ده اللي قالته مراتي بعد ألف خناقة دارت ما بينا بسبب أمي العجوزة المسكينة اللي عندها زهايمر، ولقيت نفسي في لحظات بقع في موقف رهيب، وكانت نتيجة الاختبار مرعبة لأقصى أقصى درجة..
………
جحيم، جحيم بقيت عايش فيه حرفيا، لدرجة إني بقيت بتهان واتهزق قدام والدتي المريضة، بقيت عايش في كابوس فظيع مش قادر أصحى منه أبدا..
ليلتها وقفت قدامي وبكل جبروت الدنيا وقدام أمي المريضة بالزهايمر قالتلي نصا
“يا توديها دار مسنين يا إما تطلقني”
وسابت البيت ومشيت، وقعدت أنا على الكنبة منهار، حاسس اني هتجنن من التفكير، وقتها لقيت أمي بتقرب مني وبتطبطب عليا وبتقولي:
– هو انت مروحتش المدرسة ليه
بصتلها بصة شفقة على عتاب على ضيق، لدرجة إن جزء من جوايا كان بيتمنى انها تموت حتى عشان أخلص من الهم ده، عشان ترجع حياتي طبيعية مع أمل..
ودخلت اوضتي وبدأت الذكريات تضرب عقلي من كل مكان، افتكرت أول مرة شوفت فيها أمل، أول مرة دق قلبي ناحيتها، وحتى المفاجأة اللي اكتشفتها لما عرفت انها بنت مديري في الشغل، يعني مركز ومكانة وفلوس، وهتساعدني كمان اني أطلع في السلم الوظيفي بسرعة..
لسة فاكر يوم فرحنا وسعادتي لما كنت فاكر إني خلاص هعيش في الجنة، بس للأسف عشم إبليس في الجنة..
كلها أسابيع بس وزاد المرض على أمي وبقت بتنزل ومتعرفش ترجع شقتها، وبقت بتنسى بطريقة رهيبة، لدرجة انها في مرة جابوها من عند المقابر بالليل مش عارفة هي رايحة فين..
وكنت مضطر وغصب عني أجيبها تعيش معايا في شقتي مع مراتي، بس أمل من أول يوم كانت متحفزة، مستنية أي موقف عشان تبدأ في صراع ملوش نهاية..
حاولت احتويها مرة واتنين وعشرة بس مقدرتش، لدرجة اني كنت بقفل على أمي باب الاوضة طول اليوم وارجع اخدمها واحطلها أكل وشرب عشان متخرجش حتى وأمل تشوفها، بس أمل مكنتش مستعدة تتنازل أبدا عن استقلالها..
ورجعت افتكرت ليلة ما كتبت نص الشقة لأمل يوم كتب الكتاب، كنت فاكر اني بضحك عليها هي وابوها، بس للأسف أنا اللي كنت مغفل..
غير اني بحبها فعلا، ومش قادر استغنى عنها، طلاقها معناه دمار كل حاجة، شقتي وكفاح سنين حياتي كلها..
اتصلت يومها بوالدها ومديري في الشغل بس لقيته صارم جدا، وكان الشرط واحد، لازم أمي تخرج من الشقة..
حاولت استعطفه بس هو مكنش عنده استعداد يتناقش، وفي النهاية قالي ان فيه دار للمسنين هو يعرف مديرها، وانهم هيهتموا بوالدتي فيها خاصة إنها مريضة، وان ده الحل الوحيد..
قعدت ليلتها ودموعي على خدي، حيران وخايف ومشتت، اتصلت بأمل لعلها تحتويني وتعتذر، اتصلت بيها بتقوى بيها، بس ردت رد قاسي، أنشف من رد أبوها..
. اترجيتها تقترح حل تاني بس هي مكنتش عايزة تسمعني من الأساس، وبعد ليلة من الصراع والتفكير المخيف قررت..
قررت أودي أمي الدار دي وازورها كل يوم، وهناك هطمن عليها اكتر من وجودها مع أمل، وفعلا خدت أمي في عربية حمايا ووديتها دار للمسنين..
