أكتوبر 13, 2025

جريدة الحياة نيوز

رئيس مجلس الادارة : نسرين رمزي

فريق لوك سينما تيم .. شخصيات ٢٠٢٠ بقلم دكتورة هبة الببلاوي

‏النجاح نتيجة عمل ونشاط ومثابرة ولا يحتاج النجاح إلى كثير من العلم ولكنه يحتاج إلى الحكمة مع العلم والتركيز في الهدف والسعي وراء الهدف هو سر النجاح
و مواجهة الصعوبات والثبات امامها
ومثال للنجاح فريق لوك سينما تيم الذي كان هدفه ليس فقط النجاح بل هدفه الإستمرارية في النجاح وإثبات وجوده..
‏ورغم كل الصعاب التي تواجهه إلا أن الفريق قرر أن يبدأ بمفرده و يجتهد ليري ثمرة إجتهاده ..ولعلنا لا نغالي إذا قلنا بأن شخصية جوبا ‏أو (خالد محجوب )مؤسس فريق لوك سينما تيم من الشخصيات الناجحة الذي يتخيل نجاحه وبدأ في تنفيذه
‏وبالحوار مع رشا يحيى مخرج مساعد بفريق لوك سينما تيم وزوجة جوبا مؤسس الفريق
كان هذا الحوار بيني وبينها لتحكي لنا أفكار الفريق وهدفه ..
وكان سؤالي عن متي بدأ التفكير بالعمل في هذا المجال؟
البدايات الاولية خالص كان عام 2015 تقريبا في اخرها وكنت بتردد انا وزوجي المخرج خالد محجوب على استوديوهات وورش عماد الدين
صاحبة الفكرة انا لان جوزي كان بدأ شغل مع فرقة مسرحية بتحاول تتكون من الهواة في وسط البلد
لكن زوجيكان مختلف لأنه هو ومن قبله والده كانوا راقصين في فرقة رضا للفنون الشعبية
فالفن بالنسبة ل جوبا اللي هو المخرج خالد محجوب
التزام وتعب وتدريبات
لكن لم يجد اي حاجة من ده في الفرقة المسرحية دي
فرجع في يوم متضايق جدا لدرجة اليأس وده كان عام 2018 وقال انه مش هيقدر يكمل مع الفرقة دي وكدة حياتي بتضيع وكان في حالة يأس شديدة جدا
فقولتله انت درست واتعلمت مونتاج وتصوير وإخراج وبتكتب وبتعلم حاجات لطيفة جدا زي فوازير رمضان ع اليوتيوب وغيرها واشتغلت مخرج في قنوات صغيرة في مدينة الانتاج
ليه ماتعملش فريق سينمائي ؟
الاقتراح ده ضايقه جدا ونرفزه اكتر لكن بعد يوم كان هدي وبدأ يفكر وجه يسألني طيب انت شايفة ده ممكن يحصل ازاي
فقولتله اقتراحات ودي كانت البداية وكون مجموعة من الشباب منهم مصور
وراح باع العربيتين اللي عندنا وبعنا عفش كتير وراح اشترى معدات اضاءة وكاميرا وعدسات وجهاز مونتاج وعمل استوديو كروما واشترك في كورسات دولية
واول اجتماع للفريق وتسمية الفريق كان في 20-7-2018 اللي كان بالصدفة يوم عيد ميلادي
ما الهدف في العمل مع فريق؟
– الهدف من الفريق ببساطة التغلب على صعوبات الانتاج وتكوين فريق عمل لفيلم وده شئ شبه مستحيل او مستحيل حرفيا عشان تنتجي فيلم من غير ما يكون معاكي فلوس
لكن انشاء الفريق نفسه ووضع خطة ليه كانت مهمة جوبا وكان من اهم مبادئ الفريق التعلم والدراسة فالفريق بالكامل لازم يلتحق بالمدرسة العربية للسينما والتليفزيون عشان يبقى اكاديمي
ده غير المحاضرات اللي بيديها جوبا لاعضاء الفريق بسبب دراسته وخبراته
ما هيا المعوقات التي تواجهه الفريق؟
– المعوقات
يااااااااااااااااااااااااااااااااااااه
كتير جدا
ابتداء من ايجاد فكرة للفيلم وصياغته في قصة ثم كتابته سيناريو ثم المعالجة ثم توفير فلوس الانتاج واللوكيشانات والديكورات والازياء وغيره وغيره وغيره كتير جدا
نجيب كل ده منين خاصة إن أكبر معوق في الافلام القصيرة مافيش منها أي عائد
والأفلام الطويلة محدش عايزيشتريها مننا رغم إن إحنا على سبيل المثال لما عرضنا فيلم التابون في سينما الهناجر مجانا جه جمهور كبير جدا لدرجة التدافع وإحداث إصابات مش ده الملفت إنما الملفت إن الفيلم مدته كانت ساعتين والناس اللي دخلوا كانوا أكتر من الكراسي وفضلوا واقفين على رجليهم ساعتين كاملين ولقينا ناس وقفت تتفرج في الكونترول روم من شاشة الكومبيوتر
لكن كله رافض يشتري مننا الفيلم لسبب واحد
الفيلم مافيهوش نجوم كلمة بتتكرر كتيرمعانا لغاية لما عرفنا ان المنتجين المصريين أو الانتاج المصري عموما لا علاقة له لا بفكرة ولا إجادة تمثيل ولا سيناريو ولا إخراج
أنا أسفة بس ده اللي لاقيناه حوالينا بالفعل
الفكرة غالبا في الأفلام مسروقة والراكورات دايما أو كتير واقعة…
بس اهم حاجة الفيلم فيه نجوم
كده يبقى الفيلم يكسب
رغم إن إحنا شوفنا النجم الكبير احمدحلمي بيعتذر عن أفلام ليه لم تنجح وشوفنا الثلاثي شهير وبهير وسمير (سينمائيا) حققوانجاح في ورقة شفرة وغيره
لكن الجو السائد مش معانا
هل بتعملو تدريبات او كورسات لمن يرغب للإنضمام للفريق؟
– بنعمل فعلا تدريبات للي حابين ينضموا لأعمال الفريق لأنه مش ضروري ينضم للفريق ممكن ينضم لعمل واحد أو أكثر من أعمالنا لأن فريقنا فريق سينمائي مش فريق تمثيل ودي نقطة في غاية الأهمية لدرجة إن معظم الناس مش قادرين يفهمونا في النقطة دي قوي لأنه أمر جديد بالمرة
كم عدد الأعمال الفنية التي قدمها فريق لوك سينما ؟
– عدد أعمال الفريق نحن حاليا بنجهز للفيلم الثاني عشر وهو فيلم فامبريسو وفي نفس الوقت داخل تدريبات للفيلم الثالث عشر فيلم الناشز
هل أزيعت أعمال الفريق في دول أخري غير مصر ؟
– تم عرض بعض افلامنا داخل مصر على قنوات النيل وسينما الهناجر عدة مرات وسينما قصر السينما وخارج مصر في مهرجانات دولية في الولايات المتحدة وبريطانيا والجزائر
ما هيا أحلامكم لفريق لوك سينما؟
– أحلامنا : ليس لنا أي أحلام بالمرة لأن أحد فلسفة لوك سينما أن الحلم للنائم والهدف للمستيقظ الجاهز
فلذلك لنا أهداف وهما نوعين
الهدف الأدبي :
ببساطة تطوير فكر الفرد من مستواه الحالي لمستوى يليق بالقرن الواحد والعشرين تنمية الفكر النقدي الباحث حسب الأدلة وليس الإنسياق وراء الذائع ونقد الطائفية والفرقة بين الناس
أما الهدف الفني: فلو ذكرته قد يتم الاستهانه به فلذا دائما نطالب الناس بمتابعتنا ليروا بأنفسهم إلى أن نصل
شباب مكافح ومجتهد غايته تبرر وسيلته للوصول لأهدافه رغم الصعوبات التي يمر بها ولكن لكل مجتهدٍ نصيب ونصيبكم في الحياة نيوز لتكونوا ثاني عشر شخصيات ٢٠٢٠من أختارتهم الحياة نيوز لهذا العام ..
وفقكم الله.