فطير مشلتت
بالزبدة الفلاحي
الواحد في مكانه يثبت
يا نفس اهدي وارتاحي
حتتين جبنة قديمة
على شوية مش
الحياة بقا لها طعم وقيمة
بعيد عن الكدب و الغش
والقعدة وسط العيلة
مع كوباية شاي تقيلة
من الفرحة قلبي ها يفط
يامة كان نفسي في واحدة
شعرها أصفر وعنيها خضر وجامده
تحس بمشاعري
تعرف تقول شعري
ولما ف يوم اغلط
تقبل عذري
قالتلي ياواد أسكت
إنت معاك ست بيت
ولا إنت ما بتشبعش عط
قعدنا حولين الطبلية
عنيها جات في عنيا
كني بشوفها لأول مرة
حبيت السمار وحبيت الخمار
وحبيت البساطة والضحكة الحلوة
وهيا بتهمس ف ودني يا حبيبي
يامحلاها وهيا لابسة الطرحة
عيون سرحة وهدوم برحة وشرحة
وقلب أبيض نضيف
ما بتحبش التذاويق ولا الصور
ولا الحب المزيف و المزور
أصيلة زي كل بنات الريف
العشرة والشهامة
والحب لية علامة
حبيبتي جنة
ساعة رضا وفرح وهنا
عصفوره وحمامة
وهيا كل ما اتمنيت
في ازمتي ووجعي الاقيها جمبي
طول عمرها ما تبعني وقريبة من قلبي
وتفكرني بحبها
من طيبه قلبها
لو ف يوم نسيت
أجمل وأرق ست بيت
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب