وقرب من وداني خلى جسمي قشعر اوي وقال:
– بس هتعزمني على حمص
– عنيا الاتنين
– وتزود الشطة
– أكيييد
واقترح عليا نروح نقعد في ساحة الجامع الأزهر مع بعض وهيحكيلي كل حاجة بالتفصيل، وفعلا بعد ربع ساعة كنا اشترينا الحمص وقاعدين في ساحة الأزهر، وبدأت حكاية من حكايات الأساطير..
بقلم: أحمد محمود شرقاوي
………….
انا اسمي زغلول عباس زغلول، عندي ٣٣ سنة، عايش هنا في الحسين من زمن طويل اوي، بل وكنت كل شهر بطلع أكل كتير للناس الغلابة في الحي، لحد ما اشتغلت مع جمعية كل شغلها انها بتطلع أكل للناس الفقراء والمساكين هنا في الحسين، وواحدة واحدة بقيت مشهور في المنطقة، أي حد عايز حاجة بجبهاله..
حد جعان بجبله أكل..
حد مزنوق في فلوس بتأكد انه محتاج وبجبله..
حد جاي يدرس في الأزهر وعايز سكن بجبله..
حد متعثر في كتاب معين بجبله..
واستمر الحال معايا سنين لحد ما في يوم كنت قاعد في المُعز على قهوة هناك وفوجئت بواحد صاحبي ومعاه شاب غريب عن المكان، كنت متوقع انه عايز سكن، أو مسكين محتاج أكل أو فلوس، بس فوجئت بالشاب بيسألني عن كتاب مش عارف يوصل له..
سألته عن إسم الكتاب قالي:
– المغمور والطائر العصفور والهدهد المنظور
استغربت من إسم الكتاب شوية وإن كنت مركزتش، أمر طبيعي لإن هنا فيه سماسرة كتب كتير، وناس بتيجي من كل مكان تطلب كتب بعينها، سألته عن مقدرته في الفلوس قالي ان معاه لحد عشر آلاف جنيه، جسمي اتنفض من الرقم، مجنون مين ده اللي يدفع رقم زي ده الا لو
الا لو كان كتاب سحر..
ايا كان، مليش دعوة انا هجيب الكتاب وهاخد عمولتي وخلاص، خدت رقمه وقولتله هتواصل معاك بعد اسبوع،. بدأت رحلة البحث، اتصلت بعشرة معرفة في سور الأزبكية محدش منهم افادني بحاجة، نزلت السور نفسه وبحثت بنفسي مفيش، سألت عتاولة البيع في العتبة مفيش..
لحد ما كنت قربت ايأس خالص، فين وفين لما حد كلمني وقالي ان الكتاب موجود وسعره تمن الاف جنيه، نزلت يومها والمطر زي السيل اجري ناحية سور الأزبكية، لقيت الكتاب محطوط في شنطة قماش..
كلمت البايع اني هقبض من الزبون واحاسبه، وبما اني ثقة فمفيش مشكلة، واتصلت بسرعة بالشاب، بس فوجئت بيه بيقولي انه سافر وراجع بعد إسبوع، حسيت بإحباط شديد، بس قولت هفضل أساير البايع لحد ما الشاب يرجع من السفر..
وخدني الفضول أشوف الكتاب اللي سعره ٨ الاف ده، اهو نفهم الناس دي بتدفع الأرقام دي كلها ليه، لقيته كتاب ليه غلاف من الجلد السميك ومكتوب عليه بالعربي بخط منقوش
“المغمور والطائر العصفور والهدهد المنظور”
فتحته لقيته متقسم تلت أجزاء،
أول جزء اسمه المغمور
والتاني اسمه الطائر العصفور
والتالت اسمه الهدهد المنظور
فكرت أسيبه وانام بس مقدرتش، قولت أكمل وافهم بس، الجزء الأول كان بيتكلم عن فكرة النجاح، المغمور ده هو انت، ولو عايز تنجح هتستخدم طاقات الحروف والأرقام..
وكان فيه طرق كتير اوي عشان تاخد طاقة الحروف والأرقام دي
اللي هو ممكن تكتب حرف معين عدد مرات معين على قميصك، أو تكتب تسلسل حروف معين في ليلة ١٤ على ورقة وتحط الورقة في جيبك لمدة شهر كامل، كلام ساذج معجبنيش..
دخلت على الجزء التاني الطائر العصفور
لقيته بيتكلم عن الاستعانة بالقرين، واللي بيتشكل في الصور على هيئة عصفور جميل الشكل، وانه يقدر يطير لأي مكان في الدنيا عشانك ويجبلك اللي بتتمناه، ويمكن يتحول لصقر ويقتل أي عدو ليك، وكانت فيه طرق كتيرة اوي لتحضير القرين وطلب المعونة منه..
جسمي كله قشعر بصراحة، ولقيت نفسي بهرب من الفصل ده، ولقيت الجزء الأخير واللي كان بعنوان “الهدهد المنظور”
والكتاب هنا تحول لصيغة الحديث على لسان انثى، يعني واحدة بتكتب لك على أساس انك الهدهد بتاعها اللي نفسها تحميك من أي نظرات من البشر، وانك لو اديتها الفرصة هتتزوجك وتحقق لك كل أحلامك وطموحاتك..
قلبي وقتها دق بعنف شديد، خاصة لما قرأت الكلام ده
” يا هدهد البشر، ألا تشتاق لحورية من بلاد القمر، عيناها كقطعتي من اللؤلؤ، وجسدها كجسد من المرمر، ومعها من المال ما يجعلك سيدا، ومعها تاج المُلك والسلطان، أنا هيرا يا زغلول”
زغلول ؟؟!
هو الكتاب يقصدني انا ولا دي هلاوس، ولا دي صدفة غريبة من نوعها، ببص في الصفحة التانية لقيت طرق تحضير هيرا بنت الجن..
أنا حرفيا قعدت ساعتين عرقان رغم البرد وقلبي بيدق، كأني هموت من الاثارة والخوف مع بعض، مبقتش عارف أنا هعمل ايه، بس غصب عني في النهاية نفذت المطلوب، نفذته بكل حذافيره..
شوية حاجات من العطار وحروف معينة، وكام كلمة بترددها وتنتهي دايما باسم “هيرا”
يومها نور الشقة كل قطع، كنت عريان وواقف في الحمام، مانت لازم تعرف ان المطلوب كان حاجات غريبة شوية، يومها سمعت صوتها لأول مرة في حياتي، صوتها عامل زي الفحيح، لما بتتكلم بتخلي ودانك تصفر..
يومها وسط الضلمة والبرد حسيت بلمستها اللي جمدت الدم في عروقي، وشوفتها وسط الضلمة..
شوفت واحدة جسمها كله مولع بالنار، شعرها طويل وليها عين سودة وعين بيضا، عندها أنياب وقرون مولعة بالنار، ومن ليلتها وانا بشوف الجحيم على الأرض..
في البداية كانت بتظهرلي كتير اوي، في كل مكان تقريبا، حتى في نومي كنت بشوفها، وبعدها واحدة واحدة بقت بتيجي تنام جمبي على سريري، كنت بتشنج، بقع في نوبات صرع، بس محدش قدر يساعدني أبدا، وهي أقسمت انها مش هتسبني أبدا غير لما تتجوزني..
وفي ليلة جتلي واستسلمت ليها، استسلمت من رعبي وخوفي وجسمي اللي بقا زي لوح التلج، يومها شوفت في نومي ثور ضخم جاي بيديني ورقة وخلاني أبصم عليها بالدم، كان ده عهد جوازي بهيرا، وللأسف ادتني موهبة رهيبة، موهبة مخيفة..
انا بقيت اقدر أشوف كل مساوئ البشر، كل حاجة قبيحة مخبينها بقدر أشوفها، مجرد ما ابص في عنيك بعرف انك مخبي ايه، كل الذنوب اللي عملتها في حياتك، بشوف السارق والزاني والقاتل، بقيت يشوف كل الناس موصومة بالذنوب، بقيت بشوف الكل ملعون..
لحظتها بص في عنيا بقوة وقالي بصوت مخيف:
– انت ملعون
ولقيته بدأ يتحول وبيقرب مني وهو بيزوم، بعدت عنه بسرعة وانا قلبي عمال يدق بعنف، مبقتش عارف ده مجنون ولا فعلا كل اللي حكاه ده حقيقي، كان عندي فضول شديد أعرف هل فيه كتاب بالإسم ده، وهل زغلول ده حقيقي متجوز جنية، في اللحظة دي لقيت راجل ملتحي في المسجد قرب من زغلول وطلب منه بهدوء يخرج من المكان، قربت من الراجل وحاولت اتودد منه يمكن يفهمني، كان متحفظ جدا ومش حابب يتكلم معايا، بس في النهاية قالي:
– احنا كلنا يابني عايشين مستورين بستر ربنا، وبحفظ ربنا، بس زغلول لعب في حاجة مش بتاعته، واستعان بحاجة مينفعش نستعين بيها، وللأسف اتعاقب بأنه يشوف كل مساوئ البشر، وده يابني شيء يخلي أي بشري يفقد عقله، تخيل تشوف ابوك في مشهد مقزز، او امك وهي في معصية، طبق كل ده على كل الناس بقا، للأسف الجنية دي قدرت تخليه يشوف كل البشر ملعونين بالمعصية، خلته يتجنن خلاص، وللأسف علاجه هيبقا صعب وخطير جدا، لأن هيرا من عشيرة قوية جدا، واتملكت من جسمه تملك كامل..
عقاب اللي فضوله ساقه للسحر، وعقاب اللي يسلم لجنية تتزوجه ويمضي معاهم عقد، بس اللي هو مقالوش وانا واثق من ده ان هو اللي كان بيدور على كتب السحر من صغره، وان هو اللي كان بيحلم من يومه يتجوز جنية، بس هو مش هيشوف خطيئته ان هو كذاب ويستحق اللي وقع فيه ده…
قول يابني دايما
“اللهم استرنا فوق الارض وتحت الارض ويوم العرض عليك”
بقلم: أحمد محمود شرقاوي
……………
ترقبوا أعمالي بمعرض القاهرة الدولي للكتاب ٢٠٢٢ ضمن اصدارات دار ببلومانيا للنشر والتوزيع..
رواية “إني رأيت”
سلسلة مائدة الفزع العدد الثالث “لعلهم يرجعون”
More Stories
دسوق تستعد لإستقبال الملايين غدًا .. قصة القطب الصوفي إبراهيم الدسوقي
“عبور 360”.. عينُك الشاملة على نبض مدينة العبور وخدماتها
انطلاق برنامج تأهيلي وتدريبي لموظفي هيأة التأمين الطبي