لسة فاكر نظرات أمي وهي بتدخل الدار، كانت خايفة، وقلقانة، وانا قلبي كان هيتقسم نصين من الحزن، بس مكنتش قادر اتكلم، بس هي اتكلمت، اتكلمت وقتها بصوت رزين كأنها مش مريضة إطلاقا، عينيها نزلت دمعة وقالت:
– ابقا تعالى زورني
وقتها اتكهربت من القهر، هي ازاي واعية للي بعمله فيها، ورجعت مكسور لشقتي، واستقبلتني أمل بالأحضان والرومانسية المبالغ فيها، وحاولت بقدر الإمكان أقتل ضميري عشان أعرف أعيش واشوف حياتي مع حبيبة العمر وبنت المدير..
وهي كانت أستاذة في انها تنسيني نفسي، لدرجة اني بعد شهر واحد بس كنت نسيت إن ليا أم أصلا، وبدأت أخطط عشان أراضيها اكتر عشان يرضى عني أبوها واترقى واقدر أحقق انجاز في حياتي..بقلم/ أحمد محمود شرقاوي
وعدت الأيام والأسابيع والشهور، وبدأت أمل تتغير واحدة واحدة، تتغير بطريقة مريبة، من يوم ما سمعتها بتكلم حد في الموبايل وبتضحك بطريقة قذرة، ولما واجهتها وقفت بكل برود الدنيا تتهمني اني شكاك واني محتاج اتعالج نفسيا..
وكنت للأسف ضعيف، ضعيف لأني كاتب لها نص الشقة، ضعيف لأني مش هقدر ابدأ حياتي من جديد لو بعدت عنها، بس هي اتغيرت اكتر، لدرجة انها بقت بتفتعل المشاكل بطريقة غريبة، كأني بقيت عدو لدود ليها مش زوجها اللي عايش معاها..
لدرجة انها طلبت الطلاق صراحة، بس انا مكنتش قوي عشان أطلقها ومش قادر اديها نص شقتي لو ده حصل، ووقعت اكتر واكتر تحت رجليها واتفرعنت هي وبقت في قمة الجبروت..
لدرجة انها بقت بتوجهلي اهانات قذرة بقلة الرجولة والنخوة والكرامة، وانا للأسف كنت زي مانا، مش قادر أخود موقف، مستني الترقية ومقدرش أزعل ابوها اطلاقا، وشقتي مش هقدر اسيبها لو طلقتها إطلاقا..
لحد ما في ليلة حصلت بينا خناقة كبيرة لما شوفت محادثات غرامية بينها وبين واحد تاني على الواتس أب، وبكل جبروت يومها قالتلي انها بتحبه ولو راجل أطلقها، وقتها ضربتها، ضربتها بكل ثورة الدنيا..
بس هي كانت شيطانة، أفعى، مهما اكسر عليها عفش البيت تضحك وتزيد في صراخها واهاناتها، وأقسمت انها هتخليني أندم ندم عمري..
في النهاية سابت البيت وقعدت انا وسط حطام الشقة أبكي زي العيل الصغير..
ومن التعب والإرهاق غصب عني نمت، نمت مكاني في الصالة، بس في نص الليل صحيت على صوت خطوات في الضلمة بتتحرك ناحية الحمام، صحيت لقيت نفسي نايم على الأرض في الضلمة ومش شايف أي حاجة..
بصيت ناحية صاحب الخطوات بغضب، ووسط الضلمة شوفتها واقفة، كانت أمل، واقفة قدام باب الحمام وعمالة تخبط براسها في باب الحمام بهدوء شديد وبقوة..
تك
تك
تك
هي بتعمل كدا ليه ؟!
وجت امتا أصلا ؟!
أكيد بتمثل الجنان زي العادة، وقفت على رجليا ومشيت ناحيتها بهدوء شديد، دوست على زرار الإنارة و
وانفجر مصباح السقف بصوت غريب خلى جسمي كله يتنفض، بصيت عليها لقيتها زي ما هي، فتحت نور الاباجورة الضعيف وقربت منها..
طق
طق
طق
ومديت ايدي ناحية ضهرها وقولت
“مالك يا أمل”
في اللحظة دي لفت وبصتلي، مكنتش أمل، كانت أمي، أمي بوش متشقق ومحروق، وعنيها كانت سودة وفيها عروق حمرا بارزة، انا صرخت ووقعت في الأرض، زحفت زي المجنون..
جسمي كله كان بيتكهرب وأعصابي مدمرة، في اللحظة دي اختفت أمي أو الست دي نهائيا، وفضلت مكاني مش قادر اتحرك إطلاقا، جسمي كان ثقيل زي الجبل، مشلول ومتكتف..
وفي اللحظة دي ظهرت تاني، نفس الست، كانت قاعدة على الكنبة وبتبكي، وبعدها لقيتها بتضحك من تاني، وانا كنت لا حول لي ولا قوة، عنيا جاحظة وجسمي متقوس على الأرض..
شوفتها بتقرب مني واحدة واحدة، وحسيت بيها بتدخل جوة جسمي، كأن كهربا قوتها الفين فولت مسكت في جسمي..
ووقعت في غيبوبة شديد، وحتى تاني يوم لما صحيت كنت مصدع، تعبان، جسمي زي ما هو عامل زي لوح التلج، بس اللي خلاني انتبه هي رجليا..
رجليا اللي كانت تقيلة اوي، بصيت ناحيتها وصرخت بأعلى صوت، رجليا كانت ضخمة زي اللي عنده داء الفيل..
رجليا الشمال بالأخص، كانت في حجم رجلي اليمين مرتين على الأقل، بكيت وقتها اكتر من أي وقت في حياتي، زحفت ناحية تليفوني لقيت كل أرقامه محذوفة، بكيت اكتر وكلمت مراتي، الرقم الوحيد اللي حافظه..
ردت عليا وأقسمت انها هتخليني أندم ندم السنين، بكيت لها وطلبت منها تلحقني، بس هي زادت في اهانتها وقفلت السكة..
وفضلت انا مكاني، بزحف زي المشلول، لدرجة اني تبولت على نفسي، زحفت ناحية التلاجة وسحبت عيش وفضلت آكل فيه من خوفي اني أموت هنا من الجوع والعطش..
تلت أيام قضيتهم وانا مرمي في الصالة زي المشلول، بشوف الست طول الليل عمالة تبكي وتضحك، هي في جسم أمي وشكلها، بس وشها محروق وعنيها سودة..
عيشت تلت ليالي من الجحيم نفسه، جحيم طوويل انتهى لما اتفتح باب الشقة وشوفت مراتي داخلة منه، كنت مرمي في الصالة على الأرض مبتحركش..
بصتلها بصة رجاء وبكيت، بس هي ابتسمت اكتر، قربت مني وداست على كف ايدي برجليها وقالت:
– يا مرحب بسيد الرجالة اللي بيعرف يضربني، اللي معندوش نخوة ولا كرامة، بكيت اكتر وقولت:
– شوفتي رجليا عملت ازاي يا أمل
– تستاهل، تستاهل الحرق كمان، مانا قولتلك طلقني مسمعتش الكلام
بصتلها بذهول وقولت:
– قصدك ايه يا أمل
– قصدي ان الست مبتحبش الراجل معدوم الشخصية اللي بيبيع أمه حتى لو كان عشانها، بتشوفه صغير اوي، وانا عمري ما حبيتك ولا كنت طايقة أعيش معاك، حبيت غيرك وطلبت منك تطلقني، بس انت كنت مغفل، قابل الاهانة لنفسك، عشان كدا اقترح عليا حبيبي اني اعملك سحر بالمرض، ومكنتش أتخيل اطلاقا ان السحر يوصل لكدا، ويوم ما ضربتني روحت عملت سحر جديد، وتقريبا كدا السحر كله اتركز في رجليك اللي هتتقطع قريب دي
وقتها بكيت اكتر، حاولت امسكها مقدرتش، صرخت من وسط دموعي وقولت:
– هقتلك وهقتله يا أمل، هقتلكم انتوا الاتنين
ابتسمت اكتر واكتر وقالت:
– وليه تقتله، هو جاي لحد عندك عشان تنفذ وعدك
في اللحظة دي ظهر شاب وراها وبصلي بكل شماتة الدنيا، زحفت ناحيته وانا ببكي لقيته ضربني برجليه، وسمعت أمل بتقول:
– هتطلقني غصب عنك وهاخد الشقة كلها لأنك هتتنازل عنها دلوقتي
وفي لحظة مسك الشاب ده ايدي وخلاني أبصم على عقد تنازل غصب عني، كل ده وانا عاجز، ببكي زي الأطفال، ولقيتها بتكمل وتقول:
– أما بخصوص انتقامي منك انا أقسمت، عمرك شوفت واحدة بتخون جوزها قدامه
وقتها برقت، لساني اتشل، هي قصدها ايه، لقيتها كملت وقالت:
– لو مش حابب تشوف مراتك مع راجل غريب قدامك طلقني بسرعة
ولقيته فعلا بيقلع الجاكيت بتاعه
– هتطلقني ولا الدياثة بقت في دمك يا قذر
وقتها صرخت
– انتي طالق، طالق، طااااالق، ارحميني يا أمل وخديه وامشوا من هنا
لقيتها ابتسمت بسخرية وقالت:
– بكرة آجي الاقيك سايب الشقة خالص، سلام
ومشيوا، مشيوا وانا عايز اقتل نفسي من كم الوجع اللي جوايا..
آآآآه
قلبي واجعني، ببكي دم، محطم، ومكسور، ومتحطم، يارب، يارب ارحمني برحمتك يارب..
في اللحظة دي لقيت باب الشقة بيتفتح، وظهرت أمي عليه، أمي الست العجوزة اللي عندها زهايمر..
أمي اللي جريت عليا وهي بتبكي بهيستريا، قعدت على الأرض وحضنتني، وبكيت انا بهيستريا، مكنتش مصدق انها أمي بجد
– انتي فعلا أمي
– ايوة يا حبيبي انا ماما
وبكيت اكتر واكتر، بكيت لحد ما نمت في حضنها، نمت كتير اوي، وأول ما صحيت صعقت لما لقيت رجلي كويسة، كويسة ومفيهاش غير ورم بسيط..
وكنت لسة في حضن أمي، بصتلها بذهول لقيتها بتقول:
– يالا نرجع شقتنا الصغيرة يا حبيبي
قمت معاها أعرج وانا هتجنن، لحد ما فهمت، فهمت ان أمي المريضة من يوم ما رميتها في دار المسنين وهي بتدعيلي، بتدعيلي لحد ما شافت رؤيا اني في كرب شديد..
أمي هربت من الدار وجت تجري وتلف في الشوارع وهي بتصرخ وتقول يارب، لحد ما ربنا خلاها توصلي، أمي اللي شافت في الرؤيا ان فيه قط اسود ورا دولابي، ولما وصلت لقت باب شقتي مفتوح وانا مرمي على الأرض، وورا الدولاب شافت السحر، سحرين، وحرقتهم، وربك جعلها سبب للشفاء..
يومها كانت بتدهنلي مرهم على الورم اللي في رجلي، وقتها بس اترميت تحت رجليها وفضلت ابوس على رجليها واقولها
“سامحيني يا أمي، سامحيني يا أمي”
لقيتها بصتلي باستغراب وقالت:
“انت لسة مروحتش المدرسة لحد دلوقتي يا واد”
وضحكت بأعلى صوتي وكملت بوس في رجليها وانا ببكي وبقولها:
“سامحيني يا أمي”
بقلم: أحمد محمود شرقاوي
………..
وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَاناً إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَآ أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيماً* وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِى صَغِيراً
بقلم: أحمد محمود شرقاوي
………….
More Stories
دسوق تستعد لإستقبال الملايين غدًا .. قصة القطب الصوفي إبراهيم الدسوقي
“عبور 360”.. عينُك الشاملة على نبض مدينة العبور وخدماتها
انطلاق برنامج تأهيلي وتدريبي لموظفي هيأة التأمين الطبي