دي الحقيقة اللي استحالة أقدر أنكرها أو أنساها في يوم من الأيام، لأني ببساطة من القلة النادرة اللي راحوا يتجوزوا في بيوت الشيطان نفسه، وياريت كنت رايحة بالصدفة، بل للأسف كنت رايحة بناء على أمر الشيطان نفسه..
…………….
عارفين الشاب الغامض، اللي مبتسمعش صوته إلا نادرا، اللي ماشي يبص للفراغ بدون حتى ما يرمش، طبق كل ده بقا هتلاقي مازن، مازن اللي ظهر قدامي زي القدر في الشغل معايا في الشركة..
كنت داخلة الحمام عشان اتفاجئ بيه طالع منه، ابتسمت في خجل لأني اتفاجئت بوجوده قدامي، كان شكله مخيف، حسيت برهبة غريبة أول ما لمحت عينيه، لابس اسود في اسود وريحة البرفان بتاعته نفاذة بطريقة مخيفة..
بص في عنيا بصة باردة جدا ومشي، دخلت الحمام بسرعة وخدت نفسي بالعافية، وغصب عني معرفتش اشيل الشخص ده من تفكيري طول اليوم، وسيم بطريقة غريبة وإن كان مخيف شويتين، والغريب إن تاني يوم بس لقيت المدير داخل مكتبي انا وزميلتي وجايب وراه نفس الشخص، بنفس اللون الاسود اللي لابسه..
بنطلون اسود
جزمة سودة
بلوفر اسود
وجاكيت اسود
حتى شعره كان اسود حالك، مختلف عن شعر الأشخاص العاديين، المدير قالنا ان اسمه مازن وهيبقا معانا من انهاردة في الحسابات، وطلب مننا نعلمه معانا واحدة واحدة، بصيت في عين رقية زميلتي لقيتها خايفة، احساس الرهبة نزل علينا كلنا مش انا لوحدي، حتى المدير كان صوته واطي على غير العادة..
رحبت بيه وبدأت أشرحله الشغل عندنا وانه هيبقا مسؤول عن الحضور والانصراف والخصومات بتاعت الناس اللي بتتأخر أو بتغيب، واديته شيت اكسيل عليه أسماء كل الموظفين عشان يقرأ ويتعرف على الناس بسرعة..
كان صامت، عينيه مبترمش حتى، مبيهزش راسه، ولا حتى بيرد، هو كان بيسمع وبس، في النهاية ابتسم ابتسامة غامضة وقالي
“متشكر”
وعدى اليوم عادي خالص، وخلصنا الشغل ومشينا، وعلى بالليل لقيت رسالة واتس من رقم مجهول مكتوب فيها الآتي
“شكرا على تلقينك لي ما تعرفينه من علومكم”
مين الأهبل اللي باعت الرسالة دي بقا، دخلت على الترو كولر لقيت الرقم باسم “مازن الأمير” قلبي دق بطريقة غريبة، هو مازن ده جاي من كوكب تاني ولا ايه..
روحت تاني يوم لقيته كان قاعد على الكمبيوتر بيشتغل، ابتسمت وقولتله” صباح الخير، طبعا معملتش أي حاجة خالص”
لف الشاشة ناحيتي بهدوء شديد
بصيت بذهول ناحية الشيت لقيته مسجل حضور كل الناس بالدقيقة، الناس اللي لسة نصهم مجاش أصلا..
بصتله وانا خايفة وقولت:
– مينفعش نكتب بمزاجنا يا مازن، احنا اللي بيحضر بنسجله
رد بصوت بارد وقال:
– كل الناس هتحضر في الميعاد اللي انا كتبته
جسمي اترعش بطريقة عجيبة وحاولت الطف الجو وقلت:
– بتقرأ الغيب ولا ايه ياعم الساحر
– لا بس زي مانا ما قولت هيحصل
خدت الشيت وفتحته على الجهاز بتاعي
وحضرت غادة زميلتنا وأكدت حضورها الساعة
١٢-٨ دقيقة، بصيت على الشيت لقيته مسجلها من الساعة تمانية الا ربع انها هتحضر الساعة ١٢-٨ دقيقة، قولت يمكن صدفة، بس لما عشرين موظف أكدوا ميعادهم ولقيته نفس الميعاد بدأت اترعش مكاني في صمت، طول اليوم كنت خايفة أبص ناحيته حتى..
لحد ما خرجت رقية تخلص ورق وبقيت انا لوحدي معاه، ولقيته اتكلم بهدوء وقال:
– متخافيش مني يا زهرة
بصتله وانا لسة بترعش وابتسمت عشان اقلل التوتر وقلت:
– وانت عفريت عشان أخاف منك
– بصي انا عندي موهبة بسيطة بقدر أعرف بيها حاجات كتيرة، ولو تحبي ممكن أعلمك في يوم من الأيام
وقتها كنت باصة في عنيه، عنيه اللي لاحظت فيها شيء عجيب، كانت عاملة زي المحيط، المحيط اللي مليان دوامات بتسحب ناحية الأعماق، ولقيت نفسي بنجذب ناحيته بطريقة رهيبة، صدقا انا كنت عايزة احضنه وانهار في البكاء، كأنه أقرب شخص ليا في الحياة، مع اني معرفوش غير من يومين..
وبدأ الأمر يتطور بطريقة عجيبة، كان الصامت، اللي مبينطقش، بس معايا كان مبتسم دايما، مفيش شغل بيتحط على مكتبي إلا ويخلصه عشان مشتغلش، كان بيبص بصات مخيفة لأي شاب يتكلم معايا ولو حتى في شغل، مفيش يوم إلا ويجيب معاه شيكولاتة عشاني، افعال غريبة ومتناقضة من شخصية زي دي خلتني انجذب ليه انجذاب رهيب، رقية نفسها كانت بتخاف تجيب سيرته، وهو كان دايما بيخوفها، بس معايا كان دايما مختلف..
لحد ما جه وطلب انه يقعد معايا برة الشركة لأمر مهم، وقتها فعلا كنت بحبه، بعشقه، بس كنت مخبية جوايا كل مشاعري وقافلة عليها بقفل حديد، ويوم ما خرجت معاه كنت خايفة وفي نفس الوقت طايرة من الفرح..
مشاعر غريبة خلت جسمي كل شوية يترعش بسببه، وهو كان صريح جدا، قالي انه عارف اني بحبه، وقتها اترعشت اكتر، ايه الشخص اللي بيعرف كل حاجة ده، وبعدها اعترف بكل بساط انه بيحبني وعايز يتجوزني..
وقتها جسمي اتنفض مرتين على الأقل، بس وافقت، وافقت عشان بحبه، وافقت عشان قدامه أنا أضعف خلق الله، ارادتي منتهكة قدامه بطريقة عجيبة..
وكلها اسابيع بس ولقيت نفسي انا وهو في شقة في الدور التاني في بيت والده، كنت لابسة فستان الفرح وطايرة من السعادة، وبدأت أتجهز لليلة العمر، بس اللي حصل كان عجيب، غريب..
دخل الاوضة واستقبلته بابتسامة خجولة، وقبل أي شيء فوجئت بوالده بيدخل الاوضة وبيقف قدامي، استغربت جدا ولقيت نفسي بستخبى في الستارة لأني كنت لابسة لبس خفيف، بصيت عليه عشان ياخد أي رد فعل بس ظهر عليه الخوف وركع قدام والده في خشوع تام..
انكمشت اكتر واكتر واتكلمت بصوت متوتر وقلت:
– عيب يا عمي تدخل علينا كدا
لقيته بصلي بصة جمدت الدم في عروقي وبعدها ابتسم ابتسامة مخيفة وخرج، وبعدها خرج وراه مازن، مازن اللي مقربش مني ليلتها ولا لمدة إسبوع كامل، كأني اتجوزت راجل ميت، ومكنتش قادرة اصارح أهلي بأي حاجة..
كان كل ليلة ينزل يسهر طول الليل مع والده في البيت تحت ويسبني في الشقة فوق لوحدي، لحد ما لقيته في يوم جه ينام جمبي وقرر انه يقرب مني، والمرعب انه جاي في يوم انا عندي فيه عذر شرعي..
. بعدت عنه بخوف وصارحته انه مش هينفع، وقتها ظهرت عليه السعادة وبكل هدوء طلب مني كل هدومي اللي ملوثة بالدم الشهري، وقفت مصدومة مش مستوعبة اللي بيقوله، بس هو كان مخيف، محطم ارادتي كلها، لدرجة اني فعلا اديته الحاجة الملوثة بدم الطمث..
وخدها ونزل يجري تحت على بيت والده، ليلتها قعدت في اوضتي مرعوبة ومش قادرة أنام حتى، ووسط الضلمة وهدوء الليل فوجئت بباب الاوضة بيتفتح وبيدخل والده منه..
