أحمد محمود شرقاوي
من سنة تقريبا ويمكن اكتر كتبت عن علوم الطاقة لأني دخلت في المجال ده من راسي لحد رجليا, ومن يومها ولحد النهاردة بتجيلي رسايل على الأزر من ناس نفسها تتعمق في المجال بالمعرفة والتجربة, والغالبية عندهم ظن أكبر انهم موهوبين وهيقدروا يدخلوا المكان المُظلم ده بدون أي أذي..
بيني وبينكم انا لحد انهاردة حاسس بتأنيب ضمير اني فتحت عيون ناس كتير عن الموضوع ده, بس بعد وقت من التفكير قلت ما يمكن ايمان الناس وتصديقها ليا يجعلني سبب اني أوضح نقاط غامضة كتير في الأمر ده, خاصة لما اكتشفت ان طائفة من الناس جربت ده من قبل ما تعرف مني ومنهم ناس تعبت نفسيًا, عشان كدا بكتب بوست ممكن يوضح بعض النقاط للناس في كل مجالات العقل وعلوم الطاقة والشفافية والروحانيات وكل الكلام ده.. ركز معايا شوية لو سمحت..
تعرف صاحبك فلان اللي نظره قوي, أعتقد عندك شخص في حياتك نظره عامل زي الصقر وبيشوف الحاجات البعيدة اللي ممكن انت متكنش شايفها أصلًا.. تفتكر ده ليه ؟؟؟
ببساطة عشان صاحبك ده نظره أقوى منك..
طيب تعرف فلان اللي بيسمع الهمسة في حين انت مبتبقاش سامع اللي هو سامعه, بنفس المبدأ هنقول الشخص ده حاسة السمع بتاعته أقوى منك..
هكذا الشفافية أو البصيرة أو الروحانية, هنعتبر التلت مسميات مسمى واحد بيوصف الوعي أو الادراك..
طيب ايه هو الوعي أو الادراك ؟؟
هقولك ده المسؤول الأكبر عن قدرات عقلك الغير مفهومة, فيه شخص بيفهم بسرعة, وشخص لا, زيها زي أي حاسة من الحواس, السمع والبصر وغيره, البعض قال عليها الحاسة السادسة بعد الخمس حواس اللي هما:
البصر
السمع
التذوق
اللمس
الشم
وطبعًا الحاسة دي موجودة عند كل الناس بس بنسب متفاوتة زي قوة البصر مثلًا, ودي طبعًا بتكون قدرة ربانية ملكش يد فيها, زي قوة بصرك وسمعك وحاسة الشم بتاعتك, والقدرة دي لما بتزيد بيحصل الآتي:
تشوف رؤى في نومك تتحقق
تتحكم في أحداث نومك
تحس بالخطر
البعض بيحس باقتراب الموت من الناس اللي حوليه
تحس بوقوع الخطر عند الناس اللي بتحبهم
وهتلاقي بعض الصفات دي في الست أكتر من الراجل لسبب رباني برضه, طيب كل ده كان عادي ومفهوم..
لحد ما بدأ الطب يبحث ويعالج, ليه ده نظره ضعيف, طيب ما نقويه..
ليه ده سمعه ضعيف ما نقويه..
وهكذا, رغم ان ربنا وزع رزق الحواس بطريقة متساوية, فتلاقي الأعمى سمعه أقوى, واللي مبيسمعش نظره قوي, رزق بتاخده كامل بس بتوزيعة مختلفة عن غيرك..
المهم الطب اشتغل شغلته وبتوع الروحانيات قالوا ما نعمل زي الطب..
ونقوي الحاسة السادسة عند الناس اللي هي الادراك أو الوعي, فطلع بعض الدجالين والله أعلم وقالك احنا نعمل علم اسمه علوم الطاقة..
ونقول ان فيه عين اسمها عين البصيرة اللي هي العين الثالثة المسؤولة عن الادراك, ونقول ان فيه تمارين بتعملها فبتفتح العين دي وتخلي الادراك عندك عالي أوي..
