“يجعلنا فيها خفاف .. مانأذيش” بقلم إيمان شوقي

أن أثبات الشخصية يعني التمرد علي اللي ربنا ميزه بحاجه دفع فاتورتها غالي،

وأن الانتقاص من اللي غيرك بيعمله بيخليكوا كوول وجامدين،

لكن لما تكبروا والحكمة تنزل عليكم وتعقلوا، هتعرفوا قد إيه الكلمة بتفرق وبتطفي،

قد إيه محدش غبي غير اللي بيستغبي غيره،

قد إيه الوشوش والعيون بتفضح وبتقول اللي حصل واتقال في الضهر،

قد إيه الكدب، والشحن، والتطاول مابيستخباش وبيفضح وبيطفح ،

في ناس بتنفعل ورد فعلها صافي وسريع ،

وناس من كتر ماتعبت مابقتش بتصطدم ولا بتواجه ولا بتحاول تثبت انكوا غلطانين،

دول بيختصموكم أمام العدل الحق، واثقين انه هيجيب حقهم تالت ومتلت.

حاسبوا من اللي حط القضية في ايد المطلع، العليم، الدنيا والضحك الفالصوا مايستاهلوش منكم تشوفوا يعني ايه داين تدان ولا يبقالكم وقفة قدام رب العباد يخلص منكم حقوق اللي غلتطوا فيهم.

الشارع والثقافة العامة والترند والصحبة المسوسة بقوا بيضيفوا شوية فجر كدة علي كسر خواطر في قاعدة صحاب عايزين يعملوا نمره علي انسان برضه .. بس عشان نضحك ونقول احنا اهه.

نصيحتي ماتضيعش وقتك وطاقتك، وفرهم لنفسك ..

اشغل نفسك بعيوبك عن عيوب غيرك.. خليك ناصح ووظف طاقتك صح. شوف ايه اللي يرفعك ويضيفلك واعمله.. اتعب واسعي واصبر علي سعيك هترتاح..

الانتقاص من غيرك مش هيضيفلك لك غير الم وهيقل راحتك قبل راحته.

اكره لغيرك اللي ماتقبلوش لنفسك.. ماحدش كامل..

شوف الجمال في غيرك هتلاقي الدنيا بقت احلي.. وانت نفسك جواك حلو كتير طلعه..

دور عليه وافرح بنفسك.

أما انت.. يا من تسأل عن التعافي.. ارض بنصيبك من الالم،

اصبر واحتسب صبرك، واستعوض باللي عندك من نعم. .

الأذي عدوي.. اوعي تصيبك وتحولك لمؤذي ..

نفسك اللوامة اوعي تخرسها واعرف ان محاسبتك لنفسك، وضميرك الحي هم حصنك وامانك، وعملك اللي هتحصده.

ماترهقش نفسك وتفني حياتك في ارضاء الكل.

ماتدورش علي صورة ايجابية لنفسك في عيون الغير.

ردود افعال الآخرين بتكون حسب طباعهم والناحية اللي بينظروا منها للامور.

فاعتزل ما يؤذيك وما تجورش.

رغم الألم معرفة ما في الصدور في بعض الاحيان بيكون خير.

اعرف ناسك حافظ علي حدودك واختار تحاوط نفسك باللي بيحبوك، اللي بيحسوا بيك ويتمنوا لك السعادة.

ماتبصش وراك، ما تعطلش، كمل طريقك، ركز في سعيك وتقييمك لذاتك وشغلك علي نفسك.

لاجل سلامكم النفسي وسلام اللي حواليكم راجعوا نفسكم واتقوا ربنا ..

خافوا اوي من يوم جاي اكيد تترد فيه الحقوق.

امسكوا لسانكم، كفوا اذاكم في الضهر قبل الوش، ربنا يهدينا جميعا ويجعلنا فيها خفاف مانأذيش، ولا يمكن مننا حاقد ويكفينا شر كل ذي شر.

اللهم احفظ لنا سلامة قلوبنا واهدنا سبل السلام،

اللهم لا تجعل في قلوبنا غل لأحد ولا تبتلينا بما كرهناه في غيرنا،

اللهم هون علينا كل اذي وصبرنا وعوضنا واجبر قلوبنا.

ثقتنا فيك كبيرة اوي يارب.