كارثة نزلت على حياتي وحياة ولادي في يوم وليلة، من يوم ما بدأت تتحول حياتي لجحيم لحد ما ابني الصغير قام يصرخ بالليل ويقول……
كل اللي فاكراه هي نظراتها الغريبة ليا يوم ما دخلت البيت ده عروسة جديدة، وبما إني واحدة ست فسهل جدا اني أفهم إن دي نظرات حقد صريحة، العروسة الجديدة الجميلة اللي جاية تاكل منها الجو في البيت كله، خاصة إن من يوم دخولي البيت وانا الكل بيمدح فيا أوي وفي جمالي وشطارتي..
اتجوزت في الدور الثالث في بيت العيلة وهي كانت في التاني متجوزة أخو جوزي، وتحت كان عايش حمايا وحماتي، وبدأت أشوف فجور واضح من أول يوم جواز ليا، واحدة منفتحة بطريقة مخيفة، وكأنها قاعدة في أوضة نومها، بتنزل بلبس النوم قدام حماها وتقعد بكل تلقائية معاهم تهزر وتضحك، وانا بصراحة كل ده مكنش بيشغلني في شيء، بس لما لقيت الوضع ده مستمر في وجود جوزي قلقت وبدأت أخاف، خاصة انها كانت استاذة في الاغراء والقذارة..
وصارحت جوزي من البداية اني مش هقبل الوضع ده، بس هو كان سلبي، قالي انه ميقدرش يتكلم مع أخوه في حاجة زي دي، غير انه بيعتبرها زي أخته الكبيرة وبس، وكملت أنا حياتي وانا في ضيق شديد..
صوتها كان بيعصبني، إسلوبها، لبسها، وبالأخص لما كانت ترمي بالكلام عليا، كلام قذر ميخرجش من واحدة محترمة إطلاقا، واستمر الحال وانا بتجاهلها بقدر الإمكان، وارتحت شوية لما جوزي بقا بيسافر فترات طويلة، فمبقتش أخاف زي الأول..
كل ده كان ممكن يعدي، حتى وفاة حمايا عدت، انما لما خلفت وهي خلفت بدأ صراع من نوع جديد، لأني ببساطة خلفت طفل جميل جدا في جمالي وهيئتي، وهي خلفت بنت اكتشفنا ان عندها متلازمة داون، وظهر أوي الحقد والغل في نظراتها وقتها..
لدرجة انها كانت بتتعمد تشيل ابني كتير اوي، كنت بخاف منها وعلى ابني، خاصة انها كانت بتقول انها مش هترضعه لأنه هيبقا عريس بنتها، وقتها بس شديت ابني منها وطلعت على فوق..
ومن يومها بقت يوميا تنادي ابني يا عريس بنتي، كل ده وانا خايفة، قلقانة، حتى لما العيال كبروا بقت تقول لبنتها روحي العبي مع عريسك، وعلى الرغم ان بنتها في قمة الطيبة بس انا مقدرش أقبل بحاجة زي دي، الولد يكبر ومن حقه يختار شريكة حياته بنفسه..
وخلفت بنتي التانية، واستمر الحال كتير اوي، شد وجذب ومشاكل، لحد الليلة الصعبة اللي بدأ من عندها كل حاجة صعبة..
كان ابني وقتها عنده ١٤ سنة وبنتي ١١ سنة، مرات عمه نادته وقالتله روح العب مع عروستك، وقتها بصلها بسخرية وقال:
– وهو انا هتجوز بنتك انتي على أخر الزمن
وقتها حسيت بنار بتاكل فيها، وشها اتحول لونه بطريقة مخيفة،. لقيتها فورا مسكت ابني بقوة من ايده وبدأت تشتمه وخلاص كانت هتضربه، وبكل غضب الدنيا اتحركت ومسكتها من شعرها وشدتها بعيد، ودخلت انا وهي في صراع وسلسلة طويلة من الشتم والضرب انتهت بالوعيد منها انها هتخليني أندم ندم عمري..
وكلها أيام وجت بنتي خايفة وتجري عليا، ولما سألتها هي خايفة من ايه وقلقانة وفضلت أحايل فيها قالتلي:
– يا ماما انا فيه دم نزل مني ولما مسحته بالمنديل مرات عمي قالتلي هاتي المنديل، وقالتلي كل مرة تجيبي المنديل ليا
مبقتش فاهمة هي عملت كدا ليه، وبما اني كنت مقطعاها قررت أتجاهل الموقف، لحد ما حصل موقف جديد لما رجعت انا وبنتي في مرة من المستشفى ولقيت ابني مصدع اوي وقاعد على السرير بيترعش..
