بس وحياة اللي فات.. الكاتبة هبه الببلاوي

لما نحلف باللي فات ده معناه أنه شيء ذو أهمية يستحق القسم ودا لأنه ساب جوانا أثر كبير وغَيَّرنا..

العنوان هو أغنية مشهورة للمطربة نجاة.. وبصراحة العنوان شد انتباهي أوي..

اللي فات يا جماعة بيحفر جوانا بقايا تكاد تكون منحوتة على يد نحات ماهر مبدع، بَرَع في حفر التفاصيل بطريقة لا يمكن إزالتها من داخلنا..

ولكن النحت سبب لنا ألم ووجع.. تقريباً النحات لم يعطي لنا جرعة من البنج وهو يمارس عمله.. وبمنتهى القسوة مارس وظيفته دون النظر إلينا.. وهو دا باختصار اللي فات واللي بنحلف بيه..

اللي فات مهما كان مؤلم لازم نتعافى منه، والوقت كفيل أنه يمحو أي ألم..

والحقيقة اللي لازم نعرفها أننا بنحتاج جهد كبير أوي لنتحرر من الذكريات، أصلها بتصون العِشْرة مش بتحب تفارقنا بسهولة..

بس الذكريات دايماً بتدينا دافع للنجاح وبنتعلم منها أكبر درس في حياتنا.. وده الدرس الذي لا يُنسَى..

الدرس اللي بيدينا دافع مستمر لتحسين حياتنا، يمكن عشان مش عايزين نحس بالفشل أو عايزين نثبت لنفسنا أننا قادرين نواصل حياتنا رغم الألم اللي جوانا..

يمكن احتمال وارد.. وأعتقد هو دا التحليل الأقرب للحقيقة..

بس اللي أقدر أأكده إن وحياة اللي فات اللي جاي أحلى بكتير من سنين فاتت عبثاً وخداعاً.. واللي فات أصبح ذكريات تكاد تكون أصابها الزهايمر ولم تعد تمثل لنا شيئاً.. وممكن نقول وحياة اللي جاي سنمحوا ما نحتت الذكريات ونستمر..

Post Views: 165