بقلم عمر أحمد عبد العزيز
مش زي كل الامهات
اه كل ام بتضحي وبتبني وبتدي
و بتشاور بكل فخر وتقول ابني وبنتي
بس انتي…بس انتي غير
أيوة انتي غير
مهو لما تبقي ام و اب كمان تبقي غير
لما تبقي شايلة كل حمول الدنيا وحدك على كتافك
تبقي غير
لما ترفضي جواز وحياة وتقولي ابني بس اللي ريداه
تبقى غير وغير
قدمتيلي أنتي أجمل ايامك وسنينك
قدمتيلي اكتر من اللي اي حد بيتمناه
دايما كنتي مشركاني تفاصيلي
بتوديني المدرسة بتذاكريلي بتلاعبيني بتحكيلي
كنتي سندي وضهري وقنديلي
وحتى الآن وأنا قد الباب
بتديني دايما برضو بدون أسباب
لا بتكلي ولا بتملي
ولا قسوة الزمن أبدا على وشك بتبانلي
اتعلمت منك حاجات كتير
اتعلمت يعني ايه رجولة
عرفت معاكي أن الست تقدر بمفردها تجتاز دور البطولة
مش زي ما بيتقال عليها كمالة عدد
ولا ان الراجل هو بس اللي ضل وحماية وسند
وانتي والله بألف راجل
انتي وتد
انتي اللي يتقال عليها بصحيح
هذه هي التي افنت عمرها من أجل العطاء
مش زي كل الامهات
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب