قالتها الممرضة وهي بتصرخ وبتجري هي واتنين معاها كمان عشان يلحقوا النزيف، المريضة كانت مرمية في الأرض وشرايينها مقطوعة وعمالة تتنفض والدم بيسيل منها زي الشلال، ووقفت أنا مذهولة من اللي بيحصل، مفوقتش غير على صوت مديرة المصحة وهي بتصرخ في غضب وبتقول:
– مين المتخلف اللي سمحلها تدخل اوضتها بحاجة ازاز كلكم متحولين للتحقيق
وشهقت المريضة مرة واتنين وتلاتة..
……………..
من أول يوم ليا في المصحة كدكتورة أمراض نفسية وعصببة اتفاجئ بمحاولة انتحار لمريضة، وكأنه استقبال حافل بيقولي اني داخلة على حياة صعبة، حياة هتنتهي بيا للموت أو ربما الجنون والأمراض النفسية، مشهد البنت وهي بتتنفض والدم بينزل منها كان مخيف، مقبض، كانت بتخربش في اللي بيحاول ينقذها، كأنها متمسكة بالإنتحار لحد أخر نفس..
في النهاية جالنا الخبر انهم لحقوها في الرعاية، جسمي استكان خالص وقتها، مانا استحالة كنت هعرف أعيش وانا شايفة واحدة حاولت تقتل نفسها وجالي خبر موتها، قعدت شوية مع نفسي أفكر، تردد كبير بينهش فيا، لدرجة اني فكرت جديا أقدم استقالتي من المكان، ولقيت نفسي بروح للأرشيف وبطلب من الممرضة تطلعلي ملف المريضة اللي حاولت تنتحر دي..
في الأول كانت مترددة بس لما عرفتها بنفسي اطمنت وطلعته، ومسكت الملف برهبة وطلعت على مكتبي، وبما اني لسة جديدة فكنت لسة مستلمتش شغل بشكل فعلي، فكانت الدنيا سهلة اني اختلي بنفسي شويتين..
فتحت التقرير ولقتيت الآتي
الإسم: جويرية يحيى الدمرداش
السن: ٣٥ سنة
التشخيص المبدأي: حالة كراهية للذات ومحاولات شتى للإنتحار
تأملت صورة البنت في التقرير، ملامح هادية جدا وفي غاية الجمال، ابتسامة خفيفة مشرقة وعنين بتشع بريق وطاقة وحيوية، قلبي دق من الوجع عليها، يا ترى ايه اللي حصل خلاها توصل للمرحلة دي، ايه اللي يحول بنت زي دي للشكل اللي انا شايفاها عليه دلوقتي، قرأت الملف كله وشوفت كل التقارير النفسية عنها وكلام الكام دكتور اللي تولى الحالة..
حاجة مرعبة فعلا إن بنت توصل للمرحلة دي، في الوقت ده شوفتهم من قدام مكتبي حطينها على الترولي وهي متخدرة وبيسحبوها ناحية غرفتها، مشيت وراهم لحد ما حطوها في الاوضة على سريرها واتأكدوا ان الاوضة مفيهاش أي أداة ممكن تجرح بيها نفسها وخرجوا وقفلوا الباب..
مشيت وراهم بهدوء لقيت الممرضة علقت مفاتيح الاوضة في الكاونتر اللي هي بتقعد فيه، ورجعت اوضتي وانا دماغي مولعة من التقكير، عايزة أعرف البنت دي قصتها ايه، أو ليه هي عملت كدا في نفسها..
وبعد ساعتين بس كنت خلاص، دماغي هتولع، ولقيت نفسي بكل جرأة بروح ناحية الممرضة، عرفتها بنفسي واتكلمت معاها شوية، وخلتها تحكيلي عن جويرية، قالتلي ان البنت مفيش حد في حياتها إلا وخانها، بداية من أمها لزوجها لاخواتها، وكل خيانات جنسية وسرقة حقوق و و و لحد ما البنت ألحدت تماما، قلبي انشغل اكتر عليها ومكنتش هقدر استنا وبكل ما عندي من مواهب سحبت المفتاح من جمبها من غير ما تحس، وسبتها ومشيت ناحية اوضة المريضة..
الساعة وقتها كانت داخلة على تسعة بالليل، الممرات هادية ومظلمة، وصوت خطواتي نفسه مخيف، مشيت بهدوء وحذر لحد ما وصلت للأوضة اياها، اوضة جويرية، وبكل هدوء وقلبي بيدق فتحت الباب بتاعها، كانت صاحية وقاعدة على السرير بس ايديها الاتنين مربوطين في السرير عشان متأذيش نفسها..
شكلها قهرني أوي، قعدت جمبها بهدوء وابتسمت بتوتر شديد وقلت:
– ازيك أنا اسمي نادين، انتي بقا اسمك ايه
ولا كأني اتكلمت، هي باصة للسقف ومبتنطقش إطلاقا، دخلت لفيت في اوضتها لقيت كشكول وقلم مصنوع من المطاط عشان متأذيش نفسها، وأول ما مسكت الكشكول بصتلي بغضب شديد وقالت:
– اياك تلمسيه
رجعت بسرعة وقلت خلاص مش هلمسه، بس انا حابة اتكلم معاكي شوية، وطبعا هي ولا كأنها سمعت كلمة مني، وبكل هدوء قولت:
– كنت بحبها أوي يا جويرية، وكنت حاطة سعادتي كلها عليها، مهو محدش هيحب اكتر من أمه اللي جابته للدنيا، بس للأسف أمي خانت والدي قدام عنيا، وشوفت جزاء الخيانة بيكون عامل ازاي للأسف
في الوقت ده بس بصتلي واتحرك نن عنيها بتوتر وقلق واترعش جسمها، بس انا كملت وقولت:
– حتى اخواتي اللي المفترض يحموني من الحياة أكلوا ورثي وشبه رموني في الشارع لكلاب السكك تاكل فيا
جسمها اترعش مرة تانية، ولسة هكمل كلامي لقيتها بتقول:
– جويرية تعيسة
رددت وراها وقولت:
– ونادين كمان تعيسة
كنت بحاول استدرجها بقانون بشري متأصل فينا كلنا، وهو قانون الغلبة، حتى في المآسي، افتكر كدا كام مرة قولت لصاحبك انا تعبان فقالك انا اتعب منك، انا مخنوق وانا مخنوق اكتر منك..
انا بقا كنت بحاول أبين ان معاناتي شبهها عشان تحاول هي توصلي ان معاناتها أصعب مني، وحسيت اني شبه نجحت، لإن البنت واضح اوي انها مش مريضة، البنت دي يأست من الحياة كلها، لقيتها كملت وقالت:
– جويرية أمها خانتها وخانت ابوها
– ونادين اتخانت من أقرب الناس ليها
– جويرية اخواتها ضربوها وخدوا منها الورث
– ونادين محرومة من الاخوات طول حياتها
لقيتها فجأة اتنفضت مرتين وبدأت تتكلم زي الإنسان الآلي..
“جويرية كانت بتحب امها اوي اوي اوي، وشايفة ان سعادة الدنيا كلها بتتمثل في أمها، لسة فاكرة لما صحيت من النوم مخضوضة على صريخ عشان تلاقي أبوها ماسك سكينة وبيقتل أمها وراجل غريب معاها، امها كانت مش لابسة هدومها، امها وهي بتموت بصت في عنيها بصة خوف، وفهمت ان أمها كانت خاينة، ابوها فهمها لما طلع من البوليس ان امها خاينة..
واتهدمت سعادتها كلها في لحظة واحدة، وبعد سنين طويلة بدأت تبني سعادتها على اخواتها اللي كانوا سندها في الدنيا، بس أول ما مات أبوها وعشان هي طيبة كلوا ورثها ورموها في الشارع، وراحت وهي شابة عروسة تعيش عند عمها، وهناك شافت المرار كله من مرات عمها، بس استحملت لحد ما قدرت تبني سعادتها على عمها، اللي برضه سابها ومات..
وجت النجدة الأخيرة تتمثل في عصام، عصام اللي قرر يتجوزها رغم انها كانت خايفة ومرعوبة من الحياة كلها، من البشر، من الكلام، بس هو وعدها انه هيكون مصدر أمانها وسعادتها، واستقرت فعلا حياتها وقت طويل، وبقا ليها صديقة بيخرجوا سوا ويضحكوا سوا، وقسمت سعادتها على عصام وصاحبتها..