ولما فضلت أزن عليه عشان يتكلم قالي ان مرات عمه جت وشربته حاجة خلته عامل زي المتخدر،. بعدها صحي من النوم لقاها نايمة جمبه وشكلها غريب، والأغرب انها كانت عارية..
كنت هتجنن مش فاهمة ولا عارفة ده ايه أصلا، وقتها كلمت جوزي لقيته بيتهمني بالكذب، قالي اني موهومة وياريت معملش مشاكل كتير، وقتها حسيت بالخوف والرعب اكتر واكتر، الست دي بتعمل ايه أو بتخطط لإيه..
ومن يومها اتبدل الحال في شقتي للأسوأ والاسوأ، ابني بقا بيصحى من نومه ينادي على مرات عمه في الشقة، بل بقا بيتكلم في نومه وبيقول حاضر هتجوز بنت عمي حاضر..
وبنتي بقت تصحا تصرخ من نومها وتقول ان فيه حد بيتهجم عليها، واحد شبه بنت عمها، كأنه راجل عنده متلازمة داون بس وشه اسود وضوافره طويلة، وكل ليلة بيجي يتهجم عليها في نومها..
حتى ابني بقا بينزل يقعد عندهم وبالأخص مع بنت عمه كتير اوي، حاولت معاه مرة واتنين مقدرتش عليه، بقا بيعاملني بقسوة شديدة وينزل يخدمهم ويقعد معاهم بالساعات، وبقيت كل كام يوم الاقي مية ريحتها غريبة على باب شقتي، لحد ما في مرة خطيت عليها بالصدفة..
ويومها بالليل حسيت بوهن شديد، كأني منمتش بقالي سنة، دخلت اوضتي وطفيت النور ونمت، بس بالليل صحيت على صوت همسات غريبة في اوضة نومي، صحيت وانا مخضوضة وفوجئت بحد واقف يبرقلي قدام باب اوضتي، اتخضيت اكتر واكتر وحسيت ان ريقي بينشف والدم بيتجمد في عروقي..
وعلى النور الضعيف لمحتها، هي بنتها، البنت الغلبانة اللي عندها متلازمة داون، بس شكلها كان مخيف، عندها أنياب وعنيها بتبرق في الضلمة، اتكلمت بصوت بيترعش وقولت:
– هاجر ايه اللي جابك هنا
لقيتها ماسكة في ايديها شعر كتير، ركزت اوي لقيتها بتجر جسم ابني في الضلمة وبتزوم، قلبي طلع من مكانه بطريقة رهيبة، مقدرتش أصرخ، ولا أنطق بنص كلمة، ولقيتها نزلت على جسمي ابني وكأنها، وكأنها بتاكله، أو أو بتغتصبه وبتقطع في جسمه كله..
يارب، يارب، ولقيت نفسي بصرخ بهيستريا، وقتها كل حاجة وقفت تماما، واختفت من قدامي، اتصلت بجوزي وكنت بصرخ وبسب في مرات أخوه، ساب شغله ورجع بس للأسف كان زي ما هو، كل اللي قاله اني ابعد عنها وخلاص..
جبت شيخ واتنين بس للأسف مخدتش منهم عقاد نافع، لحد ما جت صراحة منها، جتلي شقتي وانا لوحدي وهي بلبس نومها، ووقفت قدامي بكل تحدي الدنيا وقالت:
– ها هتسمعي كلامي ولا أكمل
بصتلها بغل وقلت:
– انتي عايزة مني ايه
– الواد يتجوز البت، وبنتك هخليها تخف، ولو ركبتي دماغك هسحر لجوزك ومش هخلي حد يصدقك
قفلت في وشها الباب ووقعت على الكنبة، كنت خايفة، مقهورة، بكيت كتير اوي، اووووووي، وفي لحظة وسط صمتي ركزت مع الآية اللي كانت شغالة في التلفزيون
وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ(97) فَسَبِّحْ بِحَمْدِ رَبِّكَ وَكُن مِّنَ السَّاجِدِينَ(98) وَاعْبُدْ رَبَّكَ حَتَّى يَأْتِيَكَ الْيَقِينُ
وقتها بس حسيت بهدوء غريب، كأن روحي نفسها بتتنفس، كأني شربت مية باردة في يوم شديدة الحرارة، يااااه يعني ربنا شايف وسامع وكمان حاسس بيا..
يعني ربنا عالم بكل الظلم والتعب اللي بعاني منه بسبب الست دي، والله لو هفضل في عذاب طول عمري يكفيني اني عرفت ان ربنا حاسس بيا وبيقولي اصبري، ابتسمت وقتها، ابتسمت اوي..
ودخلت بكل هدوء اوضتي وفرشت مصليتي وطلعت مصحف القيام اللي كان عليه التراب، مسحته واستغفرت ربنا، ولقيت نفسي بقضي ليلة كاملة من القيام والدعاء والاستغفار، كنت قرأت ان قول “لا حول ولا قوة الا بالله” بيفرج الكربات..
رددت الذكر ده ليلتها ١٠ الاف مرة، وصليت على النبي ١٠ الاف مرة، روحي استكانت وهديت، جالي اليقين اني بين ايدين ربنا محفوظة من شياطين الإنس والجن كمان..
وانطلق لساني، اسبوع كامل بيردد “لا حول ولا قوة الا بالله”
بدون ما ازهق او اتباطئ، كنت حاسة ان روحي بتطهر من كل آثام الدنيا..
الغل
الحقد
التعب
الارهاق
الناس المؤذية
ياااااه، لو الناس تحس باللي حساه دلوقتي والله ليجروا لطريق ربنا وينسوا كل خلافاتهم مع بعض، وأول حاجة عاهدت بيها ربنا اني مسمحاها، مسمحاها لوجه الله الكريم، مسمحاها عشان ربنا يسامحني على أي حاجة غلط كنت عملتها في حياتي..
واظبت على قراءة القرآن وشغلت سورة البقرة في البيت يوميا، وبدأت أدعي ليل نهار بالثبات والشفاء ليا ولأولادي، بقا عندي يقين ان ده مجرد ضرر موقعش عليا غير بأمر الله، بلاء ربنا قدره ليا وانا راضية بيه تمام الرضا..
وسمعت الصرخة، صرخة رجت البيت كله، طلعت أجري علي الشارع وانا قلبي بيتنفض وبدعي ان ربنا يسترها، نزلت لقيت
لقيت مشهد رهيب مش هنساه في حياتي كلها، البنت اللي عندها متلازمة داون، بنت عم ابني، واقعة من البلكونة وراسها كلها بتنزف دم، ومن فوقها أمها راقدة عليها وبتشيل التراب وتحطه على دماغها وتصرخ..
قلبي انفطر، وعيني بكت، وروحي راحت ناحية البنت اللي للأسف جت للحياة عشان تلاقي أم بالشكل ده، واللي يقهر القلب ان البنت رفعت صباعها ناحيتي، صباعها اللي كان غرقان دم، قربت منها وحضنتها، ولقيتها بتطبطب عليا بحنية وتبتسم ابتسامة خفيفة..
كأنها بتواسيني عن كل أفعال امها، وفي لحظة غمضت عينيها ونامت للأبد، ووقعت امها في نوبة صراخ لا نهائية، ونزلت دموعي زي المطر، ربك شاء ان البنت تموت رغم انها وقعت من الدور التاني بس..
ربك شاء ياخد البنت بعيد عن قذارة أمها للأبد ويرحمها برحمته الواسعة، امها اللي اتجننت من يومها واتطلقت بعد أيام، ورغم كل اللي عملته معايا كنت مشفقة عليها وبدعيلها من قلبي، والحمد لله الذي نجانا من شر عباده، رغم ان قلبي واجعني على البنت، بس مطمنة لأنها بين ايدين الرحمن الرحيم..
بقلم: أحمد محمود شرقاوي
……………
وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ(97) فَسَبِّحْ بِحَمْدِ رَبِّكَ وَكُن مِّنَ السَّاجِدِينَ(98) وَاعْبُدْ رَبَّكَ حَتَّى يَأْتِيَكَ الْيَقِينُ
More Stories
دسوق تستعد لإستقبال الملايين غدًا .. قصة القطب الصوفي إبراهيم الدسوقي
“عبور 360”.. عينُك الشاملة على نبض مدينة العبور وخدماتها
انطلاق برنامج تأهيلي وتدريبي لموظفي هيأة التأمين الطبي