والبعض قالك لا, احنا نقول ان فيه حاجة اسمها اسقاط نجمي, وان في الحالة دي الوعي او الادراك ده بيخرج برة الجسم خالص, وبيكتشف بقا كل اللي حوليه بدل ماهو محبوس جوة عقلك وجسمك المادي, ونقول عليه الجسد الأثيري..
طيب حلو ده, دي مجرد تمارين روحانية وتأمل ويوجا وبتزود تركيزك وبتفتح عين البصيرة والكلام ده كله..
للأسف هقولك لا..
عايز تصدقني صدق, مش عايز فدي حريتك الشخصية..
انا أحمد لما دخلت المجال ده لقيته مجال لدخول شياطين الجن لحياتك بكل أريحية, وصل الأمر اني اتكلمت مع شيطانة بسبب علوم الطاقة, أة والموضوع مش حلو ومثير, ده الجحيم نفسه لو متعرفش, ولحد انهاردة عيني اليمين فيها مشاكل والبعض بيقولي انها فيها مشكلة..
كل تجارب الناس اللي اعرفها شخصيًا أو قرأت عنها لما مارست الموضوع ده اتأذت, كل شخص منهم شاف شيطان, وكل شخص منهم اتعرض لمحاولة مس, وكل شخص منهم قرب أوي من عالم الشياطين..
في عالم الاسقاط فيه حاجة اسمها الدليل..
ده كائن بيجيلك لما بتنجح ويعرفك على العالم الأثيري, ده شيطان مش مخلوق عقلي..
لما تفتح العين الثالثة هتشوف كائنات اسمهم في علوم الطاقة “الكائنات النورانية, أها دول شياطين وهيحولوا حياتك لجحيم..
التخاطر هو الوحيد اللي بصراحة مشوفتش منه أذى روحاني, ممكن أذى نفسي بس..
يعني ببساطة انا جايلك بعد سنتين من غرقي في الدراسة والتجربة وبقولك بلاش, اقرأ واعرف وافهم ده حقك, حتى لو هتروح تقرأ عن السِحر والجن, بس متخاطرش وتغامر بسذاجة, شوف قدراتك اد ايه واتعامل بيها, متفتحش صدرك بكل سذاجة..
السبب الوحيد اللي ممكن يزود عندك الوعي ده وتبقا عندك شفافية هي العبادات, قيام الليل والذِكر والقُرب الشديد من ربنا هيخلي البصيرة عندك قوية أوي, بدليل الصحابة اللي كانوا بيشوفوا الرؤى كفلق الصبح, دي الحالة الوحيدة اللي اعرفها اللي بتقوي الحاسة دي, أو ان الموضوع يبقا رباني والموهبة دي عندك والحاسة دي قوية من يوم ولادتك وانت ملكش يد في ده, انما متبقاش موهوب بالهِبة الربانية دي وتحاول تقويها بالتمارين فده الخطأ بعينه, لأنك وقتها هتتحول لقدر الله لمستعين بالجن زي الساحر اللي بيشوف ويعرف من خلالهم, والمُقابل هيبقا صعب أوي..
اتعلم واقرأ وافهم, وانا متكلف بالمهنة دي, هفهمك واكلمك وارد عليك, بس مش هسمحلك تأذي نفسك, لو انت حابب تأذي نفسك انا برئ منك, لأن ده اختيارك مش اختياري, وانت شخص واعي مش طفل صغير, وبصراحة انا بخاف عليك حقيقي لأني بعتز بيك, لأني أخوك.
More Stories
مزاد دهب – النسخة الثانية: عالم من التحف والأنتيكات
انطلاق أول مزاد علني للأنتيكات في الأقاليم بقيادة براند “دهب”
رمضان بين الكلمة والوعي ليلة مميزة بنقابة أطباء المنوفية