عشان المطرقة تنزل على دماغها في لحظة واحدة لما تشوف جوزها بيخونها مع صاحبتها، وقتها عرفت ان العالم ده كله ظالم، وهي لازم تكفر بالعالم ده كله، بالناس، وبكل حاجة حوليها، وحتى من ظلمهم مسمحوش ليها تموت نفسها، وجوزها وداها المصحة عشان ينفي عن نفسه التهمة ويقول انها مريضة وانه الزوج الشهم اللي بيعالج ويدفع عشان مراته”
دموعي كانت بتنزل في صمت وهي بتحكي، كانت تصعب على الجماد نفسه، ابتسمت من وسط دموعي وقلت:
– ربنا هيعوضك
ولا كأنها سمعت حاجة، ولقيت نفسي بقول بصيغة الغايب:
– رينا هيعوض جويرية
لقيتها ابتسمت في سخرية وقالت:
– ربنا ساب جويرية تتعذب بدون أي ذنب، عشان كدا جويرية سابته خالص
– بس ربنا مسابش جويرية، بالعكس هو بيحب جويرية
– وهو اللي بيحب حد بيعذبه يا نادين
مسحت دموعي وبكل هدوء وقولتلها:
– جويرية غلطت غلطة صغيرة، والغلطة دي كبرت لحد ما. وصلتها للي احنا فيه ده
لقيتها بصتلي بغضب وقالت:
– جويرية مغلطتش
– لا غلطت، جويرية يعني مش عارفة ان البشر ناقصين وان الكمال لله وحده بس
– يعني ايه
استعذت بالله من الشيطان في سري وطلبت من ربنا يجعلني سبب في نجاة إنسان.
“يعني سعادتنا لازم نربطها بحاجة دايمة، مبتتغيرش، وثابتة مهما اتغير الزمن، لو ربطناها بشخص فهو هيجي عليه يوم ويسبنا ويموت، أو بسبب انه شخص غير كامل هيخون ثقتنا ويهدم سعادتنا في لحظة غضب أو شهوة أو قلة وعي وتفكير، أما لو ربطناها بالوحيد اللي مبيموتش ولا بيتغير وهو ربنا فهنفضل سعداء في الدنيا، وفي القبر وحتى يوم الحساب، لأن الله اللي في الدنيا هو اللي معاكي في قبرك هو اللي معاكي يوم القيامة، ليه بقا نعلق سعادتنا على غيره..
اتكلمت بصوت متوتر وقالت:
– بس انا علقت سعادتي عليه مرة وهو خذلني
– انتي فاهمة ده غلط، السعادة مع ربنا في الصبر، والرضا، والابتسامة لوجه الله حتى في وقت الكربات والصعوبات، السعادة موجودة حتى وقت المصيبة، الصبر لوجه الله فيه لذة وسعادة للي يفهمها
– بس هو ليه يعذبنا ويتعبنا عشان نصبر ونتعب اكتر
– عشان سلعته غالية اوي، الجنة يا جويرية، مش أي حد يستاهل يدخلها غير اللي يصبر ويستحمل ويرضى بكل أقدار ربنا
– بس هو ليه اختار يضغط عليا انا
– عشان كان بيحبك، لما بيبتلي عبد بيحبه بس انتي وقعتي في الاختبار بتاعه، عارفة يا جويرية
– ايه
– علاجك كله في الكام كلمة دول، لأنك وقعتي في الفخ ده
“وَمِنَ النَّاسِ مَن يَعْبُدُ اللَّهَ عَلَىٰ حَرْفٍ ۖ فَإِنْ أَصَابَهُ خَيْرٌ اطْمَأَنَّ بِهِ ۖ وَإِنْ أَصَابَتْهُ فِتْنَةٌ انقَلَبَ عَلَىٰ وَجْهِهِ خَسِرَ الدُّنْيَا وَالْآخِرَةَ ۚ ذَٰلِكَ هُوَ الْخُسْرَانُ الْمُبِينُ”
وانتي كنت بتعبديه على حرف، وأول فتنة جتلك وقعتي فيها وكنتي هتخسري الدنيا وتنتحري، وهتخسري الأخرة وتروحي ملحدة عاصية..
الغريب اني لمحت دموع في عنيها، لقيتها بتقولي بصوت مرتعش:
– بس انتي بتكذبي عليا
– بكذب في ايه
– بتقوليلي ربنا بيحبني فين دليلك
ابتسمت بانتصار وقلت:
– منعك تنتحري عشان متروحيش عاصية، وبعتني ليكي عشان لسة عاوزك، عاوز يعوضك، وعوض ربنا جميل جدا، انتي مش مريضة، انتي بس مش عارفة ربنا كويس
وسبتها ومشيت، سبتها وانا بردد عليها نفس الآية، وقتها دمعت كتير اوي، والغريب اني اتحولت تاني يوم لمصحة تانية عشان وجودي هنا كان غلط، معرفش جابوني هنا ليه، من امتا الادارة بتغلط، بس انا عارفة انه قدر، قدر خلاني أروح برجلي لجويرية، دعيت ليها كتير ونسيت كل حاجة..
بقلم: أحمد محمود شرقاوي
………..
بعد سنة لقيت مكالمة من رقم دولي، رديت عشان أسمع صوت بينبض بالفرحة:
– ايوة يا دكتورة انا جويرية، انا قدام الكعبة بعمل عمرة وبدعيلك والله، ومتنسيش يا دكتورة، اوعى تعبدي ربنا على حرف
وسالت دموعي في لحظات..
“تفتكر عزيزي القارئ ممكن يكون القدر بعتني ليك في الوقت ده بالأخص عشان انت على وشك انك تنقلب على عقبيك وتخسر الدنيا والأخرة، الجواب لك”
بقلم: أحمد محمود شرقاوي
…………
وَمِنَ النَّاسِ مَن يَعْبُدُ اللَّهَ عَلَىٰ حَرْفٍ ۖ فَإِنْ أَصَابَهُ خَيْرٌ اطْمَأَنَّ بِهِ ۖ وَإِنْ أَصَابَتْهُ فِتْنَةٌ انقَلَبَ عَلَىٰ وَجْهِهِ خَسِرَ الدُّنْيَا وَالْآخِرَةَ ۚ ذَٰلِكَ هُوَ الْخُسْرَانُ الْمُبِينُ”
بقلم: أحمد محمود شرقاوي
…………..
أعمالي والعروض عليهم بمعرض القاهرة الدولي للكتاب ٢٠٢٢ ضمن اصدارات دار ببلومانيا للنشر والتوزيع صالة ٢ B11 واللي تقدر تطلبهم أونلاين حاليا أو تستفسر عن أماكن وجودهم من خلال رقم الواتس ده 201210826415+
……………
أحدث عملين ليا:
رواية إني رأيت+العدد الثالث من سلسلة مائدة الفزع “لعلهم يرجعون” = ٩٠ جنيه
…………
ولو حابب تعيش جو الرعب كله عملنا عرض تاني على أعداد سلسلة مائدة الفزع الثلاثة:
حتَّى زرتم المقابر+الميتة والدم+لعلهم يرجعون=٨٠ ج
……….
ولو حابب تعيش جو الرعب والفلسفة عملنا عرض ثالث لأعمالي الروائية
إني رأيت+إن الله سيبطله= ١١٠ جنيه
………
أما لو حابب تحصل على أعمالي الخمسة فهتلاقي عرض عليهم كلهم:
إني رأيت+إن الله سيبطله+حتي زرتم المقابر+الميتة والدم+لعلهم يرجعون= ٢٠٠ جنيه
وليك هدية مع العرض ده كتاب من إصدارات الدار وده عرض معمول مخصوص ليكم، متابعين أحمد محمود شرقاوي
………
أما لو حابب تشتري كتاب واحد من كتبي فدي أسعارهم في المعرض:
إني رأيت ٧٠ جنيه
إن الله سيبطله ٥٠ جنيه
حتى زرتم المقابر ٣٠ جنيه
الميتة والدم ٣٠ جنيه
لعلهم يرجعون ٣٠ جنيه
………..
ولو حابب تطلب أونلاين أي عرض أو تستفسر عن أماكن وجود الكتب من خلال رقم الواتس ده.
201210826415+
…………
ترقبوا أعمالي بمعرض القاهرة الدولي للكتاب ٢٠٢٢ ضمن اصدارات دار ببلومانيا للنشر والتوزيع.. صالة ٢ B11
رواية “إني رأيت”
سلسلة مائدة الفزع العدد الثالث “لعلهم يرجعون”
More Stories
دسوق تستعد لإستقبال الملايين غدًا .. قصة القطب الصوفي إبراهيم الدسوقي
“عبور 360”.. عينُك الشاملة على نبض مدينة العبور وخدماتها
انطلاق برنامج تأهيلي وتدريبي لموظفي هيأة التأمين الطبي