قمت مفزوعة وصرخت فيه، الموضوع كدا بقا مبالغ فيه، غطيت جسمي بالبطانية وانكمشت على نفسي، لقيت مازن دخل فورا وبدأ يولع شمع حولين السرير، ووقف والده قدام السرير يبصلي بصات رهيبة..
وولع مازن حولين السرير شموع على هيئة نجمة، كل ده وانا بتنفض في السرير مرعوبة، جسمي مش مساعدني أهرب، ولساني مشلول مش عارفة أنطق، كأن فيه حاجة مكتفاني..
ولقيت حمايا بيتكلم بهدوء وبيقول:
– طبعا عايزة تفهمي احنا بنعمل ايه
اتنفضت مكاني اكتر وهزيت راسي، لقيته كمل وقال:
– سيدنا طلب حائض عشان يرضى عننا، وهو اختارك انتي بالذات
واتشل جسمي اكتر واكتر، ولقيت نفسي مش قادرة أهمس بنص كلمة، وفورا بدأ يهمهم بكلام عجيب غير مفهوم، كأنه بيقول طلاسم، وفوجئت بمازن جايب خنجر في إيده، وانكمشت اكتر واكتر في مكاني، لقيت ابوه بيأمره بغضب وبيقول:
– خليها تنام عريانة وسط الشمع
وقتها كنت في أعتى درجات الخوف والفزع، لقيت مازن بيقرب مني وبيشدني بعنف، كنت بتمنى أهرب، أصرخ حتى، بس كنت زي المشلولة، بقالي إسبوع مربوطة بشيء مش متشاف هنا، مش قادرة أهرب أو أخرج، فهل هقدر أهرب دلوقتي..
رفعت عنيا للسما وناديت على ربنا، أقسمت عليه ينجيني، وبعد القسم بثواني بس فوجئت بجرس البيت بيرن، وقتها خرج صوتي، وقتها صرخت بأعلى صوت..
كل اللي بعده حصل بسرعة، مازن وابوه حاولوا يسكتوني بالعافية، سمعت صوت صريخ برة، بعدها الباب اتكسر وفوجئت بأمي وابويا وناس كتيرة داخلين الاوضة وماسكين مازن وابوه..
فضلت يومين كاملين فاقدة النطق، مبتكلمش، كل اللي عرفته ان أمي فجأة يومها حست بقلق رهيب، وخدت ابويا الساعة ١٠ بالليل عشان يزوروني ويطمنوا عليا، واتفاجئوا بصريخي أول ما رنوا الجرس، وفتحت أمي في الصريخ، وكسروا الباب مع الجيران ولحقوني..
بس النقط المفقودة في الحكاية ان ازاي مازن قدر يقنعنا ويأثر علينا عشان نوافق بيه واتعلق انا بيه كمان، الغريب ان مازن وابوه اتنين سحرة مشهورين في البلد اوي، وبيعملوا كل الموبقات اللي في الدنيا..
وتقريبا الشيطان طلب منهم دم الطمث لعذراء، وخرج مازن من قوقعته يدور على بنت، وصادف وقتها وجودي واختاروني، ولولا ستر ربنا كان زماني قتيلة، الشرطة لما جت لقت كتب سحر ومواد رهيبة في بيت أبو مازن، وسمعنا عنهم بعدها ألف حكاية وحكاية..
حمدت ربنا ألف مرة وقررت أحكي حكايتي للناس، لأنها حكاية شبيهة بالأفلام، البنت اللي حبت شخص واكتشفت انه كان متجوزها عشان يقتلها، واللي اكتشفته اكتر هو صدق الآية دي
{ أَمَّنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونَ}
بقلم: أحمد محمود شرقاوي
ترقبوا أعمالي بمعرض القاهرة الدولي للكتاب ٢٠٢٢ ضمن اصدارات دار ببلومانيا للنشر والتوزيع.. صالة ٢ B11
رواية “إني رأيت”
سلسلة مائدة الفزع العدد الثالث “لعلهم يرجعون”
More Stories
دسوق تستعد لإستقبال الملايين غدًا .. قصة القطب الصوفي إبراهيم الدسوقي
“عبور 360”.. عينُك الشاملة على نبض مدينة العبور وخدماتها
انطلاق برنامج تأهيلي وتدريبي لموظفي هيأة التأمين